Juda Na'ab Abija yɛla
15
1 Nebat biig Na'ab Jeroboam na'am diib yʋma pii nɛ anii saŋa la, Abija da di Juda na'am, 2 ka sʋ'oe Jerusalem yʋma atan'. O ma yʋ'ʋri da buon Maaka, o da anɛ Abisalom pu'ayua.3 O da tʋm tʋʋmbɛ'ɛd banɛ wʋsa ka o saam da dɛŋi tʋm la. O da pʋ pɛsigi o sʋnf wʋsa tis o Zugsɔb Wina'am wʋʋ o yaab Na'ab David n da pɛsigi o sʋnf si'em laa. 4 La'am nɛ wala wʋsa, David zugɔ, o Zugsɔb Wina'am la da tis o nɛɛsim Jerusalem tempʋʋgin, ka tis o biribiŋ ye o zi'en o nɔba zug ka kɛ ka Jerusalem paam kpi'euŋ. 5 David da tʋm dinɛ an sʋm Zugsɔb la tuon, ka pʋ gɛsig Zugsɔb la da zi'el o nɔɔr si'em la baa yinne o nyɔvʋr bɛllim pʋʋginɛ, asɛɛ Uria onɛ an Hitti nid la yɛla la ma'aa.
6 Na'ab Abija nyɔvʋr bɛllim saŋa la, Rehoboam nɛ Jeroboam da zabidnɛ saŋa wʋsa. 7 Ya'a kpɛlim nɛ yɛla banɛ da maal Abija na'am diib saŋa la, ba sɔbi kpɛn'ɛs Juda Na'anam Gbauŋʋn la. Abija nɛ Jeroboam da zabidnɛ saŋa wʋsa. 8 Na'ab Abija da maal ka'alim ka ba mum o David tempʋʋgin ka o biig Asa di'e o zin'igi di na'am.
Asa di Juda Na'am
9 Jeroboam da an Israel Na'ab la li yʋma pisi saŋa ka Asa da di Juda na'am. 10 Ka o di na'am Jerusalem yʋma pisnaasi nɛ yinne. O yaapu'a yʋ'ʋri da buon Maaka, o da anɛ Abisalom pu'ayua.
11 Na'ab Asa da tʋm dinɛ an sʋm Zugsɔb la tuon nwɛnɛ o yaab Na'ab David n da tʋm si'em la. 12 O da kad dap banɛ tʋm dapgɔɔnda tʋʋma teŋgbana ni yis teŋin la ka yis bada banɛ ka o saam da ba' la wʋsa bas. 13 Hali ka pidig o yaapu'a Maaka onɛ da an pu'ana'ab la na'am bɔzugɔ, o da sɛ teŋgban Asera dazi'edir la pʋ'ʋsid. Asa da kie dazi'edir la lɔbi bas Kidron bɔn'ɔgin ka nyu'oe li nɛ bugum. 14 Hali la'am nɛ on da pʋ yis teŋgbana banɛ bɛ kʋkʋna zut la, Na'ab Asa da kpɛm pɛsig o sʋnf wʋsa tis o Zugsɔb Wina'am. 15 O da mɔr sanlima nɛ anzurifa nɛ la'abanɛ ka on nɛ o saam da pɛsigi tis Zugsɔb la kpɛn'ɛs Zugsɔb Pʋ'ʋsim Yin la.
Na'ab Asa maal nɔɔr yinne nɛ Aram sʋ'ʋlim Na'ab
16 Zaba da bɛ Na'ab Asa nɛ Israel Na'ab Baasa sʋʋgin ba na'am diib saŋa la wʋsa. 17 Israel Na'ab Baasa da duoe zabid nɛ Juda, ka keŋ Rama teŋin mɛ' kpi'euŋ zin'igi gu' ka sɔ' kʋ nyaŋi kpɛn' bɛɛ yi Juda Na'ab Asa sʋ'ʋlim la nii.
18 Asa da nɔk anzurifa nɛ sanlima linɛ da kpɛlim Zugsɔb Yir suak dɔɔdin la, nɛ linɛ bɛɛ o mɛŋ na'ayin la niŋ o na'ayikpɛm la nu'usin. Ka kɛ ka ba mɔri keŋ Aram Na'ab Ben-Hadad onɛ da an Tabirimon biig ka an Hezion yaaŋ ka sʋ'oe Damaskus tempʋʋg la. 19 O da ye ba yɛl o ye, “Kɛl ka man nɛ fʋn maal nɔnaar, nwɛnɛ m saam nɛ fʋ saamme da mɔr nɔɔr yinne si'em la. Gɔsima, anzurifa nɛ sanlima ka m nɔki tisidif ka li an piini. Nannanna basim nɔnaar kanɛ ka fʋn nɛ Israel Na'ab Baasa maal la ka li kɛ ka o yii m teŋin la ka basim.”
20 Ben-Hadad da siak Na'ab Asa nɔɔr ka tʋmi o zabzabidib tuongatib ka ba keŋ zab nɛ Israel tɛɛns la. O da nyaŋ Iyon teŋ nɛ Dan teŋ, nɛ Abɛl-Bet-Maaka teŋ, la'am nɛ Kenɛref baba, la'am kpanb nɛ Naftali dɔɔg sʋ'ʋlim wʋsa. 21 Baasa n da wʋm nɛ'ɛŋa la, o da bas Rama mɛɛb, ka lɛb Tiza tempʋʋgin bɛɛ anina. 22 Ka Na'ab Asa tis nɔɔr ye ba giligim Juda wʋsa mɔɔl ye sɔ' wʋsa yim ka baa nid yinne da kpɛlim, ka ba keŋ fuoe kuga nɛ dabanɛ ka Baasa da mɔri mɛɛd Rama la. Na'ab Asa da nɔki lii mɛ' Geba teŋ kanɛ bɛ Benjamin nɛ Misipa teŋin la.
23 Ya'a kpɛlim nɛ yɛla banɛ da maal Na'ab Asa na'am diib saŋa, on da nyaŋi maal si'el nɛ on tʋm si'el, nɛ tempʋʋd banɛ ka o mɛ' la, ba da sɔbi lii niŋ Juda Na'anam Gbauŋʋn la. On da kʋdig saŋa si'a la, ban'as da gban'e o nɔba. 24 Asa da maal ka'alim, ka ba mum o David tempʋʋgin. Ka o biig Jehosafat di'e o zin'ig.
Baasa kʋ Nadab
25 Na'ab Asa da di Juda na'am la, li yʋma ayi' saŋa ka Na'ab Jeroboam biig Nadab da di Israel na'am. O da di na'am Israel teŋin yʋma ayi'. 26 O da tʋm bɛ'ɛd Zugsɔb la tuon, ka dɔl o saam suoya nɛ o tʋʋmbɛ'ɛd dinɛ ka o da kɛ ka Israel dim tʋm la.
27 Na'ab Nadab nɛ Israel dim wʋsa da keŋ gilig Gibɛton linɛ an Filistia dim tempʋʋg la ka zab nɛ ba, ka Ahija biig Baasa onɛ an Isaka dɔɔg nid la da zam o anina ka o nwɛ' o kʋ. 28 Na'ab Asa da di Juda na'am la yʋma atan' saŋa la ka Baasa da kʋ Nadab ka di'e o zin'igi di na'am la.
29 Baasa da di na'am la, o da kʋ Na'ab Jeroboam yidim la wʋsa ka pʋ bas nid baa yinne. O da san'ami ba wʋsa, nwɛnɛ Zugsɔb la da kɛ ka o nɔdi'es Ahija onɛ an Siilo nid la yɛl si'em la, 30 bɔzugɔ Jeroboam da tʋm tʋʋmbɛ'ɛd ka mɛ kɛ ka Israel dim wʋsa tʋm, ka Zugsɔb onɛ an Israel Wina'am la sʋnf pɛlig.
31 Ya'a kpɛlim nɛ yɛla banɛ da maal Na'ab Nadab na'am diib saŋa la, ba da sɔbi kpɛn'ɛs Israel Na'anam Gbauŋʋn la.
Baasa nɛ Juda Na'ab Asa zaba yɛla
32 Zaba da bɛ Juda Na'ab Asa nɛ Israel Na'ab Baasa sʋʋgin ba na'am diib saŋa la wʋsa.