Sɔ' kae an sʋm la yɛla
5
1 Zugsɔb la yɛl ye,“Dʋm zugin nɛ teŋir Jerusalem suoraadin la,
gɔsim gilig ka kpansi gɔs,
ieem lɔdisin la wʋsa,
ye fʋ na nyɛ baa nid yinne
onɛ an pʋpiel ka tʋm sida.
Fʋ ya'a nyɛ sɔ'
m na kɛ tempʋʋg la tʋʋmbɛ'ɛd taali bas.
2 Ba pɔɔd ye, ‘Sida-sida ka m yɛt nɛ Zugsɔb kanɛ vʋe la yʋ'ʋr!’
Amaa la'am nɛ lin wʋsa ba pɔɔr la anɛ zaalim.”
3 O Zugsɔba, fʋ pʋ gɔsidnɛ bɔɔd sidaa?
Fʋ nwɛ' ba, amaa li pʋ zabidi baa;
fʋ namisi ba ka ba zan'as ka pʋ kɛlisidi fʋ sa'alʋgɔ.
Ba nini kpɛ'ɛŋi gaad kugir
ka ba zan'as tiakir.
4 Ani ka m tɛn'ɛsi m pʋtɛn'ɛrin ye,
“Nimbama nwa anɛ nɔŋ dim; ba anɛ zɔn,
ba zi' Zugsɔb la suorɛ,
ka mɛ zi' Wina'am la bɔɔdim.
5 Alazug m na keŋi ba tuongatib la san'an
pian' tisi ba;
sida ba mi' Zugsɔb la suor,
nɛ ba Wina'am la bɔɔdim.”
Amaa ba maal nɔɔr yinne kɔ'ɔg yu'asindaug la
ka kɛns bana linɛ lɔɔ ba la.
6 Dinzug, gbigima na yi wɛogʋn la na gban'e ba,
zaŋku'a na yi pipirisin na aansi ba,
wɛbaas na digi kpi'e nɛ ba tempʋʋs la guri
ka onɛ wʋsa yina o na aans o zɔrisi zɔris.
Ba tʋbzian'asim la zu'onɛ
ka ba nya'aŋ lɛbig la ka' bɛnnɛ.
7 Zugsɔb bu'os ye,
“M na niŋ wala kɛɛ ya taali basɛ?
Ya biis la zan'asi m nɔɔr
ka pɔɔd nɛ wina banɛ ka' Wina'am.
M tisi baa ba bɔɔdim wʋsa,
la'am nɛ wala, ka ba kpɛm san'amid pu'ab
ka tuund pu'agɔɔnda yaan.
8 Ba nwɛnɛ wieddaad banɛ ka ba ugu ba sʋ'ʋŋa ka ba dʋt wiednya'as nɛ,
sɔ' wʋsa sin'imnɛ mɔɔd on na niŋ si'em digin nɛ o tiraan pu'a.
9 Li pʋ nar ye m namisi ba nɛ'ɛŋa yɛlaa?”
“Buudkaŋa an si'em nwa,
li pʋ sʋm ye m yɔ samme m mɛŋaa?”
Zugsɔb la yɛl si'em la.
10 “Dɔlisim o tiis pɔɔd la ni san'ami ba,
amaa da san'ami ba wʋsa nyainnɛ.
Pɛsim o wila la bas,
ka nimbama ka' Zugsɔb la dinnɛ.
11 Israel nɛ Juda dim la
kʋdim ka'anɛ sida dimi tisi ma.”
Zugsɔb la yɛl si'em la.
12 Ba ma' tis Zugsɔb la;
ka yɛl ye, “O kʋ niŋ si'ela!
Bɛ'ɛd kʋ kɛɛn ti san'an naa;
tanp kʋ kena nwɛ' ti bɛɛ kɔ'ɔm li naa.
13 Nɔdi'esidib la fʋʋdnɛ nɔɔr
ka Wina'am pian'ad ka' ba san'anɛ;
dinzug, kɛl ka ban yɛl si'el wʋsa kpɛlimi ba zugin.”
14 Alazug, Zugsɔb Wina'am onɛ an Paŋtita'ar Sɔb la yɛl ye;
“Nidib la sadigim pian' pian'abama la,
m na kɛ ka m pian'ad linɛ bɛɛ fʋ nɔɔrin la lieb bugum
ka nimbama na kilim daad ka bugum la dii ba.”
15 Zugsɔb la yɛl ye,
“Yanam Israel dima,
m mɔri buudkanɛ bɛ lalli kenna ye ba zab nɛ ya,
buudkanɛ da bɛ kʋdimin sa ka na bɛɛ yuug,
nimbanɛ ka ya zi' ba pian'adɛ,
ka pʋ gban'adi ba pian'ad gbinnɛ.
16 Ba lu'ad la nwɛnɛ yaʋg ka ba yɔ'ɔg,
ka ba wʋsa an zabzabidib banɛ kpi'em.
17 Ba na vɔl yanamɛ bun si'el la, nɛ ya diib wʋsa,
ka vɔli ya biribis nɛ ya bipumis;
ba na vɔli ya kɔnbid nɛ ya niigi,
ka vɔli ya tiwanna buudi wʋsa.
Ba na zabi san'ami ya tempʋkpi'ema
nɛ zin'ibanɛ ka ya ti'ir bɛ la wʋsa.”
18 Zugsɔb la yɛl ye, “La'am nɛ wala, dabisban la saŋa m kʋ san'ami ya nyainnɛ.” 19 Nidib la ya'a ti bu'os ye, “Bɔ ka ti Zugsɔb Wina'am la tʋm nɛ'ɛŋa tisi ti?” Fʋn yɛlimi ba ye, “Yanamɛ daa basim ka pʋ'ʋsid win zʋna ya mɛŋ teŋin la, ala ka ya na tʋmmi tisid teŋ zʋŋ nidib teŋ kanɛ ka' ya mɛŋ teŋa.”
20 “Mɔɔlimi nɛ'ɛŋa tis Jakob yidim,
ka mɛ pian' tis Juda dim:
21 Wʋmmi nɛ'ɛŋa, yanam banɛ an zɔn ka ka' ya'am la,
ya mɔr nini amaa ka pʋ nyɛta:
ya mɔr tʋba amaa ka pʋ wʋmma.”
22 “Ya kʋ zɔɔ maa?
Bɔ ka man bɛɛ ya san'an ka ya pʋ kirida?
Manɛ maal titanbin'isi la ka li aan atɛuk la titɔndig,
li anɛ gu'ur linɛ bɛ saŋa wʋsa ka li kʋ lɔ'ɔŋɛ.
Ku'opila la na gbilim kena, amaa li kʋ nyaŋi limi lii;
li na maal vuud ka kʋ nyaŋi lɔ'ɔŋɛ.”
Zugsɔb la yɛl si'em la.
23 Amaa nimbama nwa sʋnya kpi'em nɛ galis;
ba fɛndigi dɔlli ba mɛŋ suori gaad.
24 Ba pʋ tɛn'ɛsidi ba mɛŋ pʋtɛn'ɛrin ye,
“Kɛl ka ti zɔɔ ti Zugsɔb Wina'am la,
onɛ kɛt ka sadɛɛŋ nɛ saa linɛ yuolim niid sɛɛung la,
onɛ kɛ ka ti mɔr ti'ir ka bʋn saŋa wʋsa la.”
25 Yanamɛ pʋ tʋm linɛ an sʋm la kɛ ka nɛ'ɛnam lɛn kae;
ya tʋʋmbɛ'ɛd la kɛ ka ya pʋ nyɛt bʋnsʋŋɔ.
26 “Bugusim dim bɛɛ m nidib la sʋʋgin
ba dignɛ gur wʋʋ niis ka ba bɛnd
ka nwɛnɛ banɛ bɛnd baans ye ba gban'e nidib.
27 Nwɛnɛ tiita ka niis ɛɛn pɛ'ɛl si'em la,
ala mɛn ka ba ya' la pɛ'ɛl nɛ ziri;
ba lieb nɛ kpan'am dim ka mɔr kpi'euŋ
28 ka nɔbi saalim.
Ba tʋʋmbɛ'ɛd la pʋ mɔr bɛnnɛ;
ba pʋ sʋŋid kpiibis ka ba dit bʋʋdɛ.
Tadimnam ya'a mɔr sida, ba pʋ zabidi tisidi baa.
29 Li pʋ nar ye m namisi ba nɛ'ɛŋa yɛlaa?
Buudkaŋa an si'em nwa,
li pʋ sʋm ye m yɔ sammɛ m mɛŋa?”
Zugsɔb la yɛl si'em la.
30 “Yɛlbɛ'ɛd nɛ pakir
maal teŋ la zug:
31 nɔdi'esidib la yɛtnɛ linɛ ka' sidaa,
ka maanmaannib la sʋ'oe nidib la nɛ ba mɛŋ paŋ,
ka m nidib la mɛ bɔɔd ala.
Amaa li naar wʋsa ya na niŋ wala?”