Israel dimi da zan'as Rehoboam si'em
10
1 Rehoboam da keŋ Sekɛm teŋin bɔzugɔ, Israel dim wʋsa da la'as anina ye ba diis o na'am. 2 Jeroboam onɛ an Nebat biig la da wʋmi li yɛla la (o da nam bɛnɛ Egipt teŋin, on da zɔ Solomon yɛla la) o da yi Egipt n lɛb na. 3 Ka ba tʋm buol Jeroboam ka on nɛ Israel dim wʋsa keŋ Rehoboam san'an yɛl o ye, 4 “Fʋ saam daa nɔk zitɛbisa ziili ti, amaa nannanna siem tʋʋm kpi'ema la nɛ zitɛbisa banɛ ka o daa ziili ti la, ka ti na tʋmmi tisidif.” 5 Rehoboam da lɛbisi ba ye, “Lɛmmi ka daba atan' daar ka ya lɛbi m san'an na.” Ka nidib la widigi kul. 6 Na'ab Rehoboam da bu'os kpɛɛm kʋda banɛ da bɛɛ o saam na'am saŋa la ye, “Nidib la sɔs si'em la m na lɛbisi ba ye bɔ?” 7 Ka ba lɛbis ye, “Fʋ ya'a siaki maal nidib la bɔɔd si'el la ka lɛbisi ba sʋ'ʋŋa, nidib nwa na liebi fʋ yammis saŋa wʋsa.” 8 Amaa Rehoboam da zan'as kpɛɛmnam la sa'alʋg ka keŋ nwɛ' o taaba banɛ ka on nɛ ban da la'am duoe na ka ba tʋmmi tisid o la sɔɔra. 9 Ka bu'osi ba ye, “Yanam sa'alʋg an bɔ? Ti na lɛbis nimbanɛ yɛlim ye m siem zitɛbisa banɛ ka m saam da ziili ba la ye bɔ?” 10 Ka na'akim banɛ ka on nɛ ban da la'am duoe na la lɛbis ye, “Yɛlim nimbama nwa, banɛ yɛl ye fʋ saam daa tisi ba zitɛbisa amaa fʋn siemi li tisi ba la ye, ‘Man nu'ubil mugumi gati m saam siaa! 11 M saam daa nɔk nɛ zitɛbisa ziili ya, amaa man na kɛ ka li maligim tɛbisi gaad ala; m saam da mɔri sisanbisi namisidi ya, amaa man na namisi ya nɛ namis!’ ”12 Daba atan' nya'aŋ, Jeroboam nɛ nidib la wʋsa da lɛb Rehoboam san'an na, nwɛnɛ Na'ab la da yɛl si'em la ye, “Lɛmmi daba atan' daar na la.” 13 Na'ab la da lɛbis nidib la nɛ yɔɔgʋ sa, ka zan'as kpɛɛmnam la sa'al o si'em la. 14 O da dɔl nɛ na'akim la sa'al o si'em ka ye, “M saam daa nɔk nɛ zitɛbisa ziili ya, man mɛ na kɛ ka li maligim tɛbisi gaad ala; m saam da mɔri sisanbisi namisidi ya, amaa man na namisi ya nɛ namis!” 15 Na'ab la da pʋ kɛlis nidib la. Yɛlbanɛ maal nwa da anɛ dinɛ yi Zugsɔb la pian' si'eli tis Jeroboam onɛ an Nebat biig la dɔlisi yi Ahija san'an onɛ an Siilo nid la ye li niŋ amɛŋa.
16 Israel dim wʋsa da nyɛ ka Na'ab la zan'as ka pʋ kɛlisi ba pian'ad la, ka ba lɛbis Na'ab la ye, “Ti pʋʋr an bɔ David yinnɛ? Ka ti din an bɔ Jese biig la ni? Lɛm kuli ya yaan, yanam! Fʋn David mɛ gɔsimi fʋ mɛŋ yir ma'aa!” Ka Israel dim la lɛbi kul. 17 Amaa ya'a kpɛlim Israel dim banɛ da bɛ tempʋbanɛ bɛ Juda sʋ'ʋlimin la, Rehoboam da nan kpɛn sʋ'oe ba.