Solomon n nɔk Pʋ'ʋsim Yir la tis Wina'am la
7
1 Solomon n da pʋ'ʋsi naae la, bugum da yii agɔlli sig nyu'or maan la zug na dii li nɛ maana la wʋsa, ka Zugsɔb girima nɛ nɛɛsim sig na pɛ'ɛl Dɔɔg la. 2 Maanmaannib la da pʋ nyaŋi kpɛn' Pʋ'ʋsim Dɔɔgin la bɔzugɔ Zugsɔb girima da sig na pɛ'ɛl Dɔɔg la. 3 Israel nidib la da nyɛ ka bugum sig na ka Zugsɔb girima bɛ Dɔɔg la zug la, ba da igini ba duma zug, za'ambɛŋ la teŋsʋk, ka su'uni ba zut teŋin ka dʋ'ʋs Zugsɔb la yʋ'ʋr ka pʋ'ʋs o bareka, yɛt ye,“onɛ an sʋm;
o nɔŋilim la bɛ nɛ saŋa linɛ ka' bɛnnɛ.”
4 Ka Na'ab la nɛ nidib la wʋsa da maal maan Zugsɔb la tuon. 5 Ka Na'ab Solomon da maal nɔnaar malʋŋʋ tis Wina'am nɛ niigi tusa pisi nɛ ayi' (22,000) nɛ pɛ'ɛs nɛ bʋʋs tusa kɔbiga nɛ pisi (120,000), ka Na'ab la nɛ Israel dim la nɔk Pʋ'ʋsim Yir la niŋ Zugsɔb la nu'ugin. 6 Maanmaannib la da lɛb lin nar ye ba bɛ zin'isi'a la, ka Levi dim la mɛ da niŋ ala, ka ba nwɛ'ɛd Zugsɔb yʋʋma bʋnnwɛ'ɛda linɛ ka Na'ab David da maal ye ba mɔri dʋ'ʋsid Wina'am yʋ'ʋr la. Ba da nɔki nwɛ' on da pʋ'ʋs Zugsɔb bareka yɛt ye,
“O nɔŋilim la bɛ nɛ saŋa linɛ ka' bɛnnɛ.”
Maanmaannib la da zi'e nɛ Levi dim la kpikpɛŋi piebid na'atana, ka Israel dim la wʋsa zi'e agɔla.
7 Na'ab Solomon da pɛsig paalʋ si'a linɛ bɛ Pʋ'ʋsim Yir la zak la teŋsʋk dɔtita'ar la tuon, ye li an maan zin'ig. Anina ka o maal nyu'or maan nɛ zʋʋd maan nɛ bʋnkɔnbid kpaam linɛ an taaba la'asʋg maan la, bɔzugɔ kʋntzɛn'ug malʋŋ daka kanɛ ka o maal la kʋ nyaŋi di'e malima buudi la wʋsa, lin zu'oe galis la zug.
8 Ka Solomon nɛ Israel dim la wʋsa da lɛm maal Sʋga Gbɛɛnb Malʋŋ la daba ayɔpɔi. Nidib la da zu'oe nɛ hali. Ba da yinɛ Lebo-Hamat teŋin, keŋ paae kɔlbil linɛ bɛ Egipt teŋ titɔndigin la. 9 Daba anii daar la ba da la'as taaba bɔzugɔ ba da maal di'ema maan daka la yɛla nɛ daba ayɔpɔi ka mɛ di Sʋga Gbɛɛnb Malʋŋ la daba ayɔpɔi paas. 10 Nwadis ayɔpɔi la ni, li dabpisi atan' daar ka o da kɛ ka nidib la lɛbi kuli ba yaan, ka sumpielim nɛ sumalisim pɛ'ɛli ba sʋnya, yɛlsʋm kanɛ ka Zugsɔb la maali tis Na'ab David nɛ Na'ab Solomon nɛ Israel nidib wʋsa la zug.
Zugsɔb la nie o mɛŋi tis na'ab Solomon la yɛla
11 Solomon n da mɛ' Zugsɔb Yir nɛ na'ayir la naae ka maal on bɔɔd ye o maal Zugsɔb Pʋ'ʋsim Yin la nɛ na'ayir linɛ ka o bɛ la si'em la, 12 Zugsɔb la da nie o mɛŋi pa'al o yʋ'ʋŋ ka yɛl ye,
“M wʋmi fʋ sɔsʋg ka gaŋ zin'ikaŋa tisim mɛŋ ka li na an maan Yir.
13 M ya'a ti yɔɔ agɔl ka saa pʋ niida, bɛɛ kɛ ka na'azɔmnam kena san'am zʋʋd la, bɛɛ kɛ ka ban'as kɛɛn m nidib la san'an na, 14 m nimbanɛ ka m buol nɛ m yʋ'ʋr la ya'a sie ba mɛŋ ka iee m zin'ig, ka sɔs ka fɛndigi basi ba tʋʋmbɛ'ɛd, m na naan arezana ni ka wʋm ka kɛɛ ba tʋʋmbɛ'ɛd taali bas ka kɛ ka teŋ la paam laafi. 15 Nannanna m nini na yɔ'ɔg ka m tʋba kɛlisid winsɔsʋg kanɛ ka ya sɔsid kpɛla. 16 Man gaŋ Pʋ'ʋsim Yikaŋa ka maali li nyain linɛ na kɛ ka m yʋ'ʋr bɛɛ ani saŋa linɛ ka' bɛnnɛ. M nini nɛ m sʋnf na bɛɛ ani saŋa wʋsa.
17 Ya'a kpɛlim nɛ fʋ, fʋ ya'a dɔllim nɛ pʋʋg nyain nɛ sida, wʋʋ fʋ saam David n da tʋm si'em la, ka dɔlis man yɛlif si'em la ka tɛnri m nɔzi'ela nɛ m wada la, 18 m na kɛ ka fʋ na'am zi'en kiŋ-kiŋ Israel teŋin saŋa linɛ ka' bɛnnɛ, wʋʋ man da zi'el nɔɔri tisi fʋ saam David ye o kʋ kɔ'ɔŋ dau onɛ na zin'in Israel na'am gbauŋ zug la.
19 Amaa fʋ ya'a fɛndigi yi mam san'an ka pʋ tɛnri m nɔzi'elʋg nɛ m wada banɛ ka m tis la, ka tɔɔm keŋ pʋ'ʋsid winsieba ka tʋmmi tisidi ba, 20 m na nwaae danzuunri vi' Israel dim teŋ kanɛ ka m tisi ba la ni, ka zan'as Pʋ'ʋsim Yikaŋa dinɛ ka m maal kasi m yʋ'ʋr zug la. M na kɛ ka nidib wʋsa la'ad ka nɛ'ɛsidi li. 21 La'am nɛ Yikaŋa an sʋ'ʋŋa ka li yʋ'ʋr dʋ la, nimbanɛ gat wʋsa na nyɛ ka li an bɛ'ɛd ka ba kɛɛnd ka bu'osid taaba ye, ‘Bɔ ka Zugsɔb la maal teŋ kaŋa nɛ Yikaŋa wala?’ 22 Ka nidib na lɛbis ye, ‘Ban basi ba Zugsɔb onɛ aan ba yaanam Wina'am, ka da mɔri ba yi Egipt na la zug, ka di'e winsieba pʋ'ʋsidi ba ka tʋmmi tisidi ba la, linɛ kɛ ka Zugsɔb la mɔr yɛlbɛ'ɛd kaŋa kɛɛn ba zugin na.’ ”