Jeremia nɛ Pasur yɛla
20
1 Maanmaan Pasur onɛ an Imer biig, ka lɛn an kpɛɛm Zugsɔb pʋ'ʋsim Yin la, wʋm ka Jeremia pian' pian'abama la, 2 ka o kɛ ka ba bʋ' Wina'am nɔdi'es Jeremia ka ba'a o nɛ ba'anɛ digil dɔɔg kanɛ bɛ Zugsɔb la Yin Benjamin Za'anɔɔr Kanɛ Bɛ Zugin baba la. 3 Bɛogʋ da nie ka Pasur kɛ ka ba yis ba'an la o san'an la, ka Jeremia yɛl o ye, “Yʋ'ʋr kanɛ ka Zugsɔb tisif la ka' Pasur ya'asɛ, amaa li anɛ a Magor-Misabib.” 4 Zugsɔb la yɛl si'eli nwa ye: “M na kɛ ka dabiem kpɛn' fʋ mɛŋ nɛ fʋ zuanam wʋsa; fʋ mɛŋ nini na nyɛ ka ba bi'emnam kʋʋ ba zaba ni. M na nɔk Juda nidib wʋsa tis Babilon na'ab, ka o na zii ba keŋ Babilon teŋin bɛɛ o kʋʋ ba. 5 M na nɔk tempʋkaŋa kpan'am nɛ li la'asʋma nɛ Juda na'ab arezak la wʋsa tisi ba bi'emnam. Ba na faaɛn li mɔri keŋ Babilon teŋin. 6 Ka fʋn Pasur, nɛ banɛ bɛɛ fʋ yin la wʋsa, ba na gban'e ya mɔri keŋ Babilon teŋin. Ani ka ba na mumif, fʋn nɛ fʋ zuanam banɛ wʋsa ka fʋ ma' ziri nɔdi'esʋgʋ tisi ba la.”Jeremia fabili tis Zugsɔb la
7 Zugsɔba, fʋ ma'am nɛ,
ka m niŋ dama'am la yadda:
fʋ paŋi gaadim ka fʋ nyaŋim.
Ba la'adim nɛ daar wʋsa
ka sɔ' wʋsa tʋ'ʋdim.
8 M pian'ad wʋsa anɛ kaasig,
nɛ zaba nɛ san'auŋ.
Ala ka Zugsɔb labaar kennɛ m san'an na
ka li kɛt ka m nyɛt tʋ'ʋd nɛ sʋnsa'aŋ ma'aa daar wʋsa.
9 Amaa m ya'a yɛl ye, “M kʋ lɛm pʋdig o yɛllɛ,”
bɛɛ “m kʋ lɛm pian' o yʋ'ʋrɛ,”
o pian'ad la nwɛnɛ bugum nɛ bɛɛ m sʋnfʋn,
ka bɛɛ m kɔnba ni wʋsa.
M gɛnnɛ ka kʋ nyaŋi mɔri li.
Sida, m kʋ nyaŋɛ.
10 M wʋm ka nidib bɛdegʋ nya'ami m yɛla,
“Dabiem gilignɛ zin'ig wʋsa!
Kem yɛl o yɛla! Kɛlli ka ti keŋ pɔɔtim o!”
M zuanam wʋsa guri ye m yidig ka yɛt ye,
“Daasi'erɛ ba na ma'aa o;
ka ti nyaŋ o ka yɔɔ ti sam.”
11 Amaa Zugsɔb la bɛnɛ m san'an wʋʋ zabzabid kanɛ kpi'em hali;
ala ka banɛ duoe zi'e m yɛla la kʋ nyaŋɛ.
Ba na mɔɔ gʋ'ʋŋ ka di nyan tita'ar,
nidib na nyɛ ba gbin ka sɔ' kʋ tami li yɛllɛ.
12 Zugsɔb onɛ an Paŋtita'ar Sɔba,
fʋn kanɛ kpansid pʋpielim dim
ka mi' ninsaal sʋnf nɛ o pʋtɛn'ɛr la,
kɛl ka m nini nyɛ fʋn na yɔɔ ba sam si'em,
bɔzugɔ, fʋn ka m zaŋi m yɛla niŋi fʋ nu'usin.
13 Yʋ'ʋm tis Zugsɔb la
Zun'omi Zugsɔb la!
O faaɛn fara dim la nyɔvʋr
ka yisi ba bugusim dim la nu'usin.
14 Nɔpɔɔr bɛ dabiskanɛ ka ba da du'am la zug!
Dabiskanɛ ka m ma da du'am la kʋ nyɛ barekaa!
15 Nɔpɔɔr bɛ onɛ kena yɛli m saam labaar la,
onɛ kɛ ka o sʋnf ma'ae ka yɛl o ye,
“Ba du'a biribiŋi tisif la!”
16 Ninkan la na nwɛnɛ tembanɛ ka Zugsɔb la san'am
ka pʋ zɔɔ ba nimbaanlig la.
O na wʋm zabir fabʋlʋg bɛogʋn,
ka wʋm tanp kuŋ kaasig nintaŋ tisʋʋs.
17 O da naan kʋʋnɛ mɛ m ma pʋʋgin,
lin na kɛ ka m ma niŋgbina liebi m yaʋg,
ka o mɔr pʋʋg saŋa wʋsa.
18 Bɔɔ kɛ ka m yii m ma pʋʋgin na?
Ka m nyɛt daamʋg nɛ sʋnsa'aŋ
ka m bɛllim wʋsa ti naae nɛ nyannɛ?