Wina'am nɛ bada yɛla
“Da zamisidi suoya banɛ ka buudsieba dɔl la,
bɛɛ dabiem mɔri ya nɛ zanbina banɛ bɛ saŋgbauŋin la,
la'am nɛ buudsieba ɛɛnti nyɛɛ li ka zɔt dabiem la.
3 Nidib la malima ka' gbinnɛ;
ba ɛɛnti keŋ nɛ sian'arin nwaae tiigi mɔri kena,
ka onɛ mi' kpi'eb kpi'e li nɛ o lieŋ.
4 Ka ba nɔk anzurifa nɛ sanlima bʋligi li ka li vɛnl;
ka nɔk hamma kpa' li nɛ kpa'asi tabil
ka li kʋ lii.
5 Li nwɛnɛ daug ka ba nɔki sɛ
ka ya'al fuug ye li kad niis pɔɔgin.
Ba bada la kʋ nyaŋi pian';
asɛɛ ka ba zii ba
bɔzugɔ ba kʋ nyaŋi keŋɛ.
Da zɔti baa;
ba kʋ nyaŋi tʋmif bɛ'ɛd
bɛɛ ba tʋm sʋ'ʋm tisi fɔ.”
6 Jeremia da lɛbisi yɛl ye,
Sɔ' kae nwɛnɛ fʋnɛ, oo Zugsɔba;
fʋ zu'oya
ka fʋ yʋ'ʋr la an yʋ'ʋtita'ar ka mɔr paŋ.
7 Anɔ'ɔnɛ kʋ na'asi fɔ,
fʋn kanɛ an buudi wʋsa Na'aba?
Fʋnɛ nar nɛ na'asi.
Ya'am dim banɛ bɛ buudi ni la wʋsa
nɛ ba sʋ'ʋlim wʋsa,
sɔ' lɛn kae nwɛnɛ fʋ.
8 Ba wʋsa ka' ya'am ka an zɔn;
bada banɛ an daad ka ka' gban'ar la pa'annɛ ba.
9 Anzurifa linɛ ka ba kʋnt la yinɛ Tarsis teŋin na
ka sanlima yinɛ Yufas teŋin na.
Banɛ kpi'ed nɛ banɛ kʋnt sanlima maali ba,
ka ba nɔk nɛ pien kanɛ an bʋlʋ
nɛ fuzɛn'ugʋ yɛɛli li,
banɛ mi' tʋʋma la maali ba wʋsa.
10 Amaa Zugsɔb la an sida Wina'am,
o anɛ Wina'am kanɛ vʋe, ka an Na'akanɛ bɛ saŋa wʋsa.
O sʋnf ya'a pɛlig, teŋgbauŋ la dammidnɛ;
o sʋʋnr ya'a duoe, buudi kae na nyaŋi zi'enɛ.
11 Yɛlimi ba ye, “Wina nwa pʋ maal agɔla nɛ teŋgbauŋ la, alazug, ba na mɛlim teŋgbauŋ nwa zug nɛ teŋ teŋir sa.”
12 Amaa Wina'am maal teŋ la nɛ o mɛŋ paŋ;
o mɛŋ ya'am ka o nɔki maal dunia la
o mɛŋi gban'e li gbin si'em la ka o tiɛn saŋgbana la.
13 O ya'a tans, ku'om linɛ bɛɛ agɔl la gudigidnɛ;
o maal saŋgbana ka li pin'il teŋgbauŋ la bɛnnɛ dʋ.
Onɛ kɛ ka saa nɛ sa-ian'asʋg bɛ
ka yisid sisi'em o la'ad dɔɔdin na.
14 Sɔ' wʋsa anɛ zɔlʋg ka mɛ pʋ mɔr baŋirɛ;
banɛ kʋnt sanlima la wʋsa di nyannɛ ba bada la zug.
Bada dimi maan si'el la anɛ ziri;
ba mɛŋ pʋ mɔr vʋ'ʋsʋm.
15 Ba ka' vɔɔnrɛ, ba anɛ linɛ mɔr la'adi tis nidib.
Ba sariakadib saŋa ya'a ti paae, ba na bɔdig.
16 Onɛ an Jakob yaas Wina'am la pʋ nwɛnɛ bama.
Onɛ maal si'el wʋsa,
la'am nɛ Israel wʋsa, buudbanɛ an o faar la,
o yʋ'ʋri buon Zugsɔb onɛ an Paŋtita'ar Sɔb la.
San'auŋ kenna
17 La'asimi ya la'ad wʋsa yi teŋin la,
yanam banɛ ka ya dataas lɔbi giligidi ya la.
18 Zugsɔb la yɛl si'eli nwa:
“Saŋa kaŋa m na nɔk banɛ bɛ teŋ kaŋa ni la
lɔbi ba bas.
M na kɛ ka ba paam sʋnsa'aŋ hali,
ka ba dataas gban'e ba.”
19 Tɔɔg paam, m sapu'ad la zug!
M pu'alʋŋ la kʋ bɔdigɛ!
La'am nɛ wala m yɛli m mɛŋ ye,
“Nɛ' anɛ m ban'as, asɛɛ ka m mɔdig nɛ li.”
20 M Fuug Sʋgʋr san'am ya;
li nwiis la wʋsa kɛns ya,
m biis wʋsa kpiya, ka lɛn kae;
sɔ' lɛn kae na ti' m Fuug Sʋgʋr la tisi ma,
bɛɛ maali m gbɛɛnsirɛ.
21 Kɔnbkemnib la pʋ mɔr ya'am,
ka mɛ pʋ sɔsid Zugsɔb la;
alazug ka ba pʋ nyɛt si'ela
ka ba kɔnbid wʋsa widig.
22 Kɛlisim! Labaar la kenna,
daamʋg tita'ar yi ya-datiuŋʋ kenna!
Li na kɛ ka Juda tempʋʋs la kpɛlim zaalim,
ka lieb wɛog bʋnkɔnbid zin'ig.
Jeremia winsɔsʋg
23 O Zugsɔba, m mi' ye, ninsaal nyɔvʋr ka' o mɛŋ dinnɛ;
ninsaal kʋ nyaŋi baŋ o mɛŋ nɔbir yakiri zi'en si'em.
24 Zugsɔba, pa'alimi m gbɛlʋŋ, amaa kɛl ka li dɔl sida
ka ka' fʋ sʋnpɛɛn saŋa,
ya'a ka' ala fʋ na kɛ ka m lieb zaalim.
25 Kpa'ami fʋ sʋnpɛɛn la yɛɛl buudi la,
kpan'am yɛɛl banɛ ba'a ka' nɛf la,
nɛ banɛ pʋ buonnɛ fʋ yʋ'ʋr la.
Ba kʋ Jakob nidib la naae
ba li' ba nɛ nyain
ka san'ami ba teŋ la wʋsa.