4
1 “Israel dima, Ya ya'a sid na lɛb na,yanam on lɛmmi m san'an na.”
“Ya ya'a nɔki ya bada banɛ ka m kis la bas
ka m pʋ lɛn nyɛti li,
ka ya mɛ kʋ lɛm bɔdig ya'asɛ,
Zugsɔb la yɛl si'em la.
2 Ya ya'a bɛ nɛ sida nɛ pʋpielim
ka pɔ sida-sida nɛ Zugsɔb la yʋ'ʋr zug,
ala ka buudi wʋsa na sɔs ye m tisi ba albareka
wʋʋ man tis yanam si'em la,
ka dʋ'ʋsi ba mɛŋ man Zugsɔb la zug.”
3 Zugsɔb la yɛl si'eli nwa tis Juda nɛ Jerusalem dim ye:
“Bugumi ya paalʋ zin'ikanɛ ka ya nam pʋ nwɛ' vugus la
ka da bʋd gɔn'ɔs sʋʋginɛ.
4 Yanam Juda dim nɛ Jerusalem nidiba,
maalimi ya mɛŋ nyain tis Zugsɔb la,
wʋʋ ban kpɛn'ɛd baŋʋ si'em la
Ya'a ka' ala m sʋnpɛɛn na kanbi ya wʋʋ bugum nɛ,
bɛ'ɛd kanɛ ka ya maal la zug
li na kanbidi ya ka sɔ' kae na faaɛn ya.”
Tɔɔg linɛ yit ya-datiuŋ na la
5 Zugsɔb la da lɛn yɛlim ye, “Mɔɔlim tis Juda nɛ Jerusalem dim ye Zugsɔb la yɛl si'eli nwa:
“Piebimi na'atana gilig teŋ la wʋsa!”
Kaasim agɔla ka yɛl ye,
“La'asimi taaba!
Kɛlli ka ti zɔɔ keŋ tempʋbanɛ mɔr kpi'euŋ la ni!
6 Pa'alimi Zion suor!
Zɔm faaɛn ya mɛŋ ka da yuugɛ!
Bɔzugɔ m mɔr tɔɔgʋ yi ya-datiuŋʋ kenna,
hali ka li na an san'auŋ tita'ar.”
7 Gbigim yii o buugin na;
onɛ san'amid buudi la yina.
O bas o bɛllim zin'ig
ka bɔɔd ye o san'ami ya teŋ la.
Ya tempʋʋs la na lieb dabɔɔd
ka sɔ' kʋ lɛm bɛɛ li nii.
8 Alazug, yɛɛmi bɔto fuudi pa'ali ya sʋnsa'aŋ,
fabilimi ka kumi,
Zugsɔb la sʋnpɛɛn tita'ar linɛ mɔr dabiem la
nam pʋ yii ti san'an la zug.
9 Zugsɔb la yɛli ya nyain ye, “Daakan la,
na'ab la nɛ kpɛɛmnam la wʋsa ya'am na bɔdig,
maanmaannib sʋnya na san'am,
ka li na pak nɔdi'esidib la.”
10 Ani ka m da yɛl ye, “Zugsɔb Wina'am, gɔsim fʋn ma' nimbama nɛ Jerusalem dim si'em, fʋ yɛli ba ye, ‘Ya na mɔr sumbʋgʋsʋm,’ hali ka zaba bɛɛ ti zugin.”
11 Saŋkan la Wina'am na yɛl nimbama nɛ Jerusalem dim ye, “Sisi'etʋʋlʋg yit kʋkʋna linɛ bɛ pipirisin la da'adi kpa'adi m nidib la, amaa ka kʋ an sisi'ekanɛ na yɛlig ki bɛɛ vaae sa'adi mɔri keŋɛ; 12 li na anɛ sisi'ekanɛ mɔr paŋ hali linɛ yi man san'an na. Ka m na kadi ba saria ka kʋʋsi ba bɛ'ɛd.”
13 Gɔsima! O ken tɔ'ɔtɔ na wʋʋ saŋgbana nɛ,
o zaba tɛrekonam la kennɛ na nwɛnɛ sisi'epiliŋ,
o widi la zɔti gat silʋgʋ na ian'ad.
Woo, yɛla paae ti! Ti san'auŋ paae ya!
14 Jerusalem dima, piemi bɛ'ɛd linɛ bɛɛ ya sʋnfʋn la ka paam faangir.
Bʋndaar ka ya na bas pʋtɛn'ɛbɛ'ɛd kanɛ ka ya gban'e ya sʋnya ni la?
15 Sɔ' bɛ Dan teŋinɛ mɔɔn,
o mɔɔn tɔɔg linɛ yit Efiram kʋkʋna ni kenna la yɛla, ye,
16 “Yɛlim nɛ' tisi buudi la,
mɔɔlim tis Jerusalem dim la ye,
‘Zabzabidib banɛ ye ba giligi ya teŋ la bɛ lalli kenna,
ki'ed zaba kuŋʋ bɔɔd ye ba zab nɛ Juda tɛɛns la wʋsa.
17 Ba la'asi gilig teŋ la wʋʋ pɔɔg ka nidib gur,
bɔzugɔ nidib la zan'as mam nɔɔr.’
Zugsɔb la yɛl si'em la.
18 ‘Fʋ mɛŋ itʋŋ nɛ fʋ tʋʋma la
zi nɛ'ɛŋa kɛɛn fʋ zugin na.
Nɛ'ɛŋa aan fʋ namisʋg.
Li na tɔi tisif!
Li na zabi kpɛn' fʋ sʋnfʋn!’ ”
19 Oo, man sʋnsa'aŋʋ nwaa, man sʋnsa'aŋʋ nwaa!
Li zabidimnɛ ka m liebid.
Oo, m sʋʋnr san'amya!
Li zabidnɛ kpɛn'ɛdi m sʋnfʋn,
m ya'am wʋsa tuodnɛ
ka m kʋ nyaŋi mɔdigɛ.
Man wʋm na'atan piebʋg
ka wʋm ka ba nwɛ'ɛd tanp kuŋ la zug.
20 Yɛl tɔɔg yinne gaad ka yinne dɔl;
ka teŋ la wʋsa lieb dabɔɔd.
M sʋgʋr la gbirigi san'am,
li pʋ yuugɛ ka m gbɛɛnsir zin'ig san'am.
21 M na niŋ wala gɔs tanp nwɛ'ɛb nwaa yuug
ka wʋmi ba na'atana piebʋgɔ?
22 Ka Zugsɔb la lɛbisi yɛl ye,
“Man nidib la anɛ zɔn;
ba zi' ma.
Ba anɛ biis banɛ ya'am pɔɔd;
ba pʋ gban'ad si'el gbinnɛ.
Ba zan'aŋ nɛ tʋʋmbɛ'ɛd tʋʋma hali;
ka zi' linɛ an sʋm maalʋgɔ.”
23 M gɔs teŋgbauŋ ka li pʋ mɔr nɔɔrɛ
ka an zaalim;
ka lɛn gɔs saŋgbauŋin la,
ka li nɛɛsim mɛ gaad.
24 M gɔs zuoya la ni,
ka ba kirid;
kʋkʋna la wʋsa yɛŋim nɛ.
25 M gɔsi nyɛ ka nidib lɛn kae;
ka niis banɛ bɛɛ agɔl la wʋsa ianki gaad.
26 M gɔsi nyɛ ka teŋ kanɛ maan zʋʋd hali la lieb pipiris;
ka li tempʋʋs la wʋsa kilim dabɔɔdi digi
ka li anɛ Zugsɔb la sʋnpɛɛnni tʋmi li.
27 Zugsɔb la yɛl si'eli nwa:
“Teŋ la wʋsa na lieb dabɔɔd,
la'am nɛ man kʋ san'ami li nyain la.
28 Dinzugɔ, teŋgbauŋ la na kum
ka saŋgbana la lieb lik,
bɔzugɔ m pian' ya, ka kʋ tiak ya'asɛ;
m gban'e ya, ka kʋ lɛb nya'aŋ ya'asɛ.”
29 Banɛ ban'ad widi nɛ banɛ tɔɔnd piema la dammir
kɛ ka tempʋʋs wʋsa nidib zɔ.
Sieba kpɛn' nɛ gɔn'ɔsin;
ka sieba dʋ tampiins zug.
Ba zɔnɛ ka bas tempʋʋs la wʋsa;
sɔ' pʋ lɛm bɛɛ ani ya'asɛ.
30 Fʋn teŋ kanɛ lɛn ka' vɔɔnr nwa,
bɔ ka fʋ yɛɛd fuvɛnla
ka kɔr sanlima niŋgɔnkɔrisɛ?
Bɔ ka fʋ mɔ'ɔsidi fʋ nindaa?
Fʋ maannɛ fʋ mɛŋ nɛ zaalim.
Banɛ daa nɔŋif la nɛ'ɛsif nɛ;
ka mɔɔd ye ba kʋʋf.
31 M wʋm ka sɔ' kaasid wʋʋ pu'a sa'ae nɛ,
ka ʋʋnsidi nwɛnɛ pu'a kanɛ nan zi' du'a nɛ,
li anɛ Zion dimi kaasid wʋʋ pu'asadir ka vʋ'ʋsidi pʋ paada,
ka lɔbid nu'usi yɛt ye,
“Woo, m kpiya!
Ninkʋʋdib la paami m nyɔvʋr.”