Wina'am nie o mɛŋi pɛ'ɛs nɔɔr ayi' tis Solomon
9
1 Solomon n da mɛ' Zugsɔb Yir nɛ na'ayir la naae ka maal on bɔɔd ye o maal si'el wʋsa naae la, 2 Zugsɔb la nie o mɛŋi pa'al o pɛ'ɛs nɔɔr ayi' nwɛnɛ on da nie o mɛŋ o san'an Gibeon teŋin si'em la. 3 Zugsɔb la da yɛl o ye,“M wʋmi fʋ nu'ug nwɛ'ɛb nɛ fʋ sɔsʋg dinɛ ka fʋ mɔri kɛɛn m san'an na la. M maal yikaŋa linɛ ka fʋ mɛ' ka pɛsigi tisim la ka li an kasi, ka niŋi m yʋ'ʋri ani ka li na bɛ saŋa wʋsa. M nini nɛ m sʋnf na bɛ ani saŋa wʋsa.
4 Ya'a kpɛlim nɛ fʋ, fʋ ya'a dɔllim nɛ pʋʋg nyain nɛ sida, wʋʋ fʋ saam David n da tʋm si'em la, ka dɔlis man yɛlif si'em la ka tɛnri m nɔzi'elʋg nɛ m wada la, 5 m na kɛ ka fʋ na'am zi'e kiŋ-kiŋ Israel teŋin saŋa dinɛ ka' bɛnnɛ, wʋʋ man da zi'el nɔɔri tisi fʋ saam David ye o kʋ kɔ'ɔŋ dau onɛ na zin'in Israel na'am gbauŋ zug la.
6 Amaa fʋn bɛɛ fʋ biis ya'a fɛndigi yi mam san'an ka pʋ tɛnri m nɔzi'elʋg nɛ m wada banɛ ka m tis la, ka tɔɔm keŋ pʋ'ʋsid winsieba ka tʋmmi tisidi ba, 7 m na nwaae danzuunri vi' Israel dim teŋ kanɛ ka m tisi ba la ni ka zan'as Pʋ'ʋsim Yikaŋa dinɛ ka m maal kasi m yʋ'ʋr zug la; m na kɛ ka sɔ' ya'a wʋm Israel nidibi tɔndig si'em la ba na la'adi ba. 8 La'am nɛ yikaŋa vɛnl si'em ka li yʋ'ʋr dʋ la, nimbanɛ gat wʋsa na nyɛɛ li ka pin' nɔɔr ka yɛt ye, ‘Bɔ ka Zugsɔb la maal teŋ kaŋa nɛ pʋ'ʋsim yikaŋa wala?’ 9 Ka nidib na lɛbis ye, ‘Ban basi ba Zugsɔb Wina'am onɛ mɔri ba yaanamɛ yi Egipt na la zug, ba di'e winsieba pʋ'ʋsidi ba ka tʋmmi tisidi ba, dinɛ kɛ ka Zugsɔb la mɔr yɛlbɛ'ɛd kaŋa kɛɛn ba zugin na la.’ ”
Na'ab Hiram nɛ Solomon tia'as piini
10 Yʋʋm pisi ka Solomon da zaŋi mɛ' Zugsɔb Pʋ'ʋsim Yir nɛ na'ayir la naae, 11 ka nɔk Galile sʋ'ʋlim tempʋʋd pisi tis Hiram onɛ an Taya na'ab la, bɔzugɔ Hiram da tis o na'aziinr daad nɛ dawa'ama nɛ sanlima dinɛ ka o bɔɔd la. 12 Amaa Hiram da yi Taya keŋ ye o gɔs tɛɛns banɛ ka Solomon tis o la, o sʋnf da pʋ ma'ae. Ka o bu'os Solomon ye, 13 “M ba'abiiga, teŋ bɔ buudi nwana ka fʋ tisi ma?” Ka pʋdi li ye Kabul Teŋ.a Ba nan kpɛn buonnɛ linɛ ala zina. 14 Hiram mɛ da tis na'ab la nɛ sanlima ka li tɛbisim zu'oe hali.
Na'ab Solomon la'as nidib
15 Na'ab Solomon da la'as tʋmtʋmnib ka ba tʋmmi tisid o, ka ba mɛ' Zugsɔb Pʋ'ʋsim Yir nɛ na'ayir la, ka lɛn kɛ ka ba mɛ' buos banɛ ti'e Zion teŋ zaŋguom la ka li mɔr paŋ la, ka lɛm mɛ' Jerusalem teŋ zaŋguoma, ka maligim mɛ' Hazo teŋ nɛ Megido teŋ nɛ Giza teŋ. 16 (Faaro onɛ an Egipt na'ab la da zabi nyaŋ Giza ka nyu'oe li bugum ka kʋ Keenan nidib ka nɔki tis o pu'ayua onɛ an Solomon pu'a la, ka li aan o sid kulig piini, 17 dinzug ka Solomon maligim mɛ' Giza). O da kɛ ka o tʋmtʋmnib la mɛ' Bet-Horon linɛ bɛ teŋir la, 18 ka mɛ' Baalaf teŋ nɛ Tadimɔ teŋ dinɛ bɛ pipirigin ka bɛɛ o sʋ'ʋlimin la. 19 Mɔri ala paae tempʋbanɛ ka o digin la'ad la, nɛ tɛɛns banɛ ka o zaba tɛrekonam nɛ widi bɛ la. Ka lɛn kɛ ka ba mɛ' on da bɔɔd ye o mɛ' si'el Jerusalem nɛ Lebanon nɛ sʋ'ʋlim kanɛ ka o sʋ'oe la wʋsa.
20 Nimbanɛ da kpɛlim teŋin la ka ka' Israel dim da anɛ Amor dim nɛ Hitti dim nɛ Perizi dim nɛ Hivi dim nɛ Jebus dim. 21 Nimbama da aan ba yaas banɛ da kpɛlim teŋin la ka Israel dim pʋ kʋʋ ba. Nimbama ka Na'ab Solomon da la'asi ba mugus ka ba aan o tʋmtʋmnib nwɛnɛ din an si'em paae zina la. 22 Amaa Solomon da pʋ kɛ ka Israel nidib la baa yinne tʋmma. Ba da anɛ zabzabidib nɛ na'ayikpɛm nɛ kpi'emnam nɛ o soogianam tuongatib nɛ o zaba tɛrekonam tuongatib nɛ banɛ dɔribid tɛrekonam la. 23 Ba da lɛn anɛ kpɛɛmnam banɛ gɔsid Solomon tʋʋma. Nidib kɔbisnu nɛ pisnu da gɔsid nimbanɛ tʋm tʋʋma la.
24 Faaro pu'ayua la da yi David tempʋʋginɛ lɛb na'ayir kanɛ ka Na'ab Solomon mɛɛ tis o la ni la, li nya'aŋ Na'ab la da mɛ' buos banɛ ti'e teŋ la zaŋguoma ka li mɔr paŋ la.
25 Yʋʋm pʋʋgin, nɔɔr atan' ka Solomon maan nyu'or malʋŋ nɛ taaba la'asʋg maan bimbim kanɛ ka o mɛɛ tis Zugsɔb la ni, ka nyu'od tudaari Zugsɔb la tuonnɛ paasid. Ka maan dinɛ sʋm ye o maal Zugsɔb Pʋ'ʋsim Yin la wʋsa.
26 Na'ab Solomon da lɛm maal anrima Eziyon Geber teŋin, dinɛ kpi'e Elaf teŋin ka bɛ Edom sʋ'ʋlimin linɛ bɛ Atɛuk Zɛn'ug nɔɔrin la. 27 Hiram da tʋm o nimbanɛ mi' anrʋŋ tʋʋma sʋ'ʋŋa ka ba keŋ la'as nɛ Solomon nidib la ka ba tʋm anrima la tʋʋma. 28 Ba mɔr anrima la lɔ'ɔŋ Ofir sʋ'ʋlim mɔr sanlim gbila tusir nɛ pisi nɛ awai lɛb na tis Na'ab Solomon.