Sawak nɛ kɔ'ɔm nɛ zaba yɛla
14
1 Zugsɔb labakaŋa daa kɛn man Jeremia san'an na ka li anɛ sawak yɛla:2 “Juda bɛ nɛ kukuma ni,
o tempʋʋs la lɛn ka' paŋa;
ka ba kum teŋ la yɛla,
ka kaasig la naan Jerusalem dʋt na.
3 Kpi'emnam la tʋmi ba sankpan'asnam ye ba iee ku'om na tisi ba;
amaa ba keŋ bulisin la, ka pʋ paam ku'om.
Ka tuligi lɛb ka pʋ nyɛ ku'om pɛ'ɛli ba yʋya la;
ka li paki ba ka ba pʋ lɛm mɔr ti'irɛ,
ka lusi ba zut.
4 Teŋ la kʋdig nɛ tans
bɔzugɔ saa pʋ niid teŋin la;
li pak kpaadib la nɛ
ka ba nɔk nu'usi bibigi ba zut.
5 Hali walig kanɛ bɛ mɔɔgin la
bas o bilia kanɛ ka o du'a la
bɔzugɔ, yaama kae ka ba na ɔnbɛ.
6 Sian'arin bʋmis bɛ kʋkʋna ni
vʋ'ʋsidi ligid wʋʋ wɛbaas nɛ;
ka ba nini sɔbid
yaama ka' la zug.
7 La'am nɛ ti tʋʋmbɛ'ɛdi di kasɛti ti yɛla la,
O Zugsɔba, maalim si'eli fʋ yʋ'ʋr zug.
Ti nya'aŋ lɛbig la yʋ'ʋn zu'onɛ galis;
ti tʋm tʋʋmbɛ'ɛdi pɔ'ɔgif.
8 Fʋn onɛ an Israel Ti'ir,
ka aan o Faangid sʋnsa'aŋ saŋa la,
bɔ ka fʋ nwɛnɛ saan teŋ la zugɔ,
ka nwɛnɛ suoken kanɛ gbɛn yʋ'ʋŋ yinne ma'aanɛ?
9 Bɔ ka fʋ nwɛnɛ dau kanɛ ka ba libig o
ka nwɛnɛ zabzabid ka ba nyaŋ o ka o kʋ nyaŋi faaɛn o mɛŋa?
Fʋ bɛɛ ti sʋʋgin, Zugsɔba,
fʋ yʋ'ʋr ka ba mɔri buonnɛ ti;
da basi tii!”
10 Zugsɔb la yɛl nimbama yɛla si'em nwa:
“Ba nɔŋnɛ ban na gɔɔndi giligid yɔɔg-yɔɔg;
ba pʋ gu'usid nɛ ba nɔba la ken zin'isi'a.
Ala ka Zugsɔb la zan'asi ba;
o na tiɛn ba pɔ'ɔgir la yɛla
ka namisi ba, ba tʋʋmbɛ'ɛd la zug.”
11 Ani ka Zugsɔb la yɛlim ye, “Da sɔsid nimbama nwa sʋm yɛllɛ. 12 La'am nɛ ban lɔɔd nɔɔr la, m kʋ kɛlisi ba kaasiga; la'am nɛ ban maan nyu'or maana nɛ zuud maana la, m kʋ di'e lii. M lɛɛ na san'ami ba nɛ zaba nɛ kɔ'ɔm nɛ ban'abɛ'ɛd.”
13 Amaa ka m yɛl ye, “Aa! Zugsɔb Onɛ an Paŋtita'ar Sɔba, nɔdi'esidib la yɛti ba saŋa wʋsa ye, ‘Ya kʋ nyɛ zaba bɛɛ kɔ'ɔm. Sida, sumbʋgʋsʋm na bɛ kpɛla yuug.’ ”
14 Ani ka Zugsɔb la yɛlim ye, Nɔdi'esidib la mɔri man yʋ'ʋri pian'ad ziri. M pʋ tʋmi ba bɛɛ gaŋi ba bɛɛ pian' tisi baa. Ba pian'adnɛ ziri pian' linɛ ka ba pʋ wʋmm, li anɛ sɔnpʋt nɛ ba'abʋgʋsim tʋʋma nɛ bada linɛ ka' gbinnɛ, nɛ ba mɛŋ pʋtɛnda gban'e si'em. 15 Dinzugɔ, man Zugsɔb la yɛl nɔdi'esidib banɛ mɔri m yʋ'ʋri pian'ad la yɛla si'em nwa ye m pʋ tʋmi baa, ka ba lɛɛ yɛt ye, “Zaba bɛɛ kɔ'ɔm kʋ paae teŋ kaŋa naa.” Nɔdi'es ban nɔɔ ka zaba nɛ kɔ'ɔm na kʋʋ ba. 16 Ka ban pian'adi tisid ninsieba la, ba na lɔbi ba yis Jerusalem suoraadin la kɔ'ɔm nɛ zaba zug. Sɔ' kae na mum ban nɛ ba pu'ab bɛɛ ba biribis nɛ ba bipumis la. M na kpa'ae tɔɔg kanɛ nar nɛ ba la niŋi ba zugin.
17 Yɛlimi ba pian' kaŋa ye,
“Kɛl ka m nini pɛ'ɛl nɛ ninta'am
yʋ'ʋŋ nɛ nintaŋ ka pʋ gu'oda, bɔzugɔ m nidib la namis ya hali
nɛ sapu'ad bɛdegʋ ban nwɛ' ba la zug.
18 M ya'a yi teŋ la yiŋ,
m na nyɛ nimbanɛ kpi zaba ni;
m ya'a lɛn keŋ tempʋʋgin la,
m na nyɛ nidib bɛdegʋ banɛ kpi kɔ'ɔm.
Nɔdi'esidib nɛ maanmaannib la wʋsa
keŋ teŋ kanɛ ka ba zi'.”
19 Fʋ zan'as Juda nɛ nyainnɛɛ?
Fʋ nɛ'ɛs Zion dimaa?
Bɔ ka fʋ tisi ti tɔɔg
ka li kʋ nyaŋi bɔdigɛ?
Ti mɔr ti'ir ye sumbʋgʋsʋm na bɛ
amaa bʋnsʋŋ pʋ yi naa.
Ti tɛn'ɛsid ye li na anɛ laafi saŋa
amaa li anɛ dabiem ma'aa.
20 Ti baŋi ti pɔ'ɔgir
nɛ ti yaanam tʋʋmbɛ'ɛd la;
ti sid tʋm taal ka pɔ'ɔgif.
21 Fʋ yʋ'ʋr zugɔ, da nɛ'ɛsi tii;
da kɛ ka fʋ na'am gbauŋ la di nyannɛ.
Tɛnri fʋ nɔnaar linɛ ka fʋ naal nɛ ti la,
ka da san'ami lii.
22 Ba'ayɔɔd banɛ ka buudi bɛdegʋ maan la na nyaŋi tis saa naa?
Saŋgbana la mɛŋ na nyaŋi kɛ ka saa nii?
Ayei! Li anɛ fʋn, ti Zugsɔb Wina'am.
Dinzugɔ ti ti'ir bɛ nɛ fʋ san'an,
bɔzugɔ fʋnɛ maal nɛ'ɛnam wʋsa.