9
1 M da lɛn yɛl ye,“Oi, m zug ya'a bunnin ku'om
ka m nini yit ninta'am ka pʋ gu'oda!
M naan kumin nintaŋ nɛ yʋ'ʋŋ wʋsa
m nimbanɛ ka ba kʋ la yɛla.
2 O, m ya'a mɔrin suokennib sʋgʋr
ka li bɛ pipirisin la, ka m na kpɛn' ani;
m naan basini m nidib la
ka tɔɔm ka basi ba;
ba wʋsa anɛ banɛ an dapgɔɔnda nɛ pu'agɔɔnda,
ba anɛ nimbanɛ zu'oe ka ka' sida dima.”
3 Zugsɔb yɛl ye,
“Ba gʋdi ba zilima wʋʋ tiraug nɛ,
bɔɔd ye ba fa faad.
Ba kpi'euŋ kanɛ ka ba mɔr teŋ la zug la
yinɛ dama'amin na.
Ba tʋmnɛ tʋʋmbɛ'ɛd yinne lɔ'ɔŋid tʋʋmbɛ'ɛd yinne;
ba pʋ tɛn'ɛsidi m yɛllɛ.”
Zugsɔb la yɛl si'em la.
4 “Baŋimi fʋ zuanam la yɛla;
da tisi fʋ ba'abiis la sidaa.
Ba'abiig wʋsa anɛ dama'am sɔb,
ka zua wʋsa an yʋ'ʋsan'auŋ sɔb.
5 Zua ma'adi zua,
ka sɔ' kae pian'ad sidaa.
Ba pa'ali ba zilima la faad;
ka tʋm tʋʋmbɛ'ɛd hali ka li galis.
6 Fʋ bɛ nɛ ziri dim sʋʋgin;
ba sida ka'alim la zug ka ba pʋ bɔɔdi m yɛla,”
Zugsɔb la yɛl si'em la.
7 Dinzugɔ, Zugsɔb onɛ an Paŋtita'ar Sɔb la yɛl si'eli nwa ye:
“Gɔsima, m na nyɛligi ba wʋʋ sanlima nɛ maki ba gɔs.
Ya'a ka' ala, m nidib la tʋʋmbɛ'ɛdi zu'oe si'em la
m ye m niŋ wala ya'asɛ?
8 Ba zilim nwɛnɛ piim yabid nɛ;
ka ba pian'ad nɛ ziri;
sɔ' wʋsa pian'ad o kpi'a wʋʋ ba mɔri nɔɔr yinne,
amaa o sʋʋnrin la ka o bɛnt o baans.
9 Zugsɔb la yɛl ye,
Li pʋ nar ye m namisi ba nɛ'ɛŋa yɛlaa?”
“Buudkaŋa an si'em nwa la,
li pʋ sʋm ye m yɔ samme m mɛŋaa?”
10 Ka m yɛl ye,
“M na kum ka kaas zuoya la yɛla
ka maal sʋnsa'aŋ nɛ yaama linɛ bɛ pipirisin la yɛla.
Ba kʋdig nɛ nwɛnɛ bugum kanb, ka sɔ' pʋ lɛn dɔl ani,
sɔ' mɛ pʋ lɛn wʋm niigi bʋʋlʋgɔ.
Niis banɛ ian'ad agɔla la ianki lalig
ka bʋnkɔnbid la mɛ gaad.”
11 Ka Zugsɔb la lɛbis ye,
“M na kɛ ka Jerusalem wʋsa lieb dabɔɔd,
ka wɛbaas na gbɛɛnd ani.
M na san'am Juda sʋ'ʋlim tempʋʋs wʋsa
ka sɔ' kʋ lɛn kpɛlim ani.”
12 M bu'os ye, “Ninkan bɛ ya ka o ya'am sia'al ka o na gban'e nɛ' gbinnɛ? Anɔ'ɔn ka Zugsɔb la zamis o ka o na pa'ali li gbinnɛ? Bɔ ka teŋ la san'am ka dig wʋʋ pipirig nɛ ka sɔ' kʋ nyaŋi dɔlli gaadɛ?”
13 Ka Zugsɔb la lɛbis ye, “Li anɛ ban zan'as man wada kanɛ ka m tisi ba la zug; ba pʋ siaki m nɔɔr bɛɛ dɔlli m wada la. 14 Ba lɛɛ gban'e nɛ ba sʋnya ni, ka dɔlli ba mɛŋ zukpi'euŋ tʋʋma; ka dɔl Baalnam wʋʋ ba yaanamɛ pa'ali ba si'em la.” 15 Dinzugɔ, Zugsɔb onɛ an Paŋtita'ar Sɔb la, onɛ an Israel dim Wina'am la, yɛl si'eli nwa ye: “Gɔsima, m na kɛ ka nimbama di ditɔɔg ka nu yabid ku'om. 16 M na widigi ba kpɛn'ɛs buudsieba ni, banɛ ka ban, bɛɛ ba yaanam pʋn zi', ka na nɔk zaba sʋ'ʋraugʋ kadi ba hali nɛ man na ti san'ami ba wʋsa naae.”
17 Zugsɔb onɛ an Paŋtita'ar Sɔb la yɛl si'eli nwa ye,
“Tɛn'ɛsimi nannanna!
Buolim pu'ab banɛ tʋʋmmi an kʋʋr kaasig la ka ba kena;
la'asimi banɛ mi' baamʋg hali la na.”
18 Ka nidib la lɛbisi yɛl ye,
“Kɛl ka ba kɛn tɔ'ɔtɔ na
kaasi tisi ti!
Ka ti nini wʋsa ti yit ninta'am
ka ti nimbielim wʋsa pʋbid ku'om.
19 Ti wʋm kaasig Zion teŋin, ye,
‘San'auŋ paae ti!
Ti nyan la zu'oe nɛ!
Asɛɛ ka ti basi ti teŋ la
bɔzugɔ ti ya' la liebnɛ dabɔɔd.’ ”
20 Ka m yɛl ye,
Nannanna, pu'abaa, wʋmmi Zugsɔb la pian'ad;
yɔ'ɔgimi ya tʋba kɛlis o nɔɔr pian'ad.
Pa'alimi ya bipumis la ban na kaas kʋʋr si'em;
pa'alimi taaba sʋnsa'aŋ yʋʋma, ka ba yʋ'ʋm ye,
21 Akum dʋʋ ti takoronamin kpɛn' na
ka kpɛn' ti kpi'euŋ zin'isin na;
o naae ti biis suoraadin
nɛ ti na'akim la nidib la'asʋg zin'isin.
22 Yɛlim ye, Zugsɔb la yɛl si'em la ye,
“Ninkpiilima la na digi ala
wʋʋ sa'ad ka ba vaae bas paalʋ,
ka nwɛnɛ kikan'a ka ba bun ka bas nya'aŋ,
ka sɔ' kae na la'asi baa.
23 Zugsɔb la yɛl si'eli nwa ye:
‘Da kɛ ka ya'am dim dʋ'ʋsi ba mɛŋi ba ya'am la zugɔ,
bɛɛ banɛ mɔr paŋ la dʋ'ʋsi ba mɛŋi ban mɔr paŋ la zugɔ;
bɛɛ kpan'am sɔb mɛ dʋ'ʋs o mɛŋ o kpan'am la zugɔ.
24 Amaa kɛl ka onɛ bɔɔd ye o nwɛ' nyɔ'ɔg on nwɛ'ɛm nyɔ'ɔg nɛ' yɛla:
ye o gban'e li gbin ka baŋ mam,
ye manɛ an Zugsɔb la, ka tʋm linɛ an sʋm
ka tʋm sida nɛ pʋpielim teŋgbauŋ nwa zug:
nɛ'ɛnam ka m bɔɔd.’
Zugsɔb la yɛl si'em la.”