Tʋʋmbanɛ ka Solomon lɛn tʋm ya'as
8
1 Na'ab Solomon da zaŋ nɛ yʋma pisi mɛ' Zugsɔb Pʋ'ʋsim Yir nɛ na'ayir la naae. 2 Na'ab Solomon da maligim mɛ' teŋkpɛmis banɛ ka Na'ab Hiram da tis o la, ka zin'il Israel dim ani. 3 Solomon yʋ'ʋn da keŋ Hamat Zoba teŋin zabi faaɛn li. 4 O mɛ da mɛ' Tadimɔ tempʋʋg linɛ bɛ pipirigin la, nɛ tempʋbanɛ bɛ Hamat sʋ'ʋlimin la nɛ ba la'ad dɔɔd. 5 O mɛ da mɛ' Bet Horon Linɛ Bɛ Zuor Zug nɛ Bet Horon Linɛ Bɛ Teŋir la, ka ba an zin'ibanɛ ka sɔ' kʋ tun'e zabi nyaŋ na'anaa, ka li mɔr zaŋguoma nɛ za'anɔya nɛ dapirida, 6 la'am nɛ Baalaf tempʋʋgin mɔr ala paae tempʋbanɛ ka o nɔk o la'adi digil la, nɛ tɛɛns banɛ ka o zaba tɛrekonam nɛ widi bɛ la. Ka lɛn kɛ ka ba mɛ' on da bɔɔd ye o mɛ' si'el Jerusalem tempʋʋgin nɛ Lebanon teŋgbauŋʋn nɛ sʋ'ʋlim kanɛ ka o sʋ'oe la wʋsa. 7 Nimbanɛ da kpɛlim teŋin la nɛ Israel dim la da anɛ Amor dim nɛ Hitti dim nɛ Perizi dim nɛ Hivi dim nɛ Jebus dim. Nimbama da ka' Israel buudi. 8 Ba da anɛ buudsieba yaas, banɛ da kpɛlim teŋin la ka Israel dim da pʋ kʋʋ baa. Nimbama ka Solomon da zaŋi ba ka ba aan o tʋmtʋmnib hali paae zina. 9 Amaa Solomon da pʋ kɛ ka Israel nidib la baa yinne tʋm alaa. Ba da anɛ zabzabidib nɛ na'ayikpɛm nɛ kpi'emnam nɛ o soogianam tuongatib nɛ o zaba tɛrekonam tuongatib nɛ banɛ gɔsid tɛrekonam la. 10 Ba da lɛn anɛ kpɛɛmnam banɛ gɔsid Solomon tʋʋma. Nidib kɔbisyi' nɛ pisnu da gɔsid nimbanɛ tʋm tʋʋma la.11 Solomon da nɔk Faaro pu'ayua la yi David tempʋʋgin la mɔr o lɛb na'ayir kanɛ ka o mɛɛ tis o la. O da yɛl ye, “M pu'a nwa kʋ bɛ David onɛ da an Israel na'ab la yinne, bɔzugɔ zin'ibanɛ ka Zugsɔb daka la keŋ la anɛ kasi.”
12 Zugsɔb maan daka linɛ ka Na'ab Solomon da mɛ' Pʋ'ʋsim Dɔɔg za'ambɛŋ la tuon la zugin ka o da maan nyu'or maana tisid Zugsɔb la. 13 Ka li dɔl wʋʋ daar wʋsa maannɛ nar ye li maal si'em, wʋʋ Moses n da tis nɔɔr si'em zaŋi ken Vʋ'ʋsʋm Daar la yɛla, nɛ nwadpaalig nɛ malima atan' banɛ maan yʋʋm-yʋʋm ka an Bodobodo Dinɛ Ka' Danbin Malʋŋ la, nɛ Bakuainam Malʋŋ nɛ Sʋga Gbɛɛnb Malʋŋ la. 14 O da dɔl o saam David suoya la, ka gaŋ maanmaannibi pʋdigi ba niŋ sɔ' wʋsa nɛ o tʋʋma zin'ig, nɛ Levi dɔɔg dim la ye ba gaad yʋʋmyʋ'ʋmnib la tuon ka sʋŋid maanmaannib la wʋʋ daar wʋsa tʋʋma nari li an si'em. O mɛ da gaŋ za'anɔgu'udibi pʋdigi ba ka ba gur za'anɔɔr wʋsa, bɔzugɔ ala ka David onɛ da an Wina'am nid la da zi'el. 15 Ba da pʋ tiak si'eli zaŋi ken Na'ab la zi'el si'em tis maanmaannib la bɛɛ Levi dim la baa bi'elaa, la'am nɛ la'ad su'ab zin'is la wʋsa.
16 Na'ab Solomon n da gban'e ye o tʋm si'el la wʋsa, ba da tʋmi li, lin pin'il Zugsɔb Yir la ɛɛnbirin, keŋ paae li bɛn. Zugsɔb Pʋ'ʋsim Yir la da mɛɛ naae.
17 Ka Na'ab Solomon da keŋ Eziyon Geber teŋin nɛ Elaf teŋin, tembanɛ bɛ Atɛuk nɔɔrin, Edom baba la. 18 Ka Na'ab Hiram da tis o anrintitada ka o mɛŋ nimbanɛ mi' anrʋŋ tʋʋma sʋ'ʋŋa la mɔri keŋ, bama nɛ Solomon mɛŋ nidib la da mɔr anrima la lɔ'ɔŋ Ofir sʋ'ʋlim ka mɔr sanlima lɛb na tis Na'ab Solomon ka li tɛbisim zu'oe hali.