Israel dimi tam Wina'am la yɛla
2
1 Ka Zugsɔb labaar kɛɛn m san'an na ye,2 “Kem mɔɔl ka Jerusalem dim tʋba wʋm ye,
“ ‘M tɛnr fʋn da an na'akin ka pɛsigi fʋ mɛŋ si'em
ka dɔllim sian'arin
teŋ kanɛ ka ba daa nan zi'i bʋd la.
3 Israel da anɛ kasi tis Zugsɔb la,
ka nwɛnɛ waldɛɛnna o bunib saŋa;
banɛ wʋsa daa daami m nidib la pʋ nyɛt bʋʋdɛ,
ka tɔɔg lii ba zugin.’ ”
Zugsɔb la yɛl si'em la.
4 Jakob yidima, wʋmmi Zugsɔb la labaar,
yanam dɔɔd banɛ yi Israel na la.
5 Zugsɔb la yɛl si'eli nwa ye:
“Ya yaanam nyɛ gbɛlʋŋ bɔ man san'an
ka li kɛ ka ya basim ka yirida?
Ba da dɔlli ba'ayaalis
ka lieb ninyaalis.
6 Ba da pʋ bu'os ye,
‘Zugsɔb onɛ da mɔri ti yi Egipt teŋin na la bɛ yaanɛ?
O da mɔri ti dɔlis sian'ar linɛ an pipiris la ni,
zin'ikanɛ an pipiris ka mɔr bʋmbu'ad la,
teŋ kanɛ ka sawak nɛ lik bɛ,
teŋ kanɛ ka kum dabiem bɛ,
teŋ kanɛ ka sɔ' pʋ dɔlli gata, ka nidib mɛ pʋ bɛɛ ani la.’
7 M da mɔri ya na kpɛn'ɛs teŋ kanɛ mɔr kʋ'ʋlʋm
ye ya dii li zʋʋd linɛ maan sʋ'ʋŋa la.
Amaa ya kena kɛ ka teŋ la lieb dian'ad
ka kɛ ka m faar lieb bʋmbɛ'ɛd.
8 Maanmaannib la pʋ bu'os ye,
‘Zugsɔb la bɛ yaanɛ?’
Banɛ tʋmmi m wada tʋʋma la zi' ma
ka tuongatib la zan'asi m nɔɔr.
Nɔdi'esidib la pian'adi Baal yɛla,
ka dɔl ba'ayaalis.
9 Dinzug, m na lɛn zaŋi ya taal ya'as.
M na zaŋi ya biis nɛ ya yaas taal mɛn.”
Zugsɔb la yɛl si'em la.
10 “Lɔ'ɔŋiminɛ atɛukʋ keŋ Kitim teŋgbauŋʋn la gɔs.
Kem Kedar nɛ tɛɛns banɛ bɛ ya-nya'aŋ la
gɔs kii ye si'elnam nan mi' maal wʋʋ nɛ'ɛŋaa:
11 Buudsi'a nam mi' tiaki ba Wina'am?
(La'am nɛ ba wina la ka' Wina'am la.)
Amaa man nidib la nɔki man na'am pipilim la
tiaki li dɔl ba'ayaalis.
12 Saŋgbana, gɔsimi nɛ sʋnsa'aŋ,
ka kɛ ka ya sʋʋnr san'am.”
Zugsɔb la yɛl si'em la.
13 “M nidib la tʋm tʋʋmbɛ'ɛd zin'is ayi':
Ba zan'asimnɛ
ba zan'as man kanɛ an nyɔvʋr ku'om bulig la,
ka tuu ba mɛŋ bulis,
bulis banɛ li' ka ku'om pʋ bunna.
14 Israel anɛ sankpan'as bɛɛ ba du'a o nɛ yammidi nɛ?
Ka bɔɔ niŋ ka o nwɛnɛ onɛ ka ba zabi gban'e o?
15 Gbigima nwa'am ya,
ka maan tʋkpiidʋg o san'an.
Ba san'am o teŋ la bas:
ba nyu'oe o tempʋʋs la ka sɔ' pʋ lɛm bɛɛ ani.
16 Memfis nɛ Tapenɛs nidib mɛ kena
nwɛ' ya zuti nwa'asi nwa'as.
17 Li ka' ya mɛŋi mɔri li ya zugin naa?
Ya zan'asi ya Zugsɔb Wina'am
onɛ mɔri ya yi dɔl la.
18 Bɔ ka ya wa'ae Egipt teŋin
ye ya nu Nail kɔldaug ku'om?
Ka bɔ ka ya lɛn keŋ Asiria
ye ya nu Efiritis kɔldaugin la?
19 Ya bugusim la zug ya na di'e li namisʋg;
ya nya'aŋ lɛbig la na kɛ ka ya nyɛ namisʋg.
Tɛn'ɛsimi ka baŋi li bɛ'ɛd
nɛ lin na tɔi si'em tisi ya,
ya bas man kanɛ aan ya Zugsɔb Wina'am la
ka pʋ lɛn zɔti ma.”
Zugsɔb onɛ an Paŋtita'ar Sɔb la pian'ʋkʋ nwa.
20 “Ya kɔ'ɔg yu'asindaug la
ka kɛns baans linɛ lɔɔ ya la ka li yuug.
Ya yɛl ye, ‘Ti kʋ lɛn tʋm tisi fɔ!’
Sida, ya bɛ nɛ zuotitada zug nɛ tititada wʋsa gbina nii
pʋ'ʋsid winsieba,
wʋʋ ya anɛ pu'agɔɔnda nɛ.
21 M da gaŋif nɛ sɛ,
ka fʋ nwɛnɛ tisʋŋ
ka til la mɛ an sʋm.
Ka li niŋ wala ka fʋ zan'asim
ka lieb mɔɔgin tibɛ'ɛdɛ?
22 La'am nɛ fʋn pie fʋ mɛŋ nɛ zɛɛnm
nɛ ki'ibʋ bɛdegʋ la,
fʋ tʋʋmbɛ'ɛd linɛ kɛ ka fʋ si' la nam pʋ yii,
li nan kpɛm bɛɛ fʋ niŋgbiŋin.”
Zugsɔb onɛ an Paŋ tita'ar sɔb la pian'ʋkʋ nwa.
23 “Fʋ na niŋ wala yɛl ye, ‘Man ka' dian'ad sɔba;
man pʋ zɔɔ yii dɔl Baalnama’?
Gɔsim fʋn tʋm si'em bɔn'ɔgin la,
tɛn'ɛsim fʋn tʋm si'el la.
Fʋ nwɛnɛ yʋgʋm nya'aŋ kanɛ
ɛɛnti zɔɔ lɛb kpɛ' ka zɔɔ lɛb kpɛ' nɛ.
24 Ka nwɛnɛ sian'arin bʋŋ nya'aŋ
kanɛ punsig ka ʋk nyɔnya kpa' sisi'em
bɔɔd ye o wʋm bʋŋ daad nyuug la.
Anɔ'ɔnɛ na nyaŋi giŋ o?
Bʋŋ daug kanɛ ieed o saŋa kan la gɛɛnd o mɛŋa
bɔzugɔ saŋa la ya'a paae bʋŋ nya'aŋ la mɛŋ na kena ka o nyɛɛ o.
25 Da zɔ ka ta'ada kɛns ka fʋ nɔba kpɛlim biel,
bɛɛ kɛ ka fʋ kʋkɔr kʋdigɛ.
Amaa fʋ yɛl ye, ‘Li ka' gbinnɛ.
Win zʋna la ka man bɔɔd, asɛɛ m dɔlli ba.’
26 Na'ayiigi na zu ka ba gban'e o ka diis o nyan si'em la,
ala mɛn ka ba na diis Israel dim la nyan,
ban nɛ ba na'anam, nɛ ba kpɛɛmnam,
nɛ ba maanmaannib nɛ ba nɔdi'esidib wʋsa.
27 Ba ɛɛnti yɛl tiig ye, ‘Fʋnɛ aan m ba',’
ka yɛl kugir ye, ‘Fʋnɛ du'am.’
Ba fɛndigi ba nindaas
ka bidi m kʋdig;
amaa ba ya'a ti bɛ yɛla ni
ba buonim nɛ ye, ‘Kem na faaɛn ti!’
28 Wina banɛ ka ya mɛŋ maal la bɛ yaanɛ?
Ba ya'a na nyaŋi faaɛn ya,
alaa ya ya'a bɛ yɛla ni yanam on buoliminɛ ba!
Bɔzugɔ Juda mɔr wina bɛdegʋ
ka ba zu'oe nwɛnɛ ba tempʋʋs la zu'oe si'em la.
29 Bɔ ka ya yɛl ye manɛ tʋm bɛ'ɛdɛ?
Ya wʋsa zan'asim.”
Zugsɔb la yɛl si'em la.
30 “M namisi ya nidib la nɛ zaalim,
ba pʋ di'ed sa'alʋgɔ;
ya zabi kʋʋ ya nɔdi'esidib
wʋʋ gbigim kanɛ ka kɔ'ɔm mɔr o.
31 Yanam zʋmaaŋ kaŋa dima,
tɛn'ɛsimi mam Zugsɔb labaar la yɛla:
M anɛ teŋ kanɛ an pipirigi tisi ya
bɛɛ teŋ kanɛ an lika?
Bɔ ka m nidib la yɛl ye,
‘Ti mɔr yɔlisim na gɔɔn ti ya'aminɛ;
ti kʋ lɛn kɛɛn fʋ san'an na ya'asɛ’?
32 Pu'asadir na tam o niŋgɔnkɔris yɛlaa,
bɛɛ pu'apaal tam o duorim la'ad yɛla?
La'am nɛ wala, man nidib la tami m yɛla, ka li dabisa yuug.
33 Ya sid mi' yanamɛ na maal si'em nyɛ sabuos!
Hali banɛ an pu'agɔɔnda amɛŋa la na zamisi ya suoya la.
34 Tadimnam ziim bɛɛ ya fuudin la
ka li pa'an ye ya kʋʋ ba.
Hali yanamɛ pʋ gban'e ba ka ba kɔɔ kpɛn'ɛd la,
o sʋnf pʋ pɛlig nɛ mam.’
Amaa m na kadif saria
bɔzugɔ fʋ yɛl ye, ‘Mam pʋ tʋm bɛ'ɛdɛ.’
36 Bɔ ka fʋ zɔti giligidi tia'asidi fʋ suoya?
Egipt na lugif wʋʋ Asiria da maalif si'em la.
37 Fʋ mɛ na yii anina ka nɔki fʋ nu'usi kʋk zug
bɔzugɔ, Zugsɔb la zan'as banɛ ka fʋ nɔki fʋ ti'iri niŋ la:
ba kʋ sʋŋif baa bi'elaa.”