Solomon tam Wina'am yɛla
11
1 Na'ab Solomon da nɔŋ teŋ zʋŋ pu'ab hali. O da di Egipt na'ab Faaro pu'ayua ka mɛ di Moab dim nɛ Ammon dim nɛ Edom dim nɛ Sidon dim nɛ Hitti dim pu'ayuos. 2 Ba da yinɛ buudbanɛ ka Zugsɔb la da yɛl Israel dim ye, “Yanam nɛ ban da di taaba bɛɛ kul taaba bɔzugɔ, ba na fɛndigi ya sʋnya lɛbisi ba teŋgbana la ni.” La'am nɛ wala Solomon ya'am da kpɛn' ba hali. 3 O da mɔr pu'ab kɔbisyɔpɔi banɛ an na'anam pu'ayuos, nɛ pu'abibis kɔbistan': ka o pu'ab la fɛndig o ya'am. 4 Solomon n da kʋdigid la, o pu'ab la da fɛndigi o ya'am lɛbis teŋgban sieba ni, ka o pʋ lɛn niŋ o ya'am wʋsa o Zugsɔb Wina'am san'an wʋʋ o saam David ya'am da an si'em la. 5 O da dɔl nɛ Asitoref onɛ an Sidon dim teŋgban la, nɛ Molek onɛ an Ammon dim teŋgban kanɛ ka ti kis la. 6 Solomon da tʋm bɛ'ɛd Zugsɔb la tuon, ka pʋ dɔl o Zugsɔb la nɛ o sʋnf wʋsa wʋʋ o saam David n da niŋ si'em la.7 Kʋkʋn kanɛ bɛ Jerusalem ya-nya'aŋ la Solomon da mɛ' teŋgban dɔɔgɔ li zugʋ tis Kemos, onɛ an Moab teŋgban kanɛ ka ti kis la nɛ Molek, onɛ an Ammon dim teŋgban kanɛ ka ti kis la. 8 O da maal ala tis o pu'ab banɛ yi teŋ zʋna la na wʋsa, banɛ nyu'od bʋnnyubisa ka maan maana tisidi ba teŋgbana la.
Wina'am da sa'al Na'ab Solomon nɛ nimmua
9 Zugsɔb la sʋnf da pɛlig nɛ Na'ab Solomon bɔzugɔ o sʋnf da fɛndig o Zugsɔb onɛ an Israel Wina'am, onɛ da nie o san'an nɔɔra ayi' la. 10 La'am nɛ on da sa'al Solomon ye o da dɔl teŋgbana la, Solomon da pʋ dɔl Zugsɔb nɔzi'elʋg la. 11 Alazug Wina'am da yɛl Solomon ye, “Fʋn sadigim ki'isi m nɔnaar nɛ m gban'ar dinɛ ka m zi'eli tisif la, m na aaɛn sʋ'ʋlim la yisi fʋ san'an tisi fʋ nya'andɔlib la yinne. 12 La'am nɛ wala, fʋ saam David zugɔ, m kʋ niŋi lii fʋ vʋm saŋa. M na aaɛn lii yisi fʋ biig nu'ugin. 13 Nɛ wala wʋsa, m kʋ faaɛn sʋ'ʋlim la wʋsa o san'anɛ, amaa m na tis o nɛ dɔɔg yinne, David onɛ da an m sankpan'as la zug, nɛ Jerusalem teŋ kanɛ ka m gaŋ la yɛla.”
Na'ab Solomon dataas yɛla
14 Zugsɔb la da kɛ ka Na'ab Solomon dataa Hadad duoe zi'enɛ o yɛla, Hadad da anɛ Edom nid ka yi Edom na'am tuŋʋn na. 15 Saŋsi'a da bɛ ka David zabid nɛ Edom dim la, lin nya'aŋ ka Joab onɛ an soogianam kpɛɛm la keŋ ye o mum banɛ kpi la. On da keŋ la o da kʋ Edom dap la wʋsa teŋin la. 16 (Joab nɛ Israel dim la da bɛɛ anina nwadis ayuobʋ ti paae saŋkanɛ ka ba kʋ dap banɛ bɛ Edom la wʋsa.) 17 Amaa Hadad da anɛ biig nan ka zɔɔ keŋ Egipt nɛ Edom kpɛɛmnam sieba banɛ da tʋmmi tisidi o saam la san'an. 18 Ba da yinɛ Midian sʋ'ʋlimin keŋ Paran teŋgbauŋʋn. Ka nɔk Paran dap anaasi keŋ Egipt Na'ab Faaro san'an, ka o tis Hadad yir nɛ paalʋ ka tis o diib. 19 Faaro sʋnf da ma'ae nɛ Hadad hali, ka o nɔk o dakiigi tis o ka o dii o. O da anɛ o pu'a Tapenɛs pitʋ. 20 Tapenɛs pitʋ la da du'a biribiŋi tis o ka o yʋ'ʋr buon Genubaf, ka Faaro pu'a Tapenɛs da ugus o na'ayin la. Ani ka Genubaf da bɛ nɛ Faaro mɛŋ biis.
21 On da bɛ Egipt teŋin la Hadad da wʋm ye David kpiya ka Joab onɛ an soogianam kpɛɛm la mɛ kpi, ka Hadad yɛl Faaro ye, “Kɛl ka m lɛbi m mɛŋ teŋin.”
22 Ka Faaro bu'os o ye, “Bɔɔ pansigif kpɛla ka fʋ bɔɔd ye fʋ lɛbi fʋ mɛŋ teŋinɛ?” Ka Hadad lɛbis o ye, “Si'el pʋ pansigi ma, amaa kɛl ka m keŋ!”
23 Wina'am da kɛ ka Na'ab Solomon dataa yinne da duoe na ya'as. O dataa la da anɛ Rezɔn onɛ an Eliada biig, ka da zɔɔ yii o zugdaan Hadadeze onɛ an Zoba Na'ab la san'an. 24 David n da san'am Zoba zabzabidib saŋa si'a la ka Rezɔn la'as dap sieba ka ba dɔl o ka o liebi ba tuongat; ba da keŋ Damaskus teŋin zin'in ani ka sʋ'ʋgi li. 25 Solomon vʋm saŋa la Rezɔn da anɛ Israel dataa, paas nɛ Hadad n da maal yɛlsi'a la. Rezɔn n da sʋ'ʋg Aram sʋ'ʋlim saŋsi'a la, o da kisig Israel dim hali.
Jeroboam da zan'as Na'ab Solomon nɔɔr
26 Jeroboam onɛ an Nebat biig la da yi Na'ab la nya'aŋ. O da anɛ Solomon na'ayikpɛm la yinne, ka an Efiram nid ka yi Zereda teŋin na. O ma da anɛ pʋkɔɔnr ka o yʋ'ʋr buon Zerua. 27 On da yi Na'ab la nya'aŋ si'em nwa: Na'ab Solomon da mɛ' zaŋguoma banɛ gban'e Zion tempʋʋg la ka li mɔr paŋ, ka lɛm mɛɛ o saam David tempʋʋg la zaŋguoma la zin'ibanɛ da nam pʋ mɛɛ ɛnd la. 28 Jeroboam da anɛ dau kanɛ an sʋm hali, ka Solomon n da nyɛ dasaŋ nwa tʋm si'em la o da kɛ ka o sʋ'oe tʋmtʋmnib banɛ an Josef dɔɔg sʋ'ʋlim la bɛn wʋsa.
29 Lin saŋa ka Jeroboam yit Jerusalem, ka Ahija onɛ an nɔdi'es ka yi Siilo teŋin na la sia'al o suorin ka o yɛ fupaal. Babayi' la ma'aa da bɛ teŋ la yiŋ. 30 Ka Ahija gban'e fupaal kanɛ ka o yɛ la aansi li zin'is pii nɛ ayi' 31 ka yɛl Jeroboam ye, “Nɔkim piena piiga la ka li aan fʋ din. Nɛ'ɛŋa ka Zugsɔb onɛ an Israel Wina'am la yɛl ye, ‘Gɔsima, m na aaɛn sʋ'ʋlim la yis Solomon nu'ugin, ka tisif dɔɔd piiga. 32 Amaa m tʋmtʋm David zug, nɛ man gaŋ Jerusalem tempʋʋg Israel buudi la wʋsa sʋʋgin la, o na kpɛm mɔr dɔɔg yinne. 33 M ye m tʋm nɛ ala bɔzugɔ, ba tam man yɛla nɛ, ka pʋ'ʋsid Asitoref onɛ an Sidon dim teŋgban, nɛ Kemos onɛ an Moab dim teŋgban, nɛ Molek onɛ an Ammon dim teŋgban la, ka pʋ dɔlli m suorɛ, ka mɛ pʋ maal dinɛ dɔl suor bɛɛ maan dinɛ an sʋm man san'anɛ, bɛɛ dɔlli m nɔzi'ela nɛ m wada wʋʋ o saam David n da tʋm si'em la.
34 “ ‘Amaa m kʋ faaɛn sʋ'ʋlim la wʋsa Solomon nu'uginɛ, m maal o nɛ na'ab o nyɔvʋr bɛllim saŋa wʋsa, m tʋmtʋm David onɛ ka m gaŋ ka o dɔlli m nɔzi'ela nɛ m wada la zug. 35 M na aaɛn sʋ'ʋlim la nɛ o biig san'an ka tisif dɔɔd piiga. 36 M na tis o biig la dɔɔg yinne ka m tʋmtʋm David na mɔr nɛɛsim m san'an Jerusalem teŋin saŋa wʋsa, tempʋkanɛ ka m gaŋ ye m niŋi m yʋ'ʋr la. 37 Din an si'em la, ya'a kpɛlim nɛ fʋn, m na nɔkif ka kɛ ka fʋ sʋ'ʋg zin'ibanɛ ka fʋ ya'am bɔɔd wʋsa. Fʋ na an Israel wʋsa Na'ab. 38 Fʋ ya'a tʋm man ye fʋ tʋm si'em la, ka dɔlli m suoya ka tʋm dinɛ an sʋm man san'an, ka dɔlli m nɔzi'ela nɛ m wada wʋʋ m tʋmtʋm David n da tʋm si'em la, m na bɛ nɛf. M na zi'el na'adɔɔgʋ fʋ yin ka li na yuug nwɛnɛ man da zi'eli tis David si'em la, ka na tisif Israel wʋsa. 39 M na kɛ ka David yaas namis nɛ'ɛŋa zug, amaa li kʋ an saŋa wʋsaa.’ ”
40 Alazug ka Na'ab Solomon da mɔɔd ye o kʋ Jeroboam, amaa Jeroboam da zɔɔ keŋ Egipt teŋin Na'ab Sisiak san'an, bɛɛ ani hali ka Solomon ti kpi.
Na'ab Solomon kpiya
41 Ya'a kpɛlim yɛlbanɛ da maal Solomon na'am diib saŋa la, nɛ on da tʋm si'el, nɛ on pa'al o ya'am si'em, ba sɔbi li niŋ Solomon Tʋʋma Gbauŋʋn la. 42 Solomon da di na'am Jerusalem nɛ Israel teŋin nɛ yʋma pisnaasi. 43 O da maal ka'alim ka ba mum o, o yaanam san'an, David tempʋʋgin. Ka o biig Rehoboam di'e o zin'igi di na'am la.