Ban gilig Jerusalem la yɛla
6
1 Zugsɔb la yɛl ye,“Benjamin nidiba, zɔm faaɛn ya mɛŋ!
Zɔm yii Jerusalem!
Piebimi na'atan Tekoa teŋin!
Kɛl ka Bet-Hakɛrem dim baŋ!
Tɔɔgʋ yi ya-datiuŋʋ kenna la yɛla,
li ye li anɛ san'auŋ tita'ar hali.
2 Zion teŋ nwɛnɛ pu'asadvɛnliŋ,
Amaa la'am nɛ wala m na san'am o.
3 Dataas na kena wʋʋ kɔnbkemnib nɛ giligi ba;
ba na ti' ba sʋga gilig o,
ka sɔ' wʋsa na ti' o sʋgʋr on bɔɔd zin'isi'a.
4 Ba na yɛt ye, ‘Ti'ebim zab nɛ o!
Duomi, kɛl ka ti zab nɛ ba nintaŋ tisʋʋs!
Winnig la bɔɔdi liig, ka zaam bɔɔd ma'ar.
5 Dinzug duomi, ka ti keŋ yʋ'ʋŋʋ zab nɛ o
ka san'am o kpi'euŋ zin'is la wʋsa!’ ”
6 Zugsɔb onɛ an Paŋtita'ar Sɔb la yɛl si'eli nwa ye:
“Nwaamɛ tiis la
ka maal datti gilig Jerusalem zaŋguoma.
Asɛɛ tempʋkaŋa nyɛ namisʋg;
li pɛ'ɛli nɛ mugusʋg.
7 Bulig ku'om bun si'em la,
ala ka o bugusim la mɛ yit na.
Zaba nɛ san'auŋ pʋtɛn'ɛr ma'aa bɛɛ o ni;
o ban'as nɛ o sapu'ad la bɛ nɛ m tuon saŋa wʋsa.
8 Di'em nimmua sa'alʋg, O Jerusalem,
ya'a ka' ala, m na fɛndig ka basif,
ka kɛ ka fʋ teŋ la kpɛlim zaalim
ka sɔ' kʋ lɛn nyaŋi bɛ teŋ la pʋʋginɛ.”
9 Zugsɔb onɛ an Paŋtita'ar Sɔb la yɛl si'eli nwa ye:
“Kɛl ka ba wi'is Israel dim banɛ kpɛlim la sʋ'ʋŋa
wʋʋ vain tiis wala ka ba wi'isid si'em la:
nɔkim nu'ugʋ tʋm wila la ni ya'as,
wʋʋ sɔ' na pɔn'ɔd wala banɛ ka ba yaa bas si'em la.”
10 Anɔ'ɔn ka m na lɛm pian' tis ka sa'al o nɛ nimmua?
Anɔ'ɔnɛ na kɛlisi m pian'adɛ?
Ba tʋba li' nɛ
ka ba pʋ wʋmma.
Zugsɔb labaar la anɛ linɛ zabidi ba;
ka ba pʋ mɔr ya'amlɛog nɛ li.
11 Amaa Zugsɔb la sʋnpɛɛn pɛ'ɛli m san'an,
ka m kʋ nyaŋi mɔri lii.
“Alaa, ka kpa'ami li niŋ biis banɛ bɛ suoraadin la,
nɛ na'akim banɛ la'as taaba la!
Li na paae dap nɛ ba pu'ab wʋsa,
la'am nɛ bʋnkʋt nɛ pu'anya'as wʋsa.
12 M sʋnf ya'a ti pɛlig
ka m ʋki m nu'ugʋ kpa' banɛ bɛ teŋin la,
ba na faaɛn ba ya' la tis sieba,
la'am nɛ ba pɔɔd nɛ ba pu'ab”
Zugsɔb la yɛl si'em la.
13 “Lin yii ba tadimnamin ti paae ba kpi'emnam la,
ba wʋsa anɛ fufum dim ka mɔɔdi ba mɛŋ yɛla ma'aa;
nɔdi'esidib nɛ maanmaannib la mɛ anɛ ala,
ba wʋsa anɛ ziri dim.
14 Ba piesidi m nidib la sapu'ad la nɛ m ba'a kae piesʋg
ka ma' yɛt ye sumbʋgʋsʋm, sumbʋgʋsʋm,
ka sumbʋgʋsʋm mɛ kae.
15 Ba ya'a zɔt nyan nɛ ba tʋʋmyaalis la yɛla?
Ayei, ba zi' nyan baa bi'elaa;
hali ba zug pʋ ziida.
Alazugɔ, ba na kpii paas banɛ kpi la zug;
m ya'a ti namisi ba, ba na sie ba teŋin.”
Zugsɔb la yɛl.
16 Zugsɔb la yɛl si'eli nwa ye:
“Zi'enimi suokita la ni ka gɔs;
bu'osim yʋʋmpʋkʋda suokʋda la yɛla,
bu'osim suosʋŋ la bɛ zin'isi'a ka dɔlli li,
ka ya siis na paam yɔlisim.”
Amaa ya yɛl ye, “Tinam kʋ dɔlli li zugɔ.”
17 “M gaŋ sieba ye ba guri ya ka yɛl ye,
‘Kɛlisim na'atan la piebʋg!’
Amaa ya yɛl ye, ‘Tinam kʋ kɛlisɛ.’
18 Dinzugɔ, buudi woo kɛlisimi;
kasɛtiba, kpansimi ka gɔs linɛ na niŋi ba.
19 Teŋgbauŋɔ, wʋmma!
M mɔri tɔɔgʋ ken nimbama zugin na,
ba tʋʋmbɛ'ɛd la yɔɔdi la.
Bɔzugɔ, ba pʋ kɛlisi m pian'adɛ
ka zan'asi m wada la.
20 Bɔ ka Seeba teŋ bʋnnyubisa la yɛla paki ma
bɛɛ bʋnnyubisa banɛ yi teŋ lalli la?
Mam kʋ di'e ya nyu'or maana la;
ya maana la wʋsa pʋ ma'adi m sʋʋnrɛ.”
21 Dinzug, Zugsɔb la yɛl si'eli nwa ye,
“M na bɔ si'elnamɛ digil nimbama tuon.
Ka ba saamnam nɛ ba biis wʋsa na tu'usidi lit;
ka ba kpi'es nɛ ba zuanam wʋsa na kpi.”
22 Zugsɔb la yɛl si'eli nwa ye:
“Gɔsima, tanp kenna,
ba yinɛ ya-datiuŋʋ kenna;
teŋ tita'ar nidib sʋnf duoe nɛ ya
ka ba yi teŋgbauŋ la kpikpɛŋi kenna.
23 Ba bɔbnɛ nɛ tiraad nɛ kpana;
ba anɛ bugusim dim ka pʋ zɔt nimbaanliga.
Ba ban'adi ba widi la,
ba vuudi nwɛnɛ atɛuk ku'om
n kenna nwɛnɛ banɛ yi tanp nwɛ'ɛb nɛ
ye ba zab nɛ yanam Zion dim.”
24 Ti wʋmi ba yɛla ka ti nu'us kpi.
Ti sʋnya san'am ya, ka li zabidi ti
nwɛnɛ pu'a na sa'ae bɔɔd du'am.
25 Da yi paalʋ bɛɛ ya dɔl suoyaa,
ka dataa la mɔr zaba sʋ'ʋg,
ka dabiem gilig zin'ig wʋsa.
26 Oi! M nidibaa, yɛɛmi bɔto fuud
ka bilim tampɛligimin sʋnsa'aŋ zug;
kaasimi nɛ sʋnsa'aŋ nɛ tɔɔg
wʋʋ sɔ' biribiŋ yimmiri na kpi nɛ.
Ka san'auŋ sɔb la na gbirigi kɛɛn ti san'an na.
27 Zugsɔb la da pian' tis Jeremia ye,
“M maalif ye fʋ nwɛnɛ onɛ mamsid kʋnti gɔt,
ka m nidib la nwɛnɛ tampiing kanɛ mɔr kʋnt.
Kpansimi ba
ka maki ba suoya la gɔs.
28 Ba wʋsa anɛ banɛ tʋba pʋ wʋmma,
ba giligidi san'amid nidib yʋda.
Ba nwɛnɛ kʋnt zɛn'ug nɛ kʋnt kanɛ kpi'em;
ba wʋsa anɛ ziri dim.
29 Zugub laas la fʋʋsidnɛ ka bugum la'aŋid hali
mɔɔd ye li yis dian'ad la,
amaa li kʋ nyaŋi yis dian'ad la;
bɔzugɔ bugusim dim la pʋ yii.
30 Ba na buonnɛ ba ye anzurifa kanɛ ka ba zan'as,
bɔzugɔ Zugsɔb la zan'asi ba.”