8
1 Zugsɔb la yɛl ye, “Saŋa kan ya'a ti paae, ba na lɛɛg Juda na'anam nɛ ba kpɛɛmnam kɔnba, nɛ maanmaannib nɛ nɔdi'esidib nɛ Jerusalem nidib wʋsa kɔnba yii ba yaadin. 2 Ba na yisi ba kɔnba dɛlig paalʋ tis winnig nɛ nwadig nɛ nwadbibis banɛ bɛɛ agɔla la, bɔzugɔ bʋmbama ka ba nɔŋ ka tʋmmi tisidi ba, ka mɛ dɔl ka pʋ'ʋsidi ba. Ba kʋ la'asi ba kɔnba la gumm bɛɛ mumi ba, amaa ba na dig teŋin wʋʋ sa'ad nɛ. 3 Zin'ikanɛ wʋsa ka m kadi ba yis, banɛ kpɛlim la na bɔɔd ye ba ya'a kpiin an sʋm gat ban vʋe la.” Zugsɔb onɛ an Paŋtita'ar Sɔb la pian'ʋkʋ nwa.Tʋʋmbɛ'ɛd nɛ namisʋg
4 Zugsɔb la yɛlim ye, m yɛlimi ba ye Zugsɔb la yɛl si'eli nwa:
“Nidib ya'a li, ba pʋ lɛn duodaa?
Sɔ' ya'a yidig suorɛ, o pʋ lɛn lɛbidaa?
5 Ka bɔ ka nimbama fɛndigɛ?
Bɔ ka Jerusalem fɛndigid saŋa wʋsa?
Ba nɔknɛ faadi lusi ba mɛŋ
ka zan'as lɛbig na.
6 M kɛlis sʋ'ʋŋa,
amaa ba pʋ pian' linɛ dɔl suorɛ.
Sɔ' pʋ tiaki yii o bugusim la nii,
ka yɛt ye, ‘M maal bɔ?’
Sɔ' wʋsa mɔɔdnɛ o mɔɔr
wʋʋ tanp widi nini na mu'oe zaba ni si'em la.
7 Hali adaalʋŋ kanɛ ian'ad agɔla la
mi' o ken saŋa,
ka dawana nɛ niis buudi wʋsa
kpansi mi' saŋa kanɛ ka ba na ianki tɔɔm zin'ig.
Amaa man nidib la zi' si'ela
ka pʋ baŋ man Zugsɔb la bɔɔdim.
8 Ya na niŋ wala yɛl ye, ‘Tinam mɔr ya'am,
bɔzugɔ tinam mɔr Zugsɔb la wada,’
ka ya pa'annib banɛ pa'an wada la
pʋ sɔbi li nɛ sida tisi ya?
9 Ya'am dim la na di nyan;
li na libigi ba ka gban'e ba wʋʋ baŋ nɛ.
Ban sadigim zan'as Zugsɔb pian'ad la,
ya'am bɔ ka ba mɔra?
10 Dinzugɔ, m na nɔki ba pu'ab la tis dap sieba
ka nɔki ba pɔɔd la tis ninsieba ka ba sʋ'ʋgi li.
Lin yii ba tadimnamin ti paae ba kpi'emnam
la wʋsa mɔri fufum ka mɔɔd ye ba paam;
maanmaannib nɛ nɔdi'esidib la
wʋsa anɛ ziri dim.
11 Ba piesidnɛ m nidib la sapu'ad wʋʋ li pʋ zabida.
Ba yɛt ye, ‘Sumbʋgʋsʋm, sumbʋgʋsʋm!’
Ka sumbʋgʋsʋm lɛɛ kae.
12 Ba pʋ zɔti ba itʋŋ bɛ'ɛd la nyannɛɛ?
Ayei, ba zi' nyan baa bi'elaa;
ba pʋn zi' linɛ yʋ'ʋri buon nyannɛ.
Alazug ba na kpii paas banɛ kpi la zug;
ba ya'a ti nyɛ namisʋg ba na sie.”
Zugsɔb la yɛl.
13 “M na faaɛn ba zʋʋd.
Ba vain tiis la kʋ lɛn walɛ.
Wala kʋ lɛm bɛ tiig zugɔ,
ka li vaand na sʋʋg.
Man tisi ba si'el la
ba na faaɛn ka kɛɛ ba.”
Zugsɔb la yɛl si'em la.
14 Nidib la bu'os ye, “Bɔ ka ti zin' kpɛla?
La'asimi taaba!
Kɛlli ka ti zɔɔ keŋ kpɛn'
tempʋkpi'ema la ni lɛɛ kpii ani!
Bɔzugɔ Zugsɔb la pʋn kʋʋsi ti bɛ'ɛd ye ti kpi
ka tisi ti yabid ku'om ye ti nu,
tinamɛ tʋm tʋʋmbɛ'ɛdi pɔ'ɔg o la zug.
15 Ti mɔr ti'ir ye sumbʋgʋsʋm na bɛ
amaa bʋnsʋŋ pʋ yi naa.
Ti tɛn'ɛsid ye li na anɛ laafi saŋa
amaa li anɛ tɔɔg ma'aa.
16 Dataas la widi nɔɔd nɛ paŋ
ka ti wʋmi ba dammir hali Dan teŋin sa;
ba anɛ wiedbɛda ken nɛ kpi'euŋ
ka teŋ la wʋsa dammid.
Ba kena ye ba san'am teŋ la
nɛ linɛ bɛɛ li pʋʋgin wʋsa,
ba na san'am tempʋʋg la
nɛ nimbanɛ bɛɛ ani la wʋsa.”
17 “Gɔsima, m na tʋm wa'abɛ'ɛdnamɛ ya sʋʋgin,
wa'abanɛ ka ya tima dim kʋ nyaŋi ba,
ka ba na dumi ya.”
Zugsɔb la yɛl si'em la.
18 Ka m yɛl ye,
“Zugsɔba, fʋnɛ bʋgʋnnɛ m sʋʋnr,
m sʋnf wʋsa san'am nɛ.
19 M nidib la bɛ nɛ teŋ lallisa kaasid;
kɛlisim ban kaasid si'em ye,
‘Zugsɔb la lɛn ka' Zion teŋinɛɛ?
Zion Na'ab lɛn ka' anii?’ ”
Ka Zugsɔb la lɛbis ye,
“Bɔ ka ba duodi m sʋnf nɛ linɛ ka ba ya'ab,
nɛ teŋ zʋna bada linɛ ka' gbin la?”
20 Ba yɛt ye,
“Bunib saŋa gaad ya,
sapal gaad ya,
ka ti nam pʋ nyɛ yɔlisim.”
21 Ka Jeremia ye,
“M nidib la bɛ namisʋg pʋʋgin la
mam mɛ bɛ nɛ namisʋg pʋʋgin.
M kummi nɛ sʋnsa'aŋ ka li zabidim.
22 Kpaam linɛ ma'ad zabir ka' Gilead teŋinɛɛ?
Du'ata ka' anii?
Bɔ ka m nidib banɛ pu'alim la pʋ nyɛ laafi?”