Nɔdi'es Semaya tu'as Wina'am pian'ad si'em
11
1 Rehoboam n da paae Jerusalem la, o da la'as Juda yidim la wʋsa nɛ banɛ an Benjamin dɔɔg la dap banɛ mi' zaba la, nidib tusa kɔbiga nɛ pisnii (180,000), ye ba keŋ zab nɛ Israel nidibi di'e na'am la lɛbisi tis Rehoboam. 2 Amaa Wina'am labakaŋa da kɛn Semaya onɛ an Wina'am nid la san'an na yɛl ye, 3 “Yɛlim Solomon biig Rehoboam onɛ an Juda Na'ab la, nɛ Israel nimbanɛ bɛ Juda la wʋsa nɛ Benjamin ye, 4 ‘Zugsɔb la yɛl si'eli nwa: Da keŋ zabi nɛ ya ba'abiis Israel dim la. Ya wʋsa lɛm kuli, ka nɛ' anɛ manɛ tʋmi li.’ ” Ka ba siak ka lɛbi kul wʋʋ Zugsɔb la yɛli ba si'em la, ka ba fɛndigi lɛb ka pʋ lɛn tʋ'ʋs ye ba zab nɛ Jeroboam ya'asɛ.Rehoboam lɛn kɛ ka Juda teŋ kpi'em si'em
5 Rehoboam da bɛ nɛ Jerusalem tempʋʋgin ka mɛ' Juda tempʋʋs la giŋ Jerusalem lɛbis, ba da anɛ: 6 Betilehem nɛ Etam nɛ Tekoa 7 nɛ Bet Zur nɛ Soko nɛ Adullam 8 nɛ Gaf nɛ Maresa nɛ Zif 9 nɛ Adoram nɛ Lakis nɛ Azeka 10 nɛ Zora nɛ Aijalon nɛ Hebron. Tembama da maal nɛ ka li kpi'em Juda nɛ Benjamin dɔɔd sʋ'ʋlimin. 11 O da kɛ ka tɛɛns la zaba zin'is la kpi'em sʋ'ʋŋa, ka kɛ ka soogia kpɛɛmnam bɛɛ ani, ka o tisidi ba diib nɛ olif kpaam nɛ daam. 12 O da bɔ linɛ lusid nyɔ'ɔg la nɛ kpana niŋ tɛɛns la wʋsa ni ka li kɛ ka tɛɛns la wʋsa kpi'em. Alazug Juda nɛ Benjamin da anɛ o din.
13 Maanmaannib nɛ Levi dim la da bɛ zin'isieba Israel teŋin la wʋsa da zi'e nɛ o nya'aŋ. 14 Levi dim la da basi ba kɔnbkemsʋg zin'is la nɛ ban mɔr si'el wʋsa ka keŋ Juda nɛ Jerusalem na bɔzugɔ Jeroboam nɛ o biis da zan'as nɛ ye ba kʋ lɛn an Zugsɔb la maanmaanniba. 15 Ka Jeroboam lɛɛ da gaŋ o mɛŋ maanmaannib ka ba bɛ maana zin'is la ni la kaanbid Bʋʋg nɛ Na'abil bada banɛ ka o maal la. 16 Banɛ da yi Israel dɔɔg wʋsa ka lɔɔ ba sʋnfʋn ye ba dɔl Zugsɔb onɛ an Israel Wina'am la da dɔl Levi dim la nya'aŋi lɛb Jerusalem tempʋʋgin ye ba maal maannɛ tis Zugsɔb onɛ aan ba yaanam Wina'am la. 17 Ba da kɛ ka Juda sʋ'ʋlim la paam paŋ ka sʋŋ Rehoboam onɛ an Solomon biig la yʋma atan', ka dɔl suobanɛ ka Na'ab David nɛ Solomon bɔɔd la.
Rehoboam yidim yɛla
18 Na'ab Rehoboam da di Mahalaf, onɛ an Na'ab David biig Jerimof pu'ayua ka o ma da an Abihel onɛ an Jese biig Eliab pu'ayua la. 19 O da du'a biribisi tis o, Jeus nɛ Semaraya nɛ Zaham. 20 O mɛ da lɛn di Absalɔm pu'ayua Maaka, onɛ da du'a Abija nɛ Atai nɛ Ziza nɛ Sielomif. 21 Na'ab Rehoboam da nɔŋ Absalɔm biig Maaka hali gati o pu'ab banɛ kpɛlim la nɛ o pu'abibis la wʋsa. O da mɔri pu'ab pii nɛ anii nɛ pu'abibis pisyuobʋ, ka du'a biribis pisi nɛ anii nɛ bipumis pisyuobʋ.
22 Rehoboam da gaŋnɛ Maaka biig Abija ka o an na'abiis la wʋsa kpɛɛm o bieyanam nɛ o pitib la sʋʋgin, ye linɛ na kɛ ka o ti nyaŋi di na'am. 23 O da maalnɛ ya'am, ka da widigi o biis la sieba gilig Juda nɛ Benjamin sʋ'ʋlim nɛ tembanɛ ka o maal ka li kpi'em la wʋsa. O da tisi ba areza'as bɛdegʋ ka di pu'ab bɛdegʋ tisi ba.