Jeremia fabʋlʋg la yɛla
12
1 M Zugsɔba, saŋa kanɛ wʋsa ka m mɔri m pian'adi kɛɛn fʋ san'an nafʋ anɛ pʋpielim sɔb.
La'am nɛ wala m na pian' nɛ fʋ, fʋ sida la yɛla:
tʋʋmbɛ'ɛd dim la niŋ wala ka ba si'el wʋsa ken sʋ'ʋŋa?
Bɔ ka banɛ pʋ niŋ yadda la bɛ ka li malisi ba?
2 Fʋ sɛɛ ba wʋʋ tiis ka ba ba' nya'a;
ka ba nɔbig ka wal wala.
Fʋ yʋ'ʋr bɛ nɛ ba nɔɔrin,
amaa ka lɛɛ ka' ba sʋnya nii.
3 La'am nɛ wala fʋ mi'im Zugsɔba;
fʋ nyɛɛm ka kpansi m pʋtɛn'ɛr man tɛn'ɛsidi fʋ yɛla si'em.
Vuugimi ba wʋʋ pɛ'ɛs ka ba mɔrimi wa'ae ye ba kɔdig!
Yisimi ba zi'eli ba kɔn' guri ba kʋʋb daar!
4 Bʋndaar ka teŋ la na kʋdig
ka mɔɔd linɛ bɛ pɔɔdin la wʋsa kʋdigɛ?
Bʋnkɔnbid nɛ niis la wʋsa mɛlim ya
bɔzugɔ, nimbanɛ bɛɛ ani la anɛ bugusim dim.
Nidib la mɛ lɛn yɛt ye,
“O kʋ nyɛ linɛ maannɛ tii.”
Wina'am lɛbis si'em
5 “Fʋ ya'a zɔti yigin nɛ nidib ka ba kɛ ka fʋ gɛn,
fʋ na niŋ wala zɔti yigin nɛ widi?
Fʋ ya'a ken paalʋ ka tu'usida,
fʋ na niŋ wala keŋ Joodan kɔldaug gɔn'ɔsin la?
6 Fʋ mɛŋ ba'abiis nɛ fʋ mɛŋ yidimi gbi'idif.
Ba duonɛ zi'e fʋ yɛla.
Da niŋi ba yadda,
la'am nɛ ban pian'adi fʋ yɛla sʋm la.
7 M na tami m yir yɛla,
ka basim faar;
M na nɔk onɛ ka m nɔŋ la
tis o dataas.
8 M faar la yʋ'ʋn anɛ wʋʋ
gbigimi bɛ sian'arin.
Dinzug ka m kis o, ka yaa o.
9 M faar la lieb wʋʋ silʋg bɛɛ viiug
ka o bʋn-ian'ada taaba kena gilig o zabid.
Kem la'as wɛog bʋnkɔnbid wʋsa na;
mɔri ba na ka ba vɔli ba.
10 Kɔnbkemnib bɛdegʋ na san'ami m tiwanna pɔɔg la
ka ban nɛ pɛ'ɛs la nɔɔ m pɔɔg la vɛnnim;
ba na kɛ ka pɔkanɛ ka m ya'am kpɛn' hali la
lieb pipirig ka nidib kae.
11 Li sid na lieb pipirig,
teŋ la na san'am ka lieb zaalim
bɔzugɔ sɔ'ɔsɔ ba'a kʋ bɛɛ li nii.
12 Zuoya tɛɛns banɛ bɛ sian'arin la wʋsa,
banɛ san'amid na yina giligi li.
Zugsɔb zabzabidib na yina kʋ nidib,
lin naan teŋ la kpikpɛŋ yinne ti paae kpikpɛŋ yinne; sɔ' wʋsa na kpi.
13 Ba na bʋd ki, amaa ka bun gɔn'ɔs;
ba na tʋm gɛn amaa ka kʋ nyɛ si'ela.
Ala ka ba na di nyan kanɛ ka ba bun la,
man Zugsɔb la sumpɛɛn zug.”
14 Zugsɔb la yɛl si'eli nwa ye, “Ya'a kpɛlim nɛ Israel kpi'es banɛ an bugusim dim, ka faaɛn faar linɛ ka m tisim nidib Israel la, m na duoe ba yisi ba, ba mɛŋ teŋin la, ka duoe Juda dim la yisi ba sʋʋgin. 15 Amaa m ya'a ti duoe ba naae, li nya'aŋ m na lɛn zɔɔ ba nimbaanlig, ka mɔr sɔ' wʋsa lɛb o faar zin'ig nɛ o mɛŋ teŋin. 16 Ka ba ya'a baŋ ya'am ka zamisi m nidib la san'an, ka pɔ nɛ man yʋ'ʋr ye, ‘Asida sida Zugsɔb la bɛ’ wʋʋ ban daa ma' m nidib ka ba pɔ nɛ Baal yʋ'ʋr si'em la m na kɛ ka ba zin'in nɛ m nidib la. 17 Amaa buudkanɛ pʋ kɛlisɛ, m na duoe ba ka san'ami ba nyain.” Zugsɔb la yɛl si'em la.