Wina'am zan'as Zedekaya sɔsʋg la yɛla
21
1 Labaar da yi Zugsɔb la san'anɛ kɛn Jeremia ni na saŋa kanɛ ka Na'ab Zedekaya da tʋm Pasur onɛ an Malkija biig la, nɛ maanmaan Zefanaya onɛ an Maaseya biig la, ye ba kem o san'an na la. Ba da yɛl o ye, 2 “Bu'osim Zugsɔb la tisi ti bɔzugɔ Nebukadnɛza onɛ an Babilon na'ab la bɔɔd ye o zab nɛ ti. Daasi'erɛ Zugsɔb la na tʋm nyalima tisi ti wʋʋ on da tʋm kʋdimin si'em la, ka Nebukadnɛza lɛb ka basi ti.”3 Amaa Jeremia da lɛbisi ba ye, “Yɛlimi Zedekaya ye 4 Zugsɔb onɛ an Israel Wina'am la yɛl ye, ‘M gban'e ye m tuligi zab nɛ fʋ nɛ zaba la'ad banɛ bɛɛ fʋ nu'ugin ka fʋ mɔri zabid nɛ Babilon na'ab nɛ o nimbanɛ bɛ zaŋguom la yiŋi giligif la. M na mɔri ba kpɛn' tempʋʋg la pʋʋgin na. 5 Mam mɛŋ na tiɛn m nu'ug ka zab nɛf nɛ m mɛŋ paŋ nɛ sʋnpɛɛn nɛ ɛndʋg. 6 M na kʋ banɛ bɛ tempʋkaŋa ni: nidib nɛ bʋnkɔnbid la wʋsa, ban'abɛ'ɛd na kʋʋ ba. 7 Lin nya'aŋ la, m na nɔk Juda na'ab Zedekaya nɛ o na'ayikpɛm, nɛ tempʋkaŋa nimbanɛ ka ban'as nɛ zaba nɛ kɔ'ɔm pʋ kʋʋ ba la, tis Babilon na'ab Nebukadnɛza nɛ ba bi'emnam banɛ bɔɔd ye ba kʋʋ ba la. O na kʋʋ ba ka kʋ zɔɔ ba nimbaanlig bɛɛ o zɔɔ ba nyɔɔgɔ.’ ” Zugsɔb la yɛl si'em la.
8 Lɛn yɛl nidib la ye Zugsɔb la yɛl si'eli nwa ye: “Gɔsima, m ye m digil nɛ vʋm nɛ kum suoya ya tuon. 9 Onɛ wʋsa kpɛlim tempʋkaŋa ni ba na kʋʋ o. Amaa onɛ wʋsa yii nɔk o mɛŋi tis Babilon dim banɛ giligi ya la na vʋe; o na faaɛn o mɛŋ. 10 M gban'e ye tempʋkaŋa kʋ nyɛ sʋ'ʋm amaa bɛ'ɛd. Babilon na'ab na faaɛn li, ka nyu'oe li nɛ bugum.” Zugsɔb la yɛl si'em la.
11 Linɛ lɛm paas, yɛlim Juda na'ayidim la ye, “Kɛlisimi Zugsɔb la labaar, 12 yanam Na'ab David yidima, Zugsɔb la yɛl ye,
“Tʋmmi nɛ sida ya antu'a zin'igin daar wʋsa;
faanmi banɛ ka ba faandi ba,
ka yisi ba banɛ mugusidi ba la nu'ugin.
Ya'a ka' ala, m sʋnpɛɛn la na la'aŋi nwɛnɛ bugum nɛ,
bɛ'ɛd kanɛ ka ya tʋm la zug;
li na la'aŋ ka sɔ' kae na kpiisi lii.
13 Jerusalem dima m sʋnf pɛlig nɛ ya,
yanam banɛ zin' zuokaŋa zugin
ka bɔn'ɔd la gilig la,
yanam banɛ yɛl ye, anɔ'ɔnɛ na nyaŋi kena zab nɛ ti?
Anɔ'ɔnɛ na nyaŋi kpɛn' ti suak zin'igin na?
14 M na namisi ya wʋʋ lin nar si'em,
M na nyu'oe ya tiis la nɛ bugum
ka linɛ giligi ya la wʋsa kanb.”
Zugsɔb la yɛl si'em la.