Yɛltɔɔg na paae Juda dim
15
1 Zugsɔb la yɛlim ye, “Hali Moses nɛ Samuel ya'a zi'eni m tuon m ya'am kʋ keŋ nimbama nii. Mɔri ba tɔɔmi m san'an! Kɛl ka ba keŋ! 2 Ka ba ya'a bu'osif ye, ‘Ti na keŋ yaanɛ?’ Fʋn yɛlimi ba ye Zugsɔb la yɛl si'eli nwa ye:“Banɛ ka li an ye ba kpi la na kpi;
ka banɛ na kpi zaba ni la na kpi zaba ni;
banɛ ka kɔ'ɔm na kʋʋ ba la, na kpi kɔ'ɔm;
banɛ ka ba mɛ na gban'e ba la, ba na gban'e ba.”
3 Zugsɔb la mɛŋ yɛl ye, “M na kɛ ka san'auŋ zin'is anaasi kena:” ba na kpi zaba ni, ka baas na vuu ba mɔri keŋ, ka niis banɛ ian'ad agɔla la dii ba, ka bʋnyuos banɛ bɛ teŋin la na ɔnbi ba san'ami ba. 4 Manase onɛ an Hezekia biig ka da an Juda na'ab la tʋm si'el Jerusalem tempʋʋgin la zug, m na kɛ ka buudbanɛ bɛ dunia ni wʋsa kisigi ba.
5 Anɔ'ɔnɛ na zɔɔf nimbaanliga, O Jerusalem?
Anɔ'ɔnɛ na kumi fʋ yɛla?
Anɔ'ɔnɛ na bu'osif ye fʋ niŋgbina an wala?
6 Zugsɔb la yɛl ya ye,
“Fʋ zan'as mam,”
“fʋ lɛbidi nya'aŋ saŋa wʋsa.
Alazug m na nɔki m nu'usi pa'ali fʋ zug, ka san'amif;
m zɔɔf nimbaanligi gɛn.
7 M na nɔk nwammi yɛligi ya wʋʋ ki
tempʋʋg la za'anɔɔrin.
M na kɛ ka kum nɛ san'auŋ kɛɛn m nidibin la na,
ban pʋ tiaki ba suoya la zug.
8 M na kɛ ka ba pʋkɔnya zu'oe
gaad atɛuk nɔɔrin titanbin'isi.
M na kɛ ka san'auŋ sigi ba sʋʋgin nintaŋ tisʋʋs na
ka ba biis na kpi ka kɛɛ ba manam.
M na kɛ ka li gbirigi lii ba zugin na
ka sʋnsa'aŋ nɛ dabiem na bɛ.
9 Pu'a kanɛ du'a biis ayɔpɔi na lig
ka vʋ'ʋsid ka li pʋ sigida.
Li na an nintaŋ, amaa ka yʋ'ʋŋ pʋn sɔb on san'an;
Jerusalem na paam nɛ'ɛsʋg ka di nyan.
Banɛ kpɛlim la, m na kɛ ka ba keŋ zaba ni
ka ba bi'emnam kʋʋ ba.”
Zugsɔb la yɛl si'em la.
10 Oi, m maa, fʋn du'a mam la li anɛ tɔɔg,
m anɛ ninkanɛ ka teŋ la wʋsa kisig ka mɔɔdi m yɛla!
M pʋ pɛ'ɛŋ sɔ' si'el bɛɛ m pɛ'ɛŋ si'eli tis sɔ'ɔɔ,
la'am nɛ wala sɔ' wʋsa pɔɔdi nɔɔri tisidim.
11 Zugsɔb la yɛl ye,
“Sida, m na yisif yɛla ni;
yɛltɔɔg nɛ sʋnsa'aŋ ya'a ti kena,
m na kɛ ka fʋ dataas la nwɛ'ɛf nu'ug.
12 Ninsaal na nyaŋi kɔ'ɔg kuntɛɛ?
Ba na kɔ'ɔg kuntkpi'euŋ linɛ yi ya-datiuŋ la na,
bɛɛ kʋntzɛn'ugɔ?
13 M na nɔki fʋ kpan'am nɛ fʋ arezak la wʋsa
tis banɛ an faandib ka ba kʋ yɔɔ li sammɛ,
fʋn kɛ ka tʋʋmbɛ'ɛd yadig teŋgbauŋʋn la zug.
14 M na kɛ ka fʋ liebi fʋ bi'emnam yammʋg
ka ba na mɔri fʋ keŋ teŋ kanɛ ka fʋ zi'.
M sʋnpɛɛn la na nwɛnɛ bugum
ka na la'aŋi fʋ diif.”
15 Fʋ gban'e li gbin, O Zugsɔba;
tɛnri m yɛla ka sʋŋim,
ka yɔ m bi'emnam banɛ mugusidim la sam.
Fʋ summɔtir galis nɛ, alazug, da kɛ ka m kpii;
tɛn'ɛsim ban namisidim ka tʋ'ʋdimi fʋ yɛla si'em.
16 Fʋ pian'ad la daa kɛɛn m san'an na la, m di'e li;
m ya'am bɔɔd si'eli la, ka li tisim sumalisim.
Ba nɔki fʋ yʋ'ʋr la pʋdim,
O m Zugsɔb Wina'am onɛ an Paŋtita'ar Sɔba.
17 Man nam pʋ la'as nɛ banɛ la'asidi dit ka wa'ad la,
m nan zi' la'as nɛ ba maal sumalisim.
M zin'inɛ m kɔn'ɔkɔn' fʋ paŋ la daa bɛɛ m san'an la zug
ka fʋ kɛ ka ɛndʋg mɔrim.
18 Bɔ ka man niŋgbiŋ la zabir pʋ naada
ka m sapu'atita'ar la pʋ bɔdigida?
Fʋ bɔɔdi nwɛnɛ kuozɔtir kanɛ kʋdig sɛɛung winnɛɛ?
Ka nwɛnɛ zin'ikanɛ ka ku'om tansidi yit ka pʋ ya'asid kpiɛnrɛɛ?
19 Dinzugɔ, Zugsɔb la yɛl si'eli nwa,
“Fʋ ya'a tiak, m na lɛn kɛ ka fʋ lɛbi fʋ tʋʋma ni
ka na tʋmmi tisidim.
Fʋ ya'a pian'ad sʋ'ʋŋa, ka bas pian'ayaalis,
m na kɛ ka fʋ di'esidi m pian'ad.
Kɛl ka nimbama lɛbi fʋ san'an na,
amaa fʋn da lɛbi ba san'anɛ.
20 M na kɛ ka fʋ nwɛnɛ zaŋguomi tis nimbama,
kʋntzɛn'ug zaŋguom kanɛ mɔr paŋ.
Ba na zab nɛf,
amaa ba kʋ nyaŋɛ,
bɔzugɔ m na bɛ nɛf ka sʋŋif ka faanf.”
Zugsɔb la yɛl si'em la.
21 “M na yisif bugusim dim la nu'ugin
pitɔɔg dim la ya'a ti ye ba gban'af, m na faanf.”