Pien sɛnbidiŋ
13
1 Zugsɔb la yɛlim si'eli nwa ye, “Kem da' pien sɛnbidiŋi lɔɔ fʋ siaa, amaa da kɛ ka li si'is ku'om.” 2 Ka m sid da' sɛnbidiŋ la wʋʋ Zugsɔb la yɛlim si'em la, lɔɔ li m siɛn.3 Ka Zugsɔb la labaar lɛn kɛɛn m san'an na paas nɔɔr ayi' ye, 4 “Nɔkim sɛnbidiŋ kanɛ ka fʋ da' lɔɔdi fʋ siaa la mɔri keŋ Para su'a li tampiins sian'asimin.” 5 Ka m mɔri li keŋ su'a Para, wʋʋ Zugsɔb la yɛlim si'em la.
6 Dabisa bɛdegʋ nya'aŋ ka Zugsɔb la lɛn yɛlim ye, “Nannanna, kem Para nɔk sɛnbidiŋ la ka m daa yɛlif ye fʋ kem su'a la.” 7 Ka m keŋ Para tuu yis sɛnbidiŋ la man daa su'a li zin'isi'a la, amaa li daa san'am nɛ ka lɛn ka' tʋʋmmɛ.
8 Ka Zugsɔb labaar kɛɛn m san'an na ye 9 Zugsɔb la yɛl si'eli nwa ye, “Ala mɛn ka m na san'am Juda dim nɛ Jerusalem dim nyɛɛsim linɛ zu'oe hali la. 10 Nimbama anɛ bugusim dim, ka zan'as ye ba kʋ kɛlisi m pian'adɛ, ba sʋnya digilimnɛ, ka ba tʋmmi ba ya'am bɔɔd si'el, ka zɔti dɔl winsieba tʋmmi tisidi ba ka zun'odi ba. Alazug ba na nwɛnɛ sɛnbidiŋ nwa ka kʋ lɛm mɔr tʋʋmmɛ! 11 Nwɛnɛ sɛnbidiŋi lɔɔd siaa si'em la, ala ka m da nɔk Israel dim nɛ Juda dimi lɔɔm mɛŋ,” Zugsɔb la yɛl si'em la, “ye ba aan m nidib ka ba yʋ'ʋr dʋ ka nyɛ na'asi. Amaa ba pʋ kɛligida.”
Daam gan'a yɛla
12 “Yɛlimi ba ye Zugsɔb onɛ an Israel Wina'am la yɛl si'eli nwa ye, ba pɛ'ɛlim daam gan'ar wʋsa nɛ daam. Ka ba ya'a yɛlif ye, ‘Tinam mɛŋ zi' ye daam gan'ar wʋsa pɛ'ɛnnɛ nɛ daam?’ 13 Fʋn yɛlimi ba ye, Zugsɔb la yɛl si'eli nwa ye: ‘M ye m kɛnɛ ka banɛ bɛ teŋin la wʋsa lieb danuudib, la'am nɛ na'anam banɛ zin' David na'am gbauŋ zug la, nɛ maanmaannib nɛ nɔdi'esidib la'am nɛ banɛ bɛ Jerusalem la wʋsa. 14 M na nɔki ba zuti nwɛ' nɛ taaba, du'adib nɛ ba biis na tʋ'ʋs taaba.’ Zugsɔb la yɛli li. ‘M kʋ zɔɔ ba nimbaanliga. M na san'ami ba wʋsa.’ ”
Ba na gban'e ba maal yammis
15 M da yɛl nidib la ye,
Kɛlisimi ka wʋm,
da an nyɛɛsim dima
ka Zugsɔb la pian' ya.
16 Tisimi ya Zugsɔb Wina'am la girima
ka o da kɛ ka lik paae ya
ka ya nɔba da tu'usid kʋkʋna lin an lik la zugɔ.
Ya mɔri nɛɛsim ti'ir
amaa o na kɛ ka li an lik
ka tiaki li ka li lieb lik biridi.
17 Amaa ya ya'a pʋ kɛlisɛ,
m na su'a kum
ya nyɛɛsim la zug;
m na kum ka m nini mɔd,
m nini na yuod nɛ ninta'am,
bɔzugɔ, ba na gban'e Zugsɔb pɛ'ɛs la mɔri keŋ.
18 Yɛlim na'ab la nɛ o ma la ye,
“Duomi ya na'am gbana la zug,
ya na'am zupibis la,
ba na pidigi li ya zutin.”
19 Ba na yɔ tempʋbanɛ bɛ Negef la,
ka sɔ' kae na yɔ'ɔgi baa.
Ba na gban'e Juda dim wʋsa
mɔri keŋ teŋ zʋŋ.
20 Jerusalem, ʋkimi fʋ nindaa gɔs
banɛ yi ya-datiuŋʋ kenna la.
Kɔnbid banɛ ka ba nɔki tisif la bɛ yaanɛ?
Pɛ'ɛs banɛ yɛla ka fʋ dʋ'ʋsidi fʋ mɛŋ la lɛn kae?
21 Zugsɔb la ya'a kɛ ka banɛ aan fʋ zuanam la sʋ'ʋgʋf,
fʋ na yɛl ye bɔ?
Li kʋ zabif hali
wʋʋ pu'a na sa'ae?
22 Ka fʋ ya'a bu'osi fʋ mɛŋ ye,
“Bɔ ka yɛl kaŋa paae mam?”
Li anɛ fʋ tʋʋmbɛ'ɛdi zu'oe la zugʋ
kɛ ka fʋ fuug aaɛn
ka fʋ di nyan.
23 Etiopia nid na nyaŋi tiak o niŋgbinaa?
Bɛɛ wɛbaa tiak o pʋpɔnrim la?
Yanam banɛ miilim tʋʋmbɛ'ɛd la
kʋ nyaŋi tiaki tʋm tʋʋm sʋŋɔ.
24 “M na widigi ya wʋʋ udug
ka pɛbisʋg yi pipirisin na da'adi li ken.
25 Fʋ dinnɛ nwa, Jerusalem,
man gban'e ka pʋdig si'em digili fʋ la.
Li anɛ fʋn tam man yɛla
ka niŋ winsieba banɛ ka' sida yadda la zug.”
Zugsɔb la pian'ʋkʋ la.
26 “M na pidigi fʋ fuug la
ka kɛ ka ba nyɛɛ fʋ nyan,
27 fʋ dausan'auŋ nɛ pu'asan'auŋ ya'amlɛog linɛ an bɛ'ɛd la,
fʋ anɛ pu'agɔɔndir ka pʋ zɔt nyannɛ!
M nyɛ yɛlkisa banɛ ka fʋ tʋm
zuoya zug nɛ pɔɔdin la wʋsa.
Woo! Tɔɔg na paaf, Jerusalem!
Bʋndaar ka fʋ na
yii fʋ dian'ad tʋʋma la ni?”