Jeremia
Jeremia buolʋg nɛ o tʋʋma yɛla
1
1 Pian'abama yinɛ Jeremia ni na. O saam da anɛ Hilkia onɛ yi Anatof teŋin na ka an maanmaan Benjamin sʋ'ʋlimin la. 2 Zugsɔb la labaar da kɛɛn o san'an na saŋa kanɛ ka Juda sʋ'ʋlim Na'ab Josia onɛ an Ammon biig la da dii o na'am la, li yʋma pii nɛ atan' saŋa, 3 ka dɔlis Na'ab Jehoyakim onɛ an Josia biig na'am saŋa la, mɔr ala ti paae Zedekaya onɛ an Josia biig la na'am yʋʋm pii nɛ yinne la, li nwadis anu saŋa, saŋa kanɛ ka ba da gban'e Jerusalem dimi lɔ'ɔŋ teŋ la. Jeremia da yɛl si'el la wʋsa bɛ gbauŋ kaŋa pʋʋgin.Zugsɔb la da buol Jeremia si'em nwa
4 Zugsɔb la labaar da kɛɛn m san'an na yɛlim ye,
5 “Man da nam pʋ maali fʋ niŋi fʋ ma pʋʋgin la ka pʋn mi'if,
ban da nam pʋ du'af la, ka m gaŋif ka kɛ ka fʋ bɛɛ fʋ kɔn';
M gaŋif ye fʋ an nɔdi'esi tis buudi bɛdegʋ.”
6 Ka m yɛl ye, “Aa, Zugsɔb onɛ an Paŋtita'ar Sɔba, man zi' pian'adɛ; m nan anɛ biig.” 7 Amaa Zugsɔb la da yɛlim ye, “Da yɛl ye fʋ anɛ biiga, onɛ wʋsa ni ka m tʋmif asɛɛ ka fʋ keŋ ka yɛl nɔzi'elʋg kanɛ ka m tisif la. 8 Da zɔti ba dabiem, ka man na bɛ nɛf ka gurif.” Zugsɔb la yɛl si'em la. 9 Ani ka Zugsɔb la tiɛn o nu'ugʋ si'isi m nɔɔr ka yɛlim ye, “Nannanna m nɔki m pian'ad la niŋi fʋ nɔɔrin. 10 Gɔsima, zina m gaŋif ye fʋ sʋ'oe tɛɛns nɛ sʋ'ʋlimnam. Fʋ na vɔn' ka aans, ka da'ae bas ka san'am ka nyaŋ, ka lɛbisi mɛ' ka sɛ.”
11 Ka Zugsɔb labaar lɛn kɛɛn m san'an na bu'osim ye, “Jeremia, fʋ nyɛ bɔ?” Ka m lɛbis ye, “M gɔsi nyɛ tiig wil.” 12 Ka Zugsɔb la yɛlim ye, “Fʋ sid nyɛɛ li sʋ'ʋŋa, bɔzugɔ m na gɔs ka m pian'ad la tʋm wʋʋ man yɛl si'em la.”
13 Ka Zugsɔb labaar lɛn kɛɛn m san'an na ye, “Fʋ nyɛ bɔ?” Ka m lɛbis ye, “M nyɛ dʋk ka li lɛ'ɛd ka gbɛligi lɛbid ya-datiuŋ baba la bɔɔd kpa'ar.”
14 Ka Zugsɔb la yɛlim ye, “Tɔɔg na yi ya-datiuŋ na kpa'ae yɛɛl banɛ bɛ teŋgbauŋ la zug wʋsa.” 15 O da lɛn yɛl ye,
“M bɔɔd ye m buol nidib
nɛ sʋ'ʋlim banɛ bɛ ya-datiuŋ la wʋsa la'as na.
Ba na'anam na kɛn Jerusalem tempʋʋgin na
ka zin'ini ba na'am gbana la zugʋ za'anɔya ni;
ba na kena zab nɛ zaŋguoma banɛ giligi li la
nɛ Juda tempʋʋs la wʋsa.
16 M na kadi m nidib la saria,
ban gban'e bugusim ka tam man yɛla,
ka nyu'od bʋnnyubisa tisid winsieba
ka pʋ'ʋsid linɛ ka ba mɛŋ maal nɛ ba nu'us la.”
17 Ka Zugsɔb lɛn yɛlim ye, “Ti'ebim sʋ'ʋŋa! Duom zi'en ka yɛli ba man yɛlif ye fʋ yɛli ba si'el la wʋsa. Da zɔɔ ba dabiem, ya'a ka' ala m na kpɛn'ɛsif dabiem hali ba tuon. 18 Juda na'anam nɛ ba kpɛɛmnam nɛ ba maanmaannib nɛ teŋ la tadimnam wʋsa na duoe zan'asif. Amaa zina m maalif nɛ ka fʋ nwɛnɛ tempʋkanɛ mɔr paŋ hali, nɛ kʋnt zan'antɔlig bɛɛ kʋntzɛn'ug zaŋguom. 19 Ba na zab nɛf, amaa ba kʋ nyaŋɛ, bɔzugɔ man na bɛ nɛf ka faanf.” Zugsɔb la yɛl si'em la.