Yɛltɔɔg dabisir
16
1 Ka Zugsɔb la labaar lɛn kɛɛn m san'an na ye, 2 “Mid ka fʋ di pu'a du'a biribis nɛ bipumis kpɛla.” 3 Zugsɔb la yɛl si'eli nwa zaŋi keŋ bibanɛ ka ba du'a ba kpɛla la nɛ pu'a banɛ aan ba manam nɛ dap banɛ aan ba saamnam la yɛla ye, 4 “Ban'abɛ'ɛd na gban'e ba ka ba kpi. Ba kʋ mumi ba bɛɛ kaasi ba kʋʋrɛ, amaa ba na nwɛnɛ sa'ad nɛ dig teŋin. Zaba nɛ kɔ'ɔm na kʋʋ baa naae, ka ba niŋgbiŋ la na kilim diibi tis bʋn-ian'ada nɛ bʋnkɔnbid banɛ bɛ teŋgbauŋ la zug.”5 Zugsɔb la yɛl si'eli nwa ye, “Da kpɛn' yikanɛ ka ba maal kʋʋr diibɔ; da keŋ ye fʋ kaas kʋʋr bɛɛ fʋ zɔɔ ba nimbaanliga; bɔzugɔ m yisi m albareka nɛ m nɔŋir nɛ m nimbaanlzɔɔr nimbama san'an.” Zugsɔb la yɛl si'em la. 6 “Kpi'emnam nɛ tadimnam wʋsa na kpi teŋ kaŋa ni. Ba kʋ mumi ba bɛɛ kaasi ba kʋʋrɛ, ka sɔ' mɛ kʋ pʋni o zug bɛɛ maal si'eli ba yɛllɛ. 7 Sɔ' kʋ tis banɛ kaasid kʋʋr la diibɔ, hali baa li ya'a anɛ ba saam bɛɛ ba ma; sɔ' pʋn kʋ bʋgʋli ba sʋʋnr ka tisi ba si'el ye ba nuu.”
8 “Da kpɛn' yikanɛ ka ba la'asi dit la zin'in ye fʋ di ka nu nɛ baa.” 9 Zugsɔb onɛ an Paŋtita'ar Sɔb ka an Israel Wina'am la yɛl si'eli nwa, “Saŋa kanɛ ka fʋ vʋe nwa, m na kɛ ka sumalisim linɛ ka ba maan tʋkpiidʋg la naae, ka fʋ nini nyɛ, pu'a paal nɛ sid paal sumalisim na naae zin'ikaŋa.”
10 Fʋ ya'a yɛl nimbama nɛ'ɛnam wʋsa ka ba bu'os ye, “Bɔ ka Zugsɔb la gban'e tɔɔg kaŋa tinam yɛla? Ti maal bɔ ka li an bɛ'ɛdɛ? Taal bɔ ka ti tʋm pɔ'ɔgi ti Zugsɔb Wina'am la?” 11 Fʋn yɛlimi ba ye, “Li anɛ ya yaanamɛ da zan'as man ka dɔl winsieba tʋmmi tisidi ba ka wɔ'ɔgidi ba la zug. Zugsɔb la yɛl si'em la, Ba zan'asim ka pʋ dɔlli m wada la. 12 Amaa yanam tʋʋmbɛ'ɛd gaadi ya yaanam la. Gɔsimi ya wʋsa gban'e zukpi'euŋ ka dɔlli ya sʋnfʋ bɔɔd si'el ka zan'as ka pʋ dɔlli m nɔɔrɛ. 13 Alazug m na lɔbigi ya yis teŋ kaŋa yiŋ, ka ya tɔɔm keŋ teŋ kanɛ ka yanam nɛ ya yaanam zi', ani ka ya na tʋmmi tisid winsieba nintaŋ nɛ yʋ'ʋŋ wʋsa, ka m kʋ gi'e gɔsi yaa.”
14 Zugsɔb la yɛl ye, “La'am nɛ wala sa, dabisa kenna, ka nidib kʋ lɛm pɔ nɛ Zugsɔb la ye, Ti pɔya nɛ Zugsɔb onɛ yis Israel dim Egipt teŋin na la.” 15 Amaa ba na yɛl ye, Ti pɔya nɛ Zugsɔb onɛ mɔr Israel dim banɛ bɛ ya-datiuŋ nɛ tɛɛns banɛ ka o widigi kpɛn'ɛs la. Bɔzugɔ m na lɛbisi ba teŋ kanɛ ka ba da tisi ba yaanam la.
16 “Amaa m na tʋm buol ziiŋgban'adib bɛdegʋ,” Zugsɔb la yɛl si'em la, “ka ba na gban'e ba. Lin nya'aŋ, m na tʋm tɔn'ɔsnam bɛdegʋ ka ba na tɔn'ɔsi kadi ba zuoya nɛ kʋkʋna nɛ tampinyɔ'ɔdin wʋsa. 17 M nini nyɛti ba suoya la wʋsa; ba kʋ nyaŋi su'a man san'an, bɛɛ ba tʋʋmbɛ'ɛd la su'a ka m nini kʋ nyɛɛ. 18 M na lɛbisi yɔɔ ba abʋyi' ba bugusim nɛ ba tʋʋmbɛ'ɛd la zug, bɔzugɔ ba kɛ ka m teŋ la lieb dian'ad, nɛ bada banɛ pʋ vʋeya, ka linɛ aan m faar la pɛ'ɛl nɛ si'elnam banɛ an ba'akpiilima.”
19 M Zugsɔba, fʋnɛ aan m paŋ nɛ m kpi'euŋ,
fʋnɛ aan m suak zin'ig mugusʋg saŋa.
Fʋ san'an ka buudi bɛdegʋ na kena,
ba na yi dunia kpikpɛmis wʋsa na yɛl ye,
“Ti yaanam da pʋ mɔr si'el si'ela asɛɛ wina banɛ pʋ mɔr sidaa
ka an ba'ayaalis banɛ pʋ tʋm bʋnsʋŋʋ tisidi baa.
20 Ninsaalib maannɛ ba mɛŋ winaa?
Ɛɛn, amaa ba ka' Wina'am!”
21 Zugsɔb la yɛl ye,
“Dinzugɔ, m na pa'ali ba,
nannanna m na pa'ali ba m paŋ nɛ m kpi'euŋʋ an si'em.
Ani ka ba na baŋ ye
m yʋ'ʋri an Zugsɔb la.”