Seba pu'ana'ab kena kaae Na'ab Solomon
10
1 Seeba pu'ana'abi da wʋm Na'ab Solomon ya'am yɛla nɛ on dɔl Zugsɔb la suor si'em la, o da kena mak o nɛ bu'oskpi'ema. 2 O da paae Jerusalem na nɛ tɛrekonam bɛdegʋ nɛ yʋgʋma ka ba ziid bʋnnyubisa nɛ sanlima bɛdegʋ nɛ kuga banɛ vɛnl ka li ligidi zu'oe la mɔri kɛn Solomon san'an na. Ka sɔns nɛ Solomon dinɛ bɛɛ o pʋtɛn'ɛrin wʋsa. 3 Solomon da gandig o bu'osa la wʋsa, si'el da kae kpi'emi tis Na'ab la ka o pʋ pian' pa'al o. 4 Seeba pu'ana'ab la da nyɛ Solomon ya'am nɛ o na'ayir kan ka o mɛ' la. 5 Ka lɛn nyɛ dikanɛ bɛɛ o diib zin'igin, nɛ o na'ayikpɛm la zin' si'em la, nɛ o yammis la yɛ fuvɛnla sieba la, nɛ banɛ gɔsid o daam, nɛ nyu'or malima dinɛ ka o maan Zugsɔb Pʋ'ʋsim Yin wʋsa la, li da lidig o nɛ hali. 6 Ka o yɛl na'ab la ye, “Man wʋmi fʋ yɛla si'em m mɛŋ teŋin nɛ fʋ ya'am la an si'em la anɛ sida! 7 Amaa m pʋ niŋ yaddaa, asɛɛ mam kena ka nyɛ nɛ m mɛŋ nini la. Sida, hali man wʋm fʋ ya'am nɛ fʋ kpan'am la yɛla si'em la pʋ paae man kena nyɛ si'el la pʋsʋkɔ. 8 Fʋ pu'ab nɛ fʋ nidib nɛ fʋ na'ayikpɛm banɛ zi'e fʋ san'an ka wʋmmi fʋ ya'am pian'ad saŋa wʋsa la mɔr zusʋŋ. 9 Na'asi bɛ nɛ fʋ Zugsɔb Wina'am onɛ nɔŋif ka zin'ilif Israel na'am gbauŋ zug la. Bɔzugɔ, Zugsɔb la nɔŋilim nɛ Israel dimi ka' naar la zug ka o diisif na'am ye fʋ kɛ ka sida nɛ pʋpielim bɛ.”10 Ka o nɔk sanlima tis Na'ab la ka li tɛbisim zu'oe hali, nɛ bʋnnyubisa nɛ kugsʋma banɛ ligidi zu'oe bɛdegʋ: lin yi saŋkanɛ ti paae zina sɔ' nan zi' mɔr bʋnnyubisa na ka li zu'oe paae Seeba pu'ana'ab la da mɔr si'el la naa.
11 (Hiram anrima la mɛ da mɔr sanlima yi Ofir sʋ'ʋlimin na, nɛ dasʋma bɛdegʋ, nɛ kugvɛnla banɛ ligidi zu'oe. 12 Na'ab la da nɔk dasʋma la maal la'ad Wina'am Pʋ'ʋsim Yir nɛ na'ayin la, ka maal kɔna nɛ bʋnnwɛ'ɛda tis banɛ nwɛ'ɛd la. Dasʋma la da zu'oe nɛ, ka sɔ' nan zi' wʋm bɛɛ nyɛɛ li buudi, din yi daakan la keŋ paae zina.)
13 Na'ab Solomon da tis Seeba pu'ana'ab la on bɔɔd si'el ka sɔs la, ka on tis o si'el nɛ o mɛŋ bɔɔdim la pʋ paasɛ. Pu'ana'ab la da lɛbi kuli o mɛŋ teŋin, on nɛ o nya'aŋ dim wʋsa.
Solomon kpan'am
14 Sanlima linɛ ka Solomon da di'esid yʋʋm wʋsa la da zu'oya hali. 15 Nɛ'ɛŋa da pʋ paas ligidkanɛ ka ba yɔɔd tigiti nɛ lampɔ la, nɛ on da di'esid sieba Arabia na'anam san'an, nɛ gɔmenanam banɛ sʋ'oe teŋ la san'an la.
16 Na'ab Solomon da nɔk sanlima maal gbanti'edʋg kɔbisyi', o da nɔk nɛ sanlim gbila kɔbisyuobʋ maal yinne wʋsa. 17 O mɛ da maal gbanti'edʋg bʋmbibis kɔbistan' nɛ sanlim gbila kɔbistan' tan', ka nɔki li niŋ Lebanon Tiis Dɔɔgin la.
18 Na'ab la da maal na'am zin'itita'ar ka pi'e li wabʋg nyina nɛ sanlima. 19 Na'am zin'isir bimbim la da mɔri dʋʋsa ayuobʋ, ka li nya'aŋ la maali an gbilli ka wa'ami dʋ zugin. Na'ab zin'isirin la mɔr nu'us pa'alʋg zin'is ka gbigim zi'e kpi'e nu'ug pa'alʋg zin'ig wʋsa. 20 Gbigima pii nɛ ayi' zi'e dʋʋsa ayuobʋ la ni, ka ayinne wʋsa bɛ nɔbir zi'elʋg kpikpɛŋ. Na'am zin'isir da lɛn kae teŋ si'a ka ba maal ka li nwɛnɛ li ya'asɛ. 21 Na'ab Solomon yin la nwama linɛ ka ba mɔri nuud nɛ na'ayin la la'ad wʋsa da anɛ sanlima, Lebanon Tiis Dɔɔgin la'ad la wʋsa mɛ da anɛ sanlima. Ba da pʋ nɔk anzurifa maal si'ela bɔzugɔ, ba da pʋ nyɛ anzurifa ka li an si'el Solomon saŋa laa.
22 Na'ab la da mɔr anrima bɛdegʋ banɛ ka ba mɔri kpiisid la ka ba bɛɛ atɛukʋn la la'as nɛ Hiram anrima la ka ba kennɛ tɔlim. Yʋma atan' wʋsa ba na lɛb na ka ziid sanlima nɛ anzurifa nɛ wabʋg nyina nɛ nwaamis nɛ kpanda.
23 Na'ab Solomon kpan'am nɛ o ya'am da gat dunia na'anam wʋsa ya'am. 24 Dunia nidib wʋsa da kennɛ o san'an na ka o pian'ad ka ba kɛlisid o ya'am kanɛ ka Wina'am niŋ o sʋnfʋn la. 25 Yʋʋm wʋsa banɛ kɛnɛ o san'an la da mɔri piini kenna tisid o, nwɛnɛ sanlima nɛ anzurifa, fuud nɛ zaba la'ad, nɛ bʋnnyubisa, nɛ widi.
26 Solomon da la'as tɛrekonam nɛ widi. O da mɔr zaba tɛrekonam tusir nɛ kɔbisnaasi (1,400) nɛ widi tusa pii nɛ ayi' (12,000), ka kɛ ka ba bɛɛ o widi tempʋʋdin la, ka sieba mɛ bɛɛ o san'an Jerusalem tempʋʋgin. 27 Na'ab la da kɛ ka anzurifa an na'ana nwɛnɛ kuga nɛ Jerusalem tempʋʋgin, ka na'aziinr dasʋma zu'oe nwɛnɛ kekama daadi zu'oe kʋkʋna teŋir si'em la. 28 Na'ab Solomon da da'ad o widi la nɛ Egipt nɛ Kuoe sʋ'ʋlimin, o kpikpinkpinnib la da da'adi ba nɛ Kuoe sʋ'ʋlimin. 29 Ba da da'ad tɛreko yinne Egipt nɛ anzurifa ligidi kɔbisyuobʋ (600), ka mɛ da'ad wief yinne anzurifa ligidi kɔbiga nɛ pisnu (150). Ba da da'adi ba nɛ tɔlisidi kuosidi tisid Hitti dim nɛ Aram dim na'anam la wʋsa.