Yʋkanɛ nwa'ae la yɛla
19
1 Zugsɔb la yɛl si'eli nwa ye, “Kem onɛ ya'abid san'anɛ da' yʋʋr. Ka dɔl nidib la kpɛɛmnam nɛ maanmaannib la sieba keŋ 2 sig Ben Hinnom bɔn'ɔgin zin'ikanɛ kpi'e nɛ Sɛwies Za'anɔɔr la. Ani ka fʋ na mɔɔl labakanɛ ka m yɛlif la, 3 ka yɛl ye, Wʋmmi Zugsɔb la pian'ad, yanam Juda na'anam nɛ Jerusalem nidiba: nɛ'ɛŋa an linɛ ka Zugsɔb onɛ an Paŋtita'ar Sɔb la yɛl: Kɛlisimi! M na mɔr tɔɔgʋ kɛn zin'ikaŋa na, ka onɛ wʋsa tʋbiri wʋm li na pak o. 4 Bɔzugɔ ban zan'as man ka kɛ ka zin'ikaŋa lieb winzʋna zin'ig la zug, ba maal nyu'or maana ani tis wina banɛ ka ba mɛŋ bɛɛ ba yaanam nɛ Juda na'anam zi', ka kɛ ka zin'ikaŋa pɛ'ɛl nɛ banɛ pʋ tʋm taal la ziim la. 5 Ba mɛ' Baal teŋgban maalʋg zin'ig ye ba nyu'odi ba biisi ani maan maana tisid Baal linɛ ka m pʋ tisi ba nɔɔr ye ba niŋ bɛɛ pʋdigi li yɛllɛ, bɛɛ li bɛɛ m pʋtɛn'ɛrinɛ. 6 Alazugɔ, baŋimi ka dabisa kenna, ka ba kʋ lɛm buon zin'ikaŋa ye, ‘Tofet’ bɛɛ ‘Ben Hinnom Biis Bɔn'ɔgɔ, amaa Ninkʋʋr Bɔn'ɔg.’ ” Zugsɔb la yɛl si'em la.7 “Zin'ikaŋa nwa ka m na san'am Juda nɛ Jerusalem gban'ar. M na nɔki ba niŋi ba bi'emnam banɛ ieedi ba nyɔvʋr la nu'usin ka ba zabi kʋʋ ba nɛ sʋ'ʋraug, ka nɔki ba niŋgbina la tis bʋn-ian'ada nɛ bʋnkɔnbid. 8 M na san'am tempʋkaŋa ka kɛ ka li an linɛ ka ba na la'adi li. Li na pak banɛ wʋsa nyɛɛ li ka ba pian'adi nɛ'ɛsidi li, lin san'am si'em la zug. 9 M na kɛ ka ba dataas banɛ bɔɔd ye ba kʋʋ ba la kena giligi ba, ka kɔ'ɔm na kɛ ka ba na ɔnbi ba biribis nɛ ba bipumis, ba mɛ na ɔnbi ba taaba ni'im.”
10 “Nwa'am yʋʋr la banɛ dɔlli fʋ keŋ la nini ni, 11 ka yɛli ba ye Zugsɔb onɛ an Paŋtita'ar Sɔb la yɛl ye, ‘M na san'am buudkaŋa ka nwa'ae tempʋkaŋa wʋʋ yʋkaŋa nwa'ae si'em ka ba kʋ nyaŋi lɛn sɛɛn li la. Ba na mum kum Tofet teŋin la ka paalʋ ti naae. 12 Man na niŋ zin'ikaŋa nɛ banɛ bɛ kpɛla la si'em nwa. M na maal tempʋkaŋa wʋʋ Tofet teŋ la an si'em la.’ Zugsɔb la yɛl si'em la 13 Ya' banɛ bɛ Jerusalem la nɛ Juda na'anam la ya' na lieb dian'ad wʋʋ Tofet zin'ikaŋa nɛ, ban nyu'od bʋnnyubisa dɔɔd zugʋ tisid nwadbibis banɛ bɛɛ agɔla la, ka kpa'asid bʋnnuuda tisid winsieba la zug.”
14 Jeremia da yi Tofet bɔn'ɔgin lɛb zin'ikanɛ ka Zugsɔb da tʋm o ye o keŋ tis o labaar la, ka zi'en Zugsɔb Yir zakin la yɛl nidib la wʋsa ye, 15 “Zugsɔb onɛ an Paŋtita'ar Sɔb la yɛl si'eli nwa, onɛ an Israel Wina'am la yɛl ye, ‘Kɛlisimi! M na kɛ ka tɔɔg kanɛ ka m dɛŋi pian' ye li na kena la paae tempʋkaŋa nɛ teŋkpɛmis banɛ giligi li la, bɔzugɔ ba anɛ zukpi'euŋ dim ka pʋ kɛlisidi m pian'adɛ.’ ”