Juda dim tʋʋmbɛ'ɛd nɛ ba tʋbtɛkir
17
1 Zugsɔb la yɛli ba ye,“Juda tʋʋmbɛ'ɛd la nwɛnɛ linɛ ka ba sɔbi digil.
Ba nɔknɛ kʋnt kanɛ pʋlʋmmi gʋlis,
bɛɛ kugir kanɛ kpi'em hali
ka ba sɔbi tabili ba sʋnya ni
nɛ ba maan bimbima zug.
2 Hali ba biis nan tɛnri ba maan bimbima
nɛ ba Asera teŋgban buos
linɛ bɛ titita'ar wʋsa gbinnin
nɛ kʋkʋna banɛ ka ba kennɛ zun'odi ba la.
3 M zuoya banɛ bɛ mɔɔgin la,
nɛ ya areza'as nɛ ya kpan'am la,
la'am nɛ ya maana zin'is la wʋsa,
m na kɛ ka ba faaɛn ba,
bɔzugɔ teŋ la wʋsa pɛ'ɛlnɛ nɛ tʋʋmbɛ'ɛd.
4 Ya mɛŋ pɔ'ɔgir zug ka ya na kɔ'ɔŋi ya faar
kanɛ ka m da tisi ya la.
M na kɛ ka ya lieb yammisi ya dataas nu'usin
teŋ kanɛ ka ya zi'isigɛ,
yanamɛ kɛ ka m sʋnf la'aŋ bugum,
ka na dit saŋa wʋsa la zug.”
5 Zugsɔb la lɛn yɛl si'eli nwa,
“Onɛ nɔk o ti'iri niŋ ninsaal san'an, nɔpɔɔr bɛɛ o zugin,
nɛ onɛ wʋsa ti'e ninsaal paŋ,
ka bid Zugsɔb la kudug.
6 O sɔba na nwɛnɛ tituug kanɛ bɛ pipirigin
hali kpan'am ya'a ti kena o kʋ nyɛɛ li.
O na bɛ sian'arin zin'ikanɛ ka mɔɔg pʋ yita,
teŋ kanɛ an yaarim ka nid pʋ bɛɛ ani.
7 Bareka bɛ nɛ onɛ wʋsa nɔk o ti'iri niŋ Zugsɔb la ni,
ka ti'enɛ on ma'aa.
8 O na nwɛnɛ tikanɛ ka ba sɛɛ li kpi'el kɔlʋg nɔɔrin,
ka o nya'a tɔɔndi sigid ku'omin la.
Tʋʋlʋg ya'a kenna o pʋ zɔt dabiem;
ka o vaand sɔbig saŋa wʋsa.
Saa ya'a wak yʋʋm si'a li pʋ pakid o
ka o pʋ gʋ'ʋŋid walibɔ.”
9 Ka m yɛl ye,
“Ninsaal susʋnf la dama'am gaad si'el wʋsa,
anɔ'ɔn na nyaŋi baŋi li?”
10 Ka Zugsɔb la lɛbis ye,
“Man Zugsɔb la vɛɛnsid sʋnf
ka kpansid pʋtɛn'ɛr wʋsa
ka yɔɔd ninsaal wʋsa nɛ o itʋŋʋ an si'em,
nɛ on nar ye o di'e si'em.”
11 Ninkanɛ nyɛ kpan'am ka li pʋ dɔlli li suorɛ,
o nwɛnɛ kɔdiŋ kanɛ pʋ nyɛ' gɛlaa
ka lɛɛ zu o tiraan gɛla um ka li wiak.
O ya'a ti kʋdig bi'ela li na zɔ ka kɛɛ o,
ka li naarin la o na pa'al ye o anɛ zɔlʋg.
12 Ti pʋ'ʋsim zin'ig anɛ na'am zin'ig
kanɛ vɛnl ka nyɛt dʋ'ʋsʋg
ka bɛ pin'ilʋgʋn sa.
13 Zugsɔba, fʋnɛ an Israel ti'ir,
banɛ zan'asif la wʋsa na di nyan.
Banɛ fɛndig ka basif la
nwɛnɛ banɛ yʋda ka ba sɔb titanin,
bɔzugɔ ban bas Zugsɔb
onɛ an ku'osʋŋ bulig linɛ tisid vʋm la.
14 O Zugsɔba, ti'ebimim, ka m paam laafi;
faanmim ka m nyɛ faangir,
bɔzugɔ fʋn ma'aa ka m dʋ'ʋsid.
15 Ba yɛtim saŋa wʋsa ye,
“Zugsɔb labaar la kpɛlim yaanɛ?
Kɛl ka li maal nannanna!”
16 M pʋ zɔ ka bas kɔnbkem tʋʋma linɛ ka fʋ tisim ye m tʋm la;
fʋ mi' ye m pʋ mɔr ya'amlɛog nɛ fʋ nidib la san'auŋ yɛlaa.
Fʋ mi' ye linɛ wʋsa yit man nɔɔrin la anɛ nyain fʋ tuon.
17 Da kpɛn'ɛsidim dabiem;
ka fʋnɛ aan m suak zin'ig yɛltɔɔg daar.
18 Kɛl ka banɛ namisidim la di nyan,
amaa yisim mam nyan pʋʋgin.
Kɛl ka ba ya'am iank,
amaa yisim mam dabiem pʋʋgin.
Kɛl ka dabisbɛ'og kɛɛn ba san'an na;
kɛl ka san'auŋ kɛɛn ba san'an na ta'ali ta'al.
Vʋ'ʋsʋm daar dɔlisʋg yɛla
19 Zugsɔb la yɛlim si'eli nwa ye, “Kem zi'en nidib la za'anɔɔrin, Juda na'anamɛ dɔl si'eli yit ka kpɛn'ɛd tempʋʋgin la; ka lɛn zi'en Jerusalem za'anɔya bama la ni. 20 Yɛlimi ba ye, ‘Wʋmmi Zugsɔb la labaar, yanam Juda na'anam nɛ Juda nidib wʋsa nɛ banɛ wʋsa bɛ Jerusalem ka dɔl za'anɔbama ni yit la. 21 Zugsɔb la yɛl si'eli nwa ye, Gu'usimi ka da zi ziid Vʋ'ʋsʋm Daar, bɛɛ ya mɔri li kpɛn' Jerusalem za'anɔya la nii. 22 Da zi ziidi yii ya yaan bɛɛ tʋm tʋʋma Vʋ'ʋsʋm Daarɛ, amaa kɛl ka Vʋ'ʋsʋm Daar la an kasi, wʋʋ man da zi'el nɔɔr si'em tisi ya yaanam la. 23 La'am nɛ wala ba da pʋ kɛlisida; ba zuti kpi'em ka ba pʋ kɛlisid bɛɛ di'ed sa'alʋg la zug. 24 Zugsɔb la yɛl ye, Ya ya'a gu'usid ka siaki m nɔɔr, ka pʋ mɔr ziidi kpɛn'ɛd tempʋkaŋa ni Vʋ'ʋsʋm Daarɛ, ka kɛ ka Vʋ'ʋsʋm Daar la an kasi ka pʋ tʋm si'eli li daarɛ, 25 na'anam banɛ zin' Na'ab David na'am gbauŋ zug la na dɔl tempʋkaŋa za'anɔya la ni nɛ ba na'ayikpɛm. Ban nɛ ba na'ayikpɛm la na ban'a ba tɛrekonam bɛɛ ba widi kpɛn'ɛd, ka Juda dim na bieli ba nɛ banɛ bɛ Jerusalem la, ka tempʋkaŋa na mɔr nidib saŋa wʋsa. 26 Nidib na yi Juda na nɛ teŋkpɛmis banɛ gilig Jerusalem la, ba na yi Benjamin sʋ'ʋlim nɛ Sefela nɛ zuoya nɛ Negef tɛɛnsin la na, m mɔr nyu'or maana nɛ zʋʋd maana nɛ bʋnnyubisa nɛ bareka pʋ'ʋsim piini ken Zugsɔb pʋ'ʋsim Yin na. 27 Amaa ya ya'a pʋ siaki m nɔɔr ka kɛ ka Vʋ'ʋsʋm Daar la an kasii, ka ziid ziidi kpɛn'ɛd Jerusalem za'anɔya la ni Vʋ'ʋsʋm Daar, m na kɛ ka bugum kanɛ pʋ kpiisid la'aŋ Jerusalem za'anɔya la ka dii ba kpi'euŋ zin'is la wʋsa.’ ”