Nɔnaar la san'am ya
11
1 Labakaŋa da yi Zugsɔb la san'anɛ kɛn Jeremia ni na ye, 2 “Kɛlisim nɔnakaŋa nar ye li dɔl si'em ka yɛl Juda dim nɛ banɛ bɛ Jerusalem la. 3 Yɛlimi ba ye Zugsɔb onɛ an Israel Wina'am la yɛl ye, ‘Nɔpɔɔr bɛ onɛ wʋsa pʋ siak nɔnakaŋa pian'ad la zugin. 4 Pian'abanɛ ka m da pian' tisi ya yaanam man da mɔri ba yi Egipt teŋin na, zin'ikanɛ nwɛnɛ bugum tita'ar kanɛ ka ba nyɛligid kʋnt la.’ M yɛli ba ye, ‘Siakimini m nɔɔr ka siak man yɛli ya si'el la, ka aan m nidib, ka m na aan ya Wina'am. 5 Ala ka m na maal man da pɔ nɔsi'a tisi ya yaanam la, m da zi'el nɔɔr ye m na tisi ba teŋ kanɛ ka bin'isim nɛ siind pʋbid, teŋ kanɛ ka ya bɛ zina la.’ ”Ka m siak ye, “Ami, Zugsɔba.”
6 Zugsɔb la da yɛlim ye, “Mɔɔlim pian'abama tis Juda tempʋʋs la nɛ Jerusalem suoraadin la ye, ‘Kɛlisimi nɔnakaŋa pian'ad la ka dɔlisi li. 7 Lin yi saŋa kanɛ ka m yisi ya yaanam Egipt teŋin la ti paae zina, m sa'ali ba ka lɛn sa'ali ba ya'as, ye, “Siakimini m nɔɔr.” 8 Amaa ba pʋ wʋm bɛɛ kɛlisɛ; ka lɛɛ dɔlli ba zukpi'euŋ tʋʋma linɛ an tʋʋmbɛ'ɛdi bɛɛ ba sʋnya ni la. M yɛli ba ye ba dɔlli m wada la, amaa ka ba zan'as ka pʋ dɔlisɛ. Ala ka m mɔr nɔpɔɔr linɛ bɛ m wada la ni wʋsa kɛɛn ba zugin na.’ ”
9 Ani ka Zugsɔb la yɛlim ye, “Juda nidib nɛ banɛ bɛ Jerusalem tempʋʋgin la gban'e nɛ man yɛla bɛ'ɛd. 10 Ba fɛndignɛ lɛbi tʋm tʋʋmbɛ'ɛd banɛ ka ba yaanam da ki'isi m nɔɔr ka tʋm la. Ba dɔlli winsieba ka pʋ'ʋsidi ba. Israel dim nɛ Juda dim wʋsa san'am nɔnaar kanɛ ka m da maal nɛ ba yaanam la.” 11 Dinzug, man Zugsɔb la yɛl si'eli nwa, “M na mɔr yɛltɔɔgʋ ba zugin na ka ba kʋ yii. Ba ya'a la'am kaasi tisim, m kʋ kɛlisi baa. 12 Juda tempʋʋs la nidib nɛ Jerusalem dim na kaasi tisi ba wina banɛ ka ba nyu'od maana nɛ bʋnnyubisa tisid la, amaa yɛltɔɔg ya'a ti paae ba, wina la kʋ sʋŋi ba baa bi'elaa. 13 Yanam Juda dima, ya mɔr wina ka ba zu'oe gaadi ya tempʋʋs, ka bimbima banɛ ka ya mɛ' ka nyu'od maana tisid Baal, win kanɛ mɔr nyan la, zu'oe gaad Jerusalem suoraad.”
14 Da sɔs winsɔsʋgʋ tis nimbama, bɛɛ sɔs suguru ba yɛlaa, bɔzugɔ ba ya'a ti bɛ sʋnsa'aŋ pʋʋgin ka buon, m kʋ kɛlisɛ.
15 Ka Zugsɔb la yɛl Juda dim la ye,
“Onɛ ka m nɔŋ la tʋm bɔɔ m pʋ'ʋsim Yin la
ka la'as nɛ nidib bɛdegʋ tʋm bɛ'ɛdɛ?
Maana banɛ ka ya maan la na yisi ya namisʋg pʋʋginɛɛ?
Ya ya'a tʋm bɛ'ɛd ya maannɛ sumalisim.”
16 Zugsɔb la buonif nɛ ye, olif tiig kanɛ nɔbigid hali
ka fʋ wala vɛnl sʋ'ʋŋa.
Amaa sisi'etita'ar ya'a da'ae
o na kɛ ka li wila la wʋsa kɔ',
ka nyu'oe li nɛ bugum.
17 Man Zugsɔb Onɛ an Paŋtita'ar Sɔb, ka sɛɛf wʋʋ tiig la, zi'el nɔɔr ye tɔɔg kɛɛn fʋ zugin na, bɔzugɔ Israel nɛ Juda dim tʋm bɛ'ɛd hali, ka duodi m sʋʋnr ban nyu'od maana tisid Baal la zug.
Ban gban'e bɛ'ɛd Jeremia yɛla la
18 Zugsɔb la nie ban gban'e si'em tisim la zug, ka m baŋi li, bɔzugɔ saŋa kan la o pa'alim ban daa bɛɛ ani niŋid si'el. 19 M nwɛnɛ pɛbil kanɛ an baanlimm ka ba mɔr o keŋ kɔdigir zin'igin; man zi' ye ba gban'e m yɛla bɛ'ɛdi yɛt ye,
“Kɛlli ka ti san'am tiig la nɛ li wala la wʋsa;
kɛlli ka ti yis o teŋ kanɛ ka vʋm bɛ la ni nyain,
ka o yʋ'ʋr kʋ lɛm pʋdig ya'asɛ.”
20 Amaa, Zugsɔb onɛ an Paŋtita'ar Sɔba,
fʋn kanɛ kat saria nɛ sida,
ka kpansid ninsaal ya'am nɛ o pʋtɛn'ɛr la,
yɔɔmi ba sam ka m nyɛ,
bɔzugɔ, fʋ ni ka m nɔki m ti'iri niŋ.
21 Dinzugɔ, Zugsɔb la yɛl si'eli nwa zaŋi keŋ Anatof dim banɛ ieedi fʋ nyɔvʋr ka yɛt ye, “Da pian'ad nɛ Zugsɔb la yʋ'ʋrɛ, ya'a ka' ala ti na kʋʋf.” 22 Dinzugɔ, Zugsɔb Onɛ an Paŋtita'ar Sɔb la yɛl si'eli nwa ye, “M na namisi ba. Ba na'akim na kpi zaba ni, ka kɔ'ɔm na kʋʋ ba biribis nɛ ba bipumis. 23 Ba nid baa yinne kʋ kpɛlim, bɔzugɔ, m na mɔr yɛltɔɔg na ziil Anatof teŋ dim yʋʋm kanɛ ka ba na ti nyɛ namisʋg la.”