3
1 Zugsɔb la yɛl ye,“Dau ya'a bas o pu'a
ka pu'a la tɔɔm kul dau sɔ',
dau la na nyaŋi lɛb pu'a la nii?
Ala kʋ kɛ ka teŋ la mɔr dian'adɛɛ?
Amaa gɔsima, ya niŋ wala maali ya mɛŋ wʋʋ pu'agɔɔnda?
Banɛ ka ya nɔŋ ka dɔl la anɛ bɛdegʋ,
ya yʋ'ʋn na niŋ wala lɛb man san'an na?”
Zugsɔb la yɛl si'em la.
2 “Gɔsim gilig zuoya la zin'is wʋsa ye,
zin'isi'a bɛ ka ba pʋ digin nɛ yaa?
Ya zin' suor kpikpɛŋi guri ya sabuos.
Ya su'a zin' nwɛnɛ Arab dim faandib banɛ bɛ pipirisin la.
Ya kɛ ka teŋ la lieb dian'ad
ya pu'agɔɔnda tʋʋma nɛ ya bugusim tʋʋma la zug.
3 Dinzug ka m kɛya ka saa pʋ lɛn niida,
ka sadɛɛŋ mɛ lɛn kae.
La'am nɛ wala ya maali ya mɛŋ wʋʋ pu'agɔɔnda;
ka nan zan'as ka pʋ zɔti li nyannɛ.
4 Nannanna ka ya yʋ'ʋn buolim ka yɛl ye,
‘M ba', fʋ anɛ man zua m biilimin sa.
5 Fʋ sʋnf na pɛligid alaa?
Fʋ sʋnpɛɛn la na kpɛm aan ala saŋa wʋsaa?’
Yanamɛ pian'ad si'em nwa,
amaa ka sin tʋm tʋʋmbɛ'ɛd buudi wʋsa linɛ ka ya na nyaŋi tʋm.”
Israel dimi ka' sida dim la yɛla
6 Na'ab Josia na'am saŋa la ka Zugsɔb la da yɛlim ye, “Fʋ nyɛ Israel dim la pʋ mɔr sida si'em? Israel dʋt kʋkʋn tita'ar wʋsa zug ka ken tititada wʋsa gbinnin tʋm linɛ nwɛnɛ pu'agɔɔndir tʋʋma anina. 7 M daa tɛn'ɛsid ye on tʋm nɛ'ɛnam wʋsa naae la o na lɛbi m san'an na, amaa o pʋ lɛb naa, ka o pitʋ Juda onɛ ka' sida sɔb la mɛ nyɛɛ li. 8 M tis Israel onɛ ka' sida sɔb la pu'abasib kasɛta gbauŋ ka kad o yis, o dausan'auŋ la zug. La'am nɛ wala, o pitʋ Juda pʋ zɔ dabiem, ka mɛ yii keŋ san'am dap. 9 Israel dimi pʋ gɔs ka dian'ad tʋʋma an bɛ'ɛd la zug, ba dɔlli kuga nɛ tiisi tʋm wʋʋ pu'agɔɔnda nɛ, ka kɛ ka teŋ la wʋsa lieb dian'ad. 10 La'am nɛ nɛ'ɛnam wʋsa, o pitʋ Juda onɛ ka' sida sɔb la pʋ lɛb man san'an na nɛ o sʋnf wʋsaa, ka lɛɛ ma' ye li pak o nɛ.” Zugsɔb la yɛl si'em la.
11 Zugsɔb la yɛlim ye Israel onɛ ka' sida sɔb la lɛɛ an pʋpielim sɔbi gaad Juda onɛ ka' sida la. 12 Ka lɛn yɛlim ye m fɛndigim kpa' ya-datiuŋ baba mɔɔl ye,
“Lɛm na, Israel onɛ ka' sida sɔbaa!”
“M kʋ lɛn lɔɔm nindaa nɛ fʋn ya'asɛ,
bɔzugɔ, m anɛ nimbaanlzɔt.”
“M sʋnpɛɛn la kʋ kpɛm bɛ saŋa wʋsaa.
Zugsɔb la yɛl si'em la.
13 Siakim ye ya tʋm taal:
ya zan'asi ya Zugsɔb Wina'am,
ka widigi dɔl win zʋna
tititada wʋsa gbina ni,
ka zan'as man nɔɔr.”
Zugsɔb la yɛl si'em la.
14 Zugsɔb la yɛl ye, “Lɛmmi na, nimbanɛ ka' sida dima, manɛ aan ya sid. M na gaŋi ya nid yinne-yinne tempʋʋg wʋsa ni, ka gaŋ nidiba ayi' tuŋ wʋsa ni, mɔri ya kɛn Zion na. 15 Ala ka m na tisi ya kɔnbkem sʋma banɛ paae m ya'am ka ba na gaadi ya tuon nɛ baŋir ka an banɛ gban'ad pian'ad gbin sʋ'ʋŋa.” 16 Zugsɔb la yɛl ye, “Dabisban la ya'a ti paae, ka ya zu'oe teŋ la zug hali, nidib kʋ lɛm pian'ad Zugsɔb Nɔnaar Daka la yɛlaa. Li kʋ lɛm kpɛn' ba pʋtɛnda ni bɛɛ ba tɛn'ɛsidi li yɛllɛ; ba kʋ mɔri li bɔɔdim bɛɛ ba maal yinne ya'asɛ. 17 Saŋkan la ba na buol Jerusalem ye, ‘Zugsɔb Na'am Zin'ig’, ka buudi wʋsa na la'as Jerusalem na na'as Zugsɔb la. Ba kʋ lɛm mɔr zukpi'euŋ nɛ ba sʋnya digilim si'em la. 18 Dabisban la ya'a ti paae, Juda dim na la'as nɛ Israel dim, ka ba na la'asi yi ya-tuona na keŋ teŋ kanɛ ka m tisi ya yaanam ye li aan ba faar la.”
19 Mam mɛŋ yɛl ye,
“Li na malisim ka m na mɔri ya wʋʋ m biis
ka na tisi ya teŋ kanɛ mɔr ya'amlɛog,
faar kanɛ vɛnl hali gat buudbanɛ kpɛlim la wʋsa tɛɛns la.
M tɛn'ɛsid ye ya na buolim ye, ‘Ti Ba',’
ka kʋ fɛndig ka basim dɔllim.
20 Amaa ya nwɛnɛ pu'a kanɛ ka' sida sɔb o sid san'an si'em la,
ala mɛn ka yanam Israel dim ka' sida dimi tisi ma.”
Zugsɔb la yɛl si'em la.
21 “Kikaasig bɛ zuoya la zugʋ wʋm na,
li anɛ Israel dimi kum ka bɛllim,
bɔzugɔ ba fɛndig nɛ ka basi ba suosʋma la
ka tami ba Zugsɔb Wina'am la yɛla.
22 Lɛmmi na, nimbanɛ ka' sida dimaa,
m na ti'ebi ya, ya liig la pʋʋgin.”
Ka nidib la lɛbis ye,
“Ɛɛn, ti na lɛbi fʋ san'an na,
fʋn aan ti Zugsɔb Wina'am la zug.
23 Asida ti sid maan tʋkpiidʋg kʋkʋna la zugʋ pʋ'ʋsid bada
ka li pʋ mɔr sʋŋiri tisidi tii;
sida Zugsɔb onɛ aan ti Wina'am la san'an
ka Israel dim faangir bɛ.
24 Ti biilim saŋa sa wina banɛ mɔr nyan la da dit
zʋʋd linɛ ka ti saamnam tʋm iɛn ɔnsir la,
ba kɔnbid nɛ ba niigi,
hali la'am nɛ ba biribis nɛ ba bipumis wʋsa.
25 Kɛlli ka ti digin teŋin nɛ ti nyan,
ka kɛ ka ti nyan la pili ti.
Ti tʋm tʋʋmbɛ'ɛdi pɔ'ɔgi ti Zugsɔb Wina'am,
tinam nɛ ti yaanam wʋsa;
lin yii ti biilimin sa ti paae zina
ti pʋ siaki ti Zugsɔb Wina'am la nɔɔrɛ.”