Sieba pu'ana'abi kaae na'ab Solomon la yɛla
9
1 Seeba pu'ana'abi da wʋm Na'ab Solomon ya'am yɛla la, o da kena mak o nɛ bu'oskpi'ema. O da paae Jerusalem na nɛ tɛrekonam bɛdegʋ nɛ yʋgʋma ka ba ziid bʋnnyubisa nɛ sanlima bɛdegʋ nɛ kuga banɛ vɛnl ka li ligidi zu'oe la mɔri kɛn Solomon san'an na, ka bu'os Solomon linɛ bɛɛ o pʋtɛn'ɛrin wʋsa. 2 Solomon da gandig o bu'osa la wʋsa; si'el da kae kpi'emi tis Na'ab la ka o pʋ nyaŋi pian' pa'al o. 3 Seeba pu'ana'ab la da nyɛ ya'am kanɛ ka Solomon mɔr nɛ na'ayir kanɛ ka o mɛ' la, 4 ka lɛn nyɛ dikanɛ bɛɛ o diib zin'igin, nɛ o na'ayikpɛm la zin' si'em la, nɛ o yammis nɛ ba fuvɛnla la, nɛ banɛ gɔsid o daam, nɛ nyu'or malima linɛ ka o maal Zugsɔb Pʋ'ʋsim Yin la wʋsa. On da nyɛ li wʋsa la, li da lidig o nɛ hali. 5 Ka o yɛl Na'ab la ye, “Man wʋm si'eli m mɛŋ teŋini fʋ yɛla nɛ fʋ ya'am la an si'em la anɛ sida! 6 Amaa m pʋ niŋ ban yɛl si'el la yaddaa, asɛɛ mam kena ka nyɛ nɛ m mɛŋ nini la. Sida, hali man wʋm si'em fʋ ya'am nɛ fʋ kpan'am la yɛla la pʋ paae man kena nyɛ si'el la pʋsʋkɔ. 7 Fʋ nidib la mɔr zusʋŋ, ka fʋ na'ayikpɛm banɛ zi'e fʋ san'an ka wʋmi fʋ ya'am pian'ad saŋa wʋsa la mɛ mɔr zusʋŋ. 8 Na'asi bɛ nɛ fʋ Zugsɔb Wina'am onɛ nɔŋif ka zin'ilif Israel na'am gbauŋ zug la. Bɔzugɔ, Zugsɔb la nɔŋilim nɛ Israel dimi ka' naar la zug ka o diisif na'am ye fʋ kɛ ka sida nɛ pʋpielim bɛ.”9 O da nɔk sanlima tis Na'ab la ka li tɛbisim zu'oe hali, nɛ bʋnnyubisa nɛ kugsʋma banɛ ligidi zu'oe bɛdegʋ: lin yi saŋkan la ti paae zina, sɔ' nan zi' mɔri bʋnnyubisa na ka li zu'oe paae Seeba pu'ana'ab la da mɔr si'el na laa.
10 (Na'ab Hiram anrintitada la mɛ da mɔr sanlima yi Ofir sʋ'ʋlimin na, nɛ dasʋma bɛdegʋ, nɛ kugvɛnla banɛ ligidi zu'oe. 11 Na'ab la da nɔk dasʋma la maal Wina'am Pʋ'ʋsim Yir nɛ na'ayir la la'asʋma, ka maal kɔna nɛ bʋnnwɛ'ɛda tis banɛ nwɛ'ɛdi ba la. Juda teŋin sɔ' nan zi wʋm bɛɛ nyɛɛ li buudi, lin yi daakan la keŋ paae zina.)
12 Na'ab Solomon da tis Seeba pu'ana'ab la bʋnkanɛ ka o da nyɛ ka bɔɔd ka sɔs wʋsa, ka li gat on da mɔr la'ad si'em na tis o la. Pu'ana'ab la da fɛndigi lɛbi kuli o mɛŋ teŋin, on nɛ banɛ dɔl o la wʋsa.
Solomon kpan'am la yɛla
13 Sanlima linɛ ka Solomon da di'esid yʋʋm wʋsa la da zu'oe nɛ hali; 14 nɛ'ɛŋa da pʋ paas tigiti nɛ lampɔ ligidi la. O mɛ da di'esid sieba Arabia na'anam nɛ gɔmenanam banɛ sʋ'oe teŋ la san'an.
15 Na'ab Solomon da nɔk sanlima maal gbanti'edis kɔbisyi' banɛ yalim. O da nɔk nɛ sanlim gbila kɔbisyuobʋ maal yinne wʋsa. 16 O mɛ da maal gbanti'eda bʋmbibis kɔbistan' nɛ sanlim gbila kɔbistan' tan', ka nɔki li niŋ Lebanon Tiis Dɔɔgin la.
17 Na'ab la da maal na'am zin'itita'ar ka nɔk wabʋg nyina nɛ sanlima pi'e li. 18 Na'am zin'isir bimbim la da mɔri dʋʋsa yakir ayuobʋ, ka li nya'aŋ la maal gbila-gbila ka wa'am dʋ zugin. Na'ab zin'isirin la da mɔr nu'us pa'alʋg zin'is ka gbigim kpi'e nu'ug pa'alʋg zin'ig wʋsa. 19 Gbigima pii nɛ ayi' da zi'e dʋʋsa ayuobʋ la ni, ka yinne bɛ dʋʋsir wʋsa naarin. Na'am zin'isir lɛn kae teŋ si'a ka ba maal ka li nwɛnɛ li ya'asɛ. 20 Na'ab Solomon yin la nwama linɛ ka ba da mɔri nuud, nɛ na'ayin la la'ad wʋsa da anɛ sanlima. Lebanon Tiis Dɔɔgin la'ad la wʋsa mɛ da anɛ sanlima. Si'el da kae an anzurifa bɔzugɔ, ba da pʋ nyɛ anzurifa ka li an si'el Solomon saŋa la. 21 Na'ab la da mɔr anrintitada bɛdegʋ banɛ ka ba mɔri kpiisid, ka Na'ab Hiram nidib da tʋmmi li tʋʋma. Yʋma atan' wʋsa ba na lɛb na ka ziid sanlima nɛ anzurifa nɛ wabʋg nyina nɛ nwaamis nɛ kpanda.
22 Na'ab Solomon kpan'am nɛ o ya'am da gat dunia na'anam la wʋsa. 23 Dunia na'anam wʋsa da kennɛ o san'an na ka o pian'ad ka ba kɛlisid o ya'am pian'akanɛ ka Wina'am niŋ o sʋnfʋn la. 24 Yʋʋm wʋsa banɛ kennɛ o san'an na la wʋsa da mɔri piini na tisid o, nwɛnɛ sanlima nɛ anzurifa, fuud nɛ zaba la'ad, nɛ bʋnnyubisa, nɛ widi.
25 Na'ab Solomon da mɔri tɛrekonam tusa naasi (4,000) nɛ widi tusa pii nɛ ayi' (12,000), ka ba bɛɛ o widi tempʋʋsin la, ka sieba mɛ bɛɛ o san'an Jerusalem tempʋʋgin. 26 O da sʋ'oe na'anam la wʋsa lin pin'il Kɔldaugin la keŋ paae Filistia dim teŋin la ti paae Egipt titɔndigin. 27 Na'ab la da kɛ ka anzurifa anɛ na'ana Jerusalem tempʋʋgin nwɛnɛ kuga nɛ, ka na'aziinr dasʋma zu'oe nwɛnɛ kekama daadi zu'oe mɔɔgin si'em la. 28 Solomon da da'ad o widi la nɛ Musir teŋin nɛ tembanɛ bɛ wʋsa.
Solomon kum yɛla
29 Ya'a kpɛlim yɛlbanɛ da maal Solomon na'am diib saŋa la, lin yi pin'ilʋgʋn ti paae li bɛn la, li sɔb Natan onɛ an Wina'am nɔdi'es la labaya gbauŋʋn la, nɛ Ahija onɛ an Siilo nid la nɔdi'esʋg gbauŋʋn, nɛ Iddo onɛ nyɛt nier yɛla la da nyɛ si'eli zaŋi ken Jeroboam onɛ an Nebat biig la yɛla. 30 Solomon da di na'am Jerusalem teŋin la nɛ yʋma pisnaasi. 31 Ka da maal ka'alim ka ba mum o, o yaanam san'an David tempʋʋgin. Ka o biig Rehoboam di'e o zin'igi di na'am la.