Jeremia n keŋ onɛ ya'abid yin la yɛla
18
1 Labakaŋa yi Zugsɔb la san'anɛ kɛn Jeremia ni na ye, 2 “Kem onɛ ya'abid la yin ka m na tisi fʋ m labaar anina.” 3 Alazug m daa keŋ onɛ ya'abid la yin, ka nyɛ ka o nwɛ'ɛd o ya'ad. 4 Amaa yʋʋr kanɛ daa bɛɛ o nu'usin ka o ya'abid la daa ka' sʋm; ka onɛ ya'abid la tiaki ya'ab yʋsi'a ya'as wʋʋ on bɔɔd ye li an si'em.5 Ani ka Zugsɔb labaar kɛɛn m san'an na ye, 6 “Yanam Israel dima, m kʋ nyaŋi maali ya wʋʋ onɛ ya'abid la maal si'em laa?” Zugsɔb la yɛl si'em la. Nwɛnɛ ya'ad la bɛ onɛ ya'abid nu'ugin si'em la, yanam Israel dim mɛ anɛ ala man nu'ugin. 7 Li ya'a ti paae saŋa si'a ka m mɔɔl ye m na san'am buudsi'a bɛɛ na'am sʋ'ʋlim, ka yisi ba nyain, 8 ka buudkanɛ ka m gban'e ye m san'am la tiaki ba pʋtɛn'ɛr ka basi ba tʋʋmbɛ'ɛd la, mam mɛ na tiaki m pʋtɛn'ɛr ka kʋ lɛn kɛ ka tɔkanɛ ka m gban'e ye li kɛɛn ba zugin na la kena ya'asɛ. 9 Ka li ya'a ti anɛ saŋa si'a ka m mɔɔl ye m na mɛ' buudsi'a bɛɛ na'am sʋ'ʋlim si'a ka ba zi'en sʋ'ʋŋa, 10 ka ba tʋm tʋʋmbɛ'ɛd ka pʋ siaki m nɔɔrɛ, asɛɛ ka m maligim tɛn'ɛs bʋnsʋŋ kanɛ ka m gban'e ye m maali tisi ba la yɛla.
11 Nannanna, yɛlim Juda nidib nɛ banɛ bɛ Jerusalem la ye, Zugsɔb la yɛl si'eli nwa: Gɔsima! M ti'ebidi ye m kɛ ka tɔɔg paae ya ka gban'adi ya yɛla bɛ'ɛd. Alazugɔ, fɛndigimi ka basi ya suobɛ'ɛdnam la, ya wʋsa yinne-yinne tiakimi ya suoya nɛ tʋʋmbanɛ ka ya tʋm la. 12 Amaa ba mɛ na lɛbis ye, Li ka' gbinnɛ, ti na kpɛn ken tuon nɛ ti mɛŋi gban'e si'em la; ti wʋsa yinne-yinne na kpɛn tʋmmi ti zukpi'euŋ tʋʋma.
13 Dinzugɔ, Zugsɔb la yɛl si'eli nwa ye,
“Bu'osim buudi wʋsa sʋʋgin ye,
‘Anɔ'ɔnamɛ mi' wʋm si'el ka li nwɛnɛ nɛ'?’
Israel onɛ nwɛnɛ pu'a kanɛ nan zi' dau la
tʋm tʋʋmbɛ'ɛd tita'ar.
14 Ku'om linɛ ga'aŋ wʋʋ sakuga la na buoe
Lebanon zuoya zugɔɔ?
Bɛɛ li ku'oma'asig linɛ pʋbid lalli sigid na la
nam mi' gu'oe ka pʋ pʋbida?
15 La'am nɛ wala man nidib la tam man yɛla nɛ;
ka nyɔ'ɔd bʋnnyubisa tisid ba'ayaalis,
ka li kɛ ka ba tu'usidi ba suoya la ni
nɛ yʋʋmpʋkʋda suoya la pʋʋgin.
Bada la kɛya ka ba luaki dɔl suobuga
nɛ suobanɛ pʋ maalɛ.
16 Ba teŋ la na san'am,
li na anɛ bʋnla'adir saŋa wʋsa;
li na niŋ pakiri tis banɛ gat ani wʋsa
ka ba na lɔbidi ba zut.
17 M na widigi m nidibi ba bi'emnam la tuon,
wʋʋ ya-nya'aŋ sisi'em da'ad sa'ad nɛ;
Ba dabisbɛ'og la daar
ba na nyɛnɛ m nya'aŋ ka ka' m nindaa.”
Jeremia dataas la yɛla
18 Ba da yɛl ye, “Kemi na ka ti gban'e Jeremia yɛla; ka wada linɛ ka maanmaannib pa'an la bɛɛ ya'am dim sa'alʋg nɛ nɔdi'esidib pian'ad la kʋ bɔdigɛ. Alazug kemi na ka ti nwa'as nɔŋgbannwa'ar nɛ Jeremia ka da kɛlis on yɛt si'el la wʋsaa.”
19 Ka m yɛl ye,
“Kɛlisim, O Zugsɔba;
wʋm banɛ pian'adi m yɛla bɛ'ɛd la yɛt si'em!
20 Nid ya'a maal sʋm, ba na lɛbis bɛ'ɛdi yɔɔ o sɔbaa?
Amaa nɛ wala, ba tu bʋmbɔk man yɛla.
Tiɛnm ye m daa zi'enɛ ba nɔba zugʋ
pian' ba yɛla fʋ tuon
ye fʋ da kɛ ka fʋ sʋnpɛɛn la paae ba.
21 Alazug kɛl ka kɔ'ɔm kpɛn'ɛ ba biis;
ka kɛ ka ba dataas zabi nyaŋi ba.
Kɛl ka ba pu'ab lieb pʋkɔnya ka kɔ'ɔŋi ba biis;
ka ba bi'emnam kʋʋ ba dap la
ka ba na'akim kpi zaba ni.
22 Kɛl ka nidib wʋm kaasigi ba yaan,
fʋ ya'a ti kɛ ka ba bi'emnam gbirigi kpɛn' ba san'an la,
bɔzugɔ ba tu bʋmbɔk ye ba ludimi gban'e
ka su'a bɛnd baans ye ba gban'am.
23 Amaa fʋnɛ mi', O Zugsɔbaa,
ban gban'e si'el wʋsa ye ba kʋ man la.
Da kɛɛ ba taali bas
bɛɛ pie ba tʋʋmbɛ'ɛd la yisi fʋ san'anɛ.
Kadimi ba yisi fʋ san'an;
fʋ sʋnf ya'a ti pɛlig, fʋn kɛl ka li wʋmi ba.”