Jeremia 7

Pʋ'ʋsim linɛ ka' gbinnɛ

1 Labakaŋa yi Zugsɔb la nii kɛn Jeremia san'an na, 2 ye, “Zi'enim Zugsɔb Yir la za'anɔɔrin ka mɔɔl labakaŋa:

“ ‘Wʋmmi Zugsɔb la labaar, yanam Juda nidib wʋsa banɛ kpɛn'ɛd za'anɔbama nii na'asid Zugsɔb la.’ ” 3 Zugsɔb onɛ an Paŋtita'ar Sɔb ka an Israel Wina'am la yɛl si'eli nwa ye: Tiakimi ya suoya nɛ ya itʋŋ, ka m na kɛ ka ya bɛ kpɛla. 4 Da niŋi pian'ad linɛ an ziri la yadda ka ye, “Zugsɔb la Yiri nwa, Zugsɔb la Yiri nwa, Zugsɔb la Yiri nwa!” 5 Ya ya'a sid tiaki ya suoya nɛ ya itʋŋ ka dɔl taaba nɛ sida, 6 ka pʋ mugusid saam nɛ kpiibis nɛ pʋkɔnya, ka mɛ pʋ kʋʋd nidib zaalim-zaalim zin'ikaŋa, ka mɛ pʋ dɔl winsieba san'ami ya mɛŋa, 7 ala ka m na kɛ ka ya bɛ teŋ kanɛ ka m da nɔki tisi ya yaanam ye li aan ba din saŋa wʋsa la ni. 8 Amaa gɔsima, ya tis ziri pian'ad linɛ ka' gbin la sida.

9 “Ya na zuud ka kʋʋd ka dap nɛ pu'ab san'amid taaba, ka pɔɔd nɛ wina banɛ ka' sida la, ka nyu'od bʋnnyubisa nɛ maana tisid Baal ka dɔl wina banɛ ka ya da zi', 10 ka lɛn kena zi'en man tuon yikaŋa linɛ ka man yʋ'ʋr bɛɛ li ni la yɛt ye, ‘Ti nyɛ yɔlisim.’ Ya nyɛɛ ya mɛŋ nɛ ye ya tʋm yɛlkisa banɛ ka ya tʋm laa? Ala dɔl suorɛɛ? 11 Yikanɛ ka man yʋ'ʋr bɛɛ li ni la liebnɛ faandib suak yiri tisi yaa? Amaa man nan gɔsidi ya nɛ kii.” Zugsɔb la yɛl si'em la.

12 Ka lɛn yɛl ye, “Kem Siilo zin'ikanɛ ka m da dɛŋi kɛ ka m yʋ'ʋr bɛɛ anina la, ka gɔs man maali li si'em m nidib Israel dim bugusim la zug. 13 Yanamɛ daa maan nwa' la wʋsa m daa pian' tisi ya taki tak amaa ka ya pʋ kɛlisɛ; m buoli ya ka ya pʋ siakɛ.” Zugsɔb la yɛl si'em la. 14 “Dinzug, man daa niŋ Siilo si'em la, nannanna m mɛ na niŋ yikanɛ ka m yʋ'ʋr bɛ la nɛ zin'ikanɛ ka ya ti'ir bɛ ka m tisi ya nɛ ya yaanam la ala mɛn. 15 M na yisi ya m san'an wʋʋ man niŋi ya ba'abiis Efiram dim si'em la.”

16 Zugsɔb la yɛlim ye, “Alazug, da sɔs winsɔsʋgʋ tis nimbama, bɛɛ sɔs suguru tisi baa, bɛɛ fʋ zi'enɛ pian' ba yɛlaa, ka m kʋ wʋm tisi fɔ. 17 Fʋ pʋ nyɛ ban tʋm si'el Juda tempʋʋsin nɛ Jerusalem suoraadin laa? 18 Biis la la'asid daad ka ba saamnam la nyu'od bugum ka pu'ab la nɔn zɔm maan bodobodo tisid win kanɛ ka ba buon ‘Arezana Pu'ana'ab’ la, ka lɛm mɔr daam tisid winsieba ka li pɛligidi m sʋnf. 19 Li anɛ man sʋʋnr ka ba duodaa? Li ka'anɛ ba mɛŋ ka ba maan bɛ'ɛd, ka diisidi ba mɛŋ nyannɛɛ?” Zugsɔb la yɛl si'em la.

20 Dinzugɔ Zugsɔb onɛ an Paŋtita'ar Sɔb la yɛl si'eli nwa ye: “M sʋnpɛɛn la wʋsa na bu'oe niŋ zin'ikaŋa. M na niŋi li ninsaalib nɛ bʋnkɔnbid nɛ tiis nɛ bʋnwanna linɛ bɛ teŋin la, ka li na dit wʋʋ bugum ka pʋ kpiisida.”

21 Nɛ'ɛŋa an linɛ ka Zugsɔb onɛ an Paŋtita'ar Sɔb ka an Israel Wina'am la yɛl ye, “Kemi tuon nɛ ya nyu'or maana, nɛ maana banɛ bɛ la wʋsa, ka ɔnbi li ni'im! 22 Man da mɔri ya yaanamɛ yi Egipt na ka pian' tisi ba la, m da pʋ tisi ba nɔɔr ye ba da maal nyu'or maana, nɛ maana banɛ bɛ, ma'aanɛ; 23 amaa m da tisi ba nɛ nɔkaŋa ye, ‘Siakimini m nɔɔr ka m aan ya Wina'am, ka yanam na aan m nidib. Dɔlli suobanɛ ka m tisi ya la, ka si'el wʋsa na an sʋ'ʋŋa tisi ya.’ 24 Amaa ba da pʋ wʋmi m pian'ad bɛɛ kɛligɛ. Ba lɛɛ da dɔlli ba zukpi'euŋ nɛ ba pʋtɛn'ɛbɛ'ɛd la. Ba da lɛbidi nya'aŋ ka pʋ ken tuonnɛ. 25  Lin yi saŋa kanɛ ka ya yaanam da yi Egipt la ti paae nannanna, m tʋmmi m nɔdi'esidib dabisir wʋsa nɛ saŋa wʋsa. 26 Amaa ba pʋ wʋmi m pian'ad bɛɛ kɛlisɛ. Ba anɛ zukpi'euŋ dim ka tʋm tʋʋmbɛ'ɛdi gaadi ba yaanam.”

27 Ka o yɛlim ye, “Fʋ ya'a yɛli ba nɛ'ɛnam, ba kʋ kɛlisi fʋ pian'adɛ; fʋ ya'a buoli ba, ba kʋ siakɛ. 28 Dinzug yɛlimi ba ye, ‘Buudkaŋa zan'as Zugsɔb Wina'am la nɔɔr ka mɛ pʋ siak sa'alʋgɔ. Sida bɔdig ya; li naae ba nɔŋgbana ni. 29 Kiesimi ya zuobid la lɔbi bas; ka kaasidi dɔl zuoya nɛ pipirisin la ken, bɔzugɔ Zugsɔb la zan'as zʋmaaŋ kaŋa ka basi ba, ban kɛ ka o sʋnf duoe la zug.’ ”

Ninkʋʋr bɔn'ɔg

30 Zugsɔb la yɛl ye, “Juda dim la tʋm tʋʋmbɛ'ɛd man tuon. Ba zi'eli ba bada banɛ an bʋnkisa la Yikanɛ ka man yʋ'ʋr bɛɛ ani la kɛ ka li lieb dian'ad. Zugsɔb la yɛl si'em la. 31  Ba mɛɛ ba maana malʋŋ zin'is linɛ buon Tofet ka bɛ Ben Hinnom Biis Bɔn'ɔgin la, ye ba nyu'oe ba biribis nɛ ba bipumis la m maal maana linɛ ka mam pʋ tisi ba nɔɔr bɛɛ li bɛ m pʋtɛn'ɛrinɛ.” 32 Zugsɔb la yɛl si'em la. “Baŋimi ka dabisa kenna, ka nidib kʋ lɛm buonnɛ li ye Tofet bɛɛ Ben Hinnom Biis Bɔn'ɔgɔ, amaa ba na buon ye, kʋʋb Bɔn'ɔg bɔzugɔ, ba na mum nimbanɛ ka ba kʋ la anina hali ka paalʋ ti naae nyain. 33 Nimbanɛ kpi nwa niŋgbiŋ na lieb diibi tis niis banɛ ian'ad agɔla la nɛ bʋnkɔnbid banɛ bɛ mɔɔgin la, ka sɔ' kae na kadi ba ka ba keŋɛ. 34 M na kɛ ka sumalisim tʋkpiidʋg linɛ ka ba maan la naae, ka ba kʋ lɛn wʋm dau nɛ o pu'apaal kʋkɔya Juda tempʋʋsin nɛ Jerusalem suoraadin la, teŋ la na ti lieb zaalim la zug.”