Jeroboam biribiŋ kpiya
14
1 Saŋkan la ka Jeroboam biig Abija bɛn'ɛd, 2 ka Jeroboam yɛl o pu'a ye, “Duom tiaki fʋ mɛŋ, ka sɔ' kʋ baŋ ye fʋ anɛ Jeroboam pu'a, ka keŋ Siilo teŋ kanɛ ka nɔdi'es Ahija bɛ la. Gɔsima, Ahija onɛ da yɛlim ye m na ti lieb Israel na'ab la bɛɛ anina. 3 Nɔkim bodobodo gbila piiga nɛ ma'asa nɛ siind gan'ari mɔri keŋ o san'an. O na yɛlif dinɛ na maal biig la.” 4 Jeroboam pu'a la da keŋ Ahija yin Siilo teŋin niŋ wʋʋ on yɛl o ye o niŋ si'em la.Ahija da kʋdignɛ ka pʋ lɛn nyɛta, 5 amaa Zugsɔb la da yɛli Ahija ye, “Jeroboam pu'a kenna ye o bu'osi fʋ o biribiŋ yɛla, bɔzugɔ o bɛn'ɛd nɛ. O ya'a ti paae na o na ma' ye o anɛ sɔ' sa. Yɛlim o man na yɛlif si'em.”
6 On da paae za'anɔɔrin ka Ahija wʋm o nɔbkida la, o yɛl ye, “Kpɛn'ɛm na Jeroboam pu'a, bɔ ka fʋ tiakidi fʋ mɛŋa? Ba tʋm man nɛ fʋ san'an na nɛ lababɛ'ɛd. 7 Kem yɛl Jeroboam ye Zugsɔb onɛ an Israel Wina'am la yɛl si'em nwa ye, ‘M dʋ'ʋsif nɛ nidib la sʋʋgin, ka kɛ ka fʋ aan m nidib Israel tuongat. 8 M aaɛn sʋ'ʋlim la nɛ David yinne tisif, amaa fʋ ka' wʋʋ m tʋmtʋm David, onɛ di'e m nɔzi'elʋg nɛ o sʋnf wʋsa, ka tʋm dinɛ an sʋm ma'aa man tuon la. 9 Fʋ tʋm bɛ'ɛdi gaad banɛ da dɛŋi fʋ tuon la wʋsa. Fʋ maal teŋgban sieba tisi fʋ mɛŋ nɛ bada banɛ ka ba maal nɛ kʋnt. Fʋ kɛya ka m sʋnf duoe, ka fʋ lɛm bidi m kʋdig.
10 “ ‘Nɛ'ɛŋa zug m na mɔr tɔɔg Jeroboam yin na. M na nwaae o yir la biribiŋ kpaanr wʋsa bas Israel teŋin, banɛ an yammis nɛ banɛ ka' yammis wʋsa. M na nyu'oe Jeroboam yir la wʋʋ sɔ' na nyu'oe na'ambin, ka li dii nug si'em la. 11 Baas na ɔnb banɛ wʋsa an Jeroboam nidib ka kpi tempʋʋgin la, ka niis mɛ na dii o nimbanɛ kpi tempʋʋg la yiŋ la.’ Zugsɔb la pian'adi la.
12 “Ya'a kpɛlim nɛ fʋnɛ, lɛm kul! Fʋ ya'a ti nɔk nɔbiri zi'eli fʋ tempʋʋgin la, fʋ biribiŋ la na kpi. 13 Israel dim wʋsa na kumi o yɛla ka mum o. On ma'aa na an Jeroboam yir la nid ka ba na mum o, bɔzugɔ on ma'aa bɛ Jeroboam yin la ka Zugsɔb onɛ an Israel Wina'am la nyɛ ka o an sʋ'ʋŋa.
14 “Ka dinɛ lɛn paas, Zugsɔb la na gaŋ o mɛŋ na'ab Israel sʋ'ʋlimin, ka o na li' Jeroboam gbin la. Dabisir anɛ zina! Ɛɛn, li anɛ nannanna nwa! 15 Zugsɔb la na nwɛ' Israel dimi bas ka ba na nwɛnɛ kɔlkantima yɛŋim ku'omin nɛ. O na vuoɛn Israel n yis teŋ sʋŋ kaŋa ni linɛ ka o da tisi ba yaanam la, ka widigi ba ka ba lɔ'ɔŋ kɔldaug la, bɔzugɔ, ba kɛya ka Zugsɔb la sʋnf duoe, ban maal Asera teŋgbana la zug. 16 Tʋʋmbɛ'ɛd banɛ ka Jeroboam tʋm ka mɛ kɛ ka Israel wʋsa tʋm la zug, o na basi ba.” 17 Ani ka Jeroboam pu'a duoe kul Tiza. On ti yaki o nɔbiri zi'el yaŋirin la ka biig la kpi. 18 Ka ba mum o, ka Israel dim wʋsa kumi o yɛla, nwɛnɛ Zugsɔb la yɛl o tʋmtʋm Ahija onɛ an nɔdi'es si'em la.
Nadab di'e Jeroboam zin'ig
19 Na'ab Jeroboam da tʋm tʋʋm sieba wʋsa nɛ on da zab, zab sieba nɛ on da mɔr teŋ la si'em la, ba sɔbi kpɛn'ɛs Israel Na'anam Tʋʋma gbauŋʋn la. 20 O da di na'am la nɛ yʋma pisi nɛ ayi', ka maal ka'alim. Ka o biig Nadab di'e o zin'igi di na'am la.
Rehoboam da di Juda Na'am
21 Na'ab Solomon biig Rehoboam da anɛ Na'ab, Juda dɔɔg sʋ'ʋlimin la; o da anɛ yʋma pisnaasi nɛ yinne ka di na'am la. O da sʋ'oe teŋ la yʋma pii nɛ ayɔpɔi Jerusalem tempʋʋgin, tempʋkan la ka Zugsɔb gaŋ Israel dɔɔd wʋsa sʋʋgin ye o niŋ o yʋ'ʋr la. O ma yʋ'ʋri da buon Naama; o da anɛ Ammon nid.
22 Juda da tʋm bɛ'ɛd Zugsɔb la tuon. Ba tʋʋmbɛ'ɛd kanɛ ka ba da tʋm la zug da kɛ ka o sʋnf duoe ka li gaadi ba yaanamɛ da tʋm si'em la. 23 Ba da sɛ teŋgban kuga kʋkʋna zut, ka maal Asera dinɛ an teŋgban la kʋkʋna wʋsa zug nɛ titita'ar wʋsa gbinnin. 24 Hali dap mɛ da tʋmnɛ dapgɔɔnda tʋʋma ba teŋgbana ni. Israel nidib la da tʋmnɛ bʋn linɛ kis nwɛnɛ nimbanɛ da bɛ teŋin la da tʋm si'em ka Zugsɔb la da kadi ba yis saŋkanɛ ka Israel dim da kpɛn'ɛd teŋin la.
25 Na'ab Rehoboam da di na'am la, li yʋma anu saŋa, Egipt na'ab Sisiak da kena zab nɛ Jerusalem. 26 O da vaae Zugsɔb Yir la kpan'am wʋsa nɛ na'ayir kpan'am la wʋsa. O da vaae si'el wʋsa la'am nɛ sanlima zaba gbanti'edis linɛ ka Solomon da maal la. 27 Alazug Na'ab Rehoboam da maal kʋntzɛn'ug gbanti'edisi lɛbis, ka nɔki ba gu'ul banɛ gur na'ayir la kpɛɛmnam. 28 Na'ab la ya'a ɛɛnti kpɛn' Zugsɔb yin la, banɛ gur la na mɔr gbanti'edis nwa dɔl o keŋ, ka li nya'aŋ ka ba lɛbisi li dɔkanɛ ka ba gur la ni.
Na'ab Rehoboam kum
29 Ya'a kpɛlim yɛla banɛ da maal Na'ab Rehoboam na'am diib saŋa nɛ on da tʋm si'el wʋsa, ba sɔbi niŋ Juda Na'anam Gbauŋʋn la. 30 Rehoboam nɛ Jeroboam da zabidi nɛ taaba saŋa wʋsa. 31 Na'ab Rehoboam da maal ka'alim ka ba mum o David tempʋʋgin. O ma yʋ'ʋri da an Naama; o da anɛ Ammon nid. Ka o biig Abija di'e o zin'igi di na'am.