Na'ab Solomon zaŋ antu'a si'a tis o nidib la
6
1 Ka Solomon yɛl ye, “Zugsɔb la yɛl ye o na bɛ saŋgbansabilin. 2 M sid mɛ' yir kanɛ vɛnl hali tisif, zin'ikanɛ ka fʋ na bɛ saŋa wʋsa.” 3 Israel dim wʋsa da zi'e anina la, ka Na'ab la gi'e kaanb, kaanb sʋŋʋ tisi ba wʋsa. 4 Ka yɛl ye,“Na'asi anɛ Zugsɔb la din, onɛ an Israel Wina'am la. Onɛ nɔk o mɛŋ nu'ugʋ kɛ ka on da zi'el si'el nɛ o mɛŋ nɔɔri tisim saam David la niŋ amɛŋa. Bɔzugɔ o da yɛl ye, 5 ‘Din yi daar kanɛ ka m mɔri m nidib Israel dimi yi Egipt na la, m pʋ gaŋ tempʋʋg Israel buudi la sʋʋgin ka ba mɛ' yir ka mam yʋ'ʋr na bɛɛ ani, bɛɛ m gaŋ sɔ' ye o guri m nidib Israel dimi tisi ma. 6 Amaa nannanna m gaŋnɛ Jerusalem ye m yʋ'ʋr bɛɛ ani, ka mɛ gaŋ David ye o guri m nidib Israel dim la.’
7 M saam David da mɔr o pʋtɛn'ɛrin ye o na mɛ' yir Zugsɔb la yʋ'ʋr yɛla, onɛ an Israel Wina'am la. 8 Amaa Zugsɔb la da yɛli m saam David ye, ‘Din sadigim bɛɛ fʋ pʋtɛn'ɛrin ye fʋ na mɛ' yir mam yʋ'ʋr zug la, fʋ maal sʋ'ʋŋa nɛ fʋn mɔr nɛ'ɛŋa fʋ sʋnfʋn la. 9 La'am nɛ wala ka' fʋnɛ ye fʋ mɛ' yir la, amaa fʋ biig onɛ aan fʋ mɛŋ biig la, onɛ an onɛ na mɛ' yir la mam yʋ'ʋr zug.’
10 Nannanna Zugsɔb la dɔl o kaanbʋg: m di'e m saam David zin'ig, ka zin' Israel na'am gbauŋ la zug nwɛnɛ Zugsɔb la kaanb si'em la. Ka mɛ' yir Zugsɔb la yʋ'ʋr zug, onɛ an Israel Wina'am la. 11 M maal daka la zin'ig anina, dinɛ an nɔnaar ka Zugsɔb la maal nɛ ti yaanam on da mɔri ba yi Egipt na la.”
Solomon n yɔ'ɔg Zugsɔb yir la nɛ winsɔsʋg si'em
12 Solomon da duoe zi'en Zugsɔb malʋŋ daka la tuon ka Israel nidib la wʋsa nyɛt o, ka o yadig o nu'us. 13 Saŋkaŋa o da mɛ' daka nɛ kʋntzɛn'ug, ka li wa'alim an makir ayɔpɔi nɛ pʋsʋk, ka yalʋŋ mɛ an makir ayɔpɔi nɛ pʋsʋk ka linɛ dʋ zugin la an makir anaasi nɛ pʋsʋk. O da zi'eli li zak la teŋsʋk. O da dʋ daka la zug ka igin Israel nidib la wʋsa tuon ka ʋk o nu'usi kpa' arezana 14 ka yɛl ye,
“Ti Zugsɔbaa, Israel Wina'am, win si'a lɛn kae arezana bɛɛ dunia nwa nwɛnɛ fʋnɛ, fʋn kanɛ dɔlli fʋ nɔnaar linɛ an nɔŋilim nɛ tinam banɛ aan fʋ yammis ka dɔlli fʋ suor nɛ ti sʋnf wʋsa la. 15 Fʋ dɔlli fʋ kaanbʋg linɛ ka fʋ tisi fʋ sankpan'as David onɛ aan m saam la. Fʋ mɛŋ nɔɔri kaanb, ka fʋ mɛŋ paŋ ka fʋ kɛ ka li lieb amɛŋa zina nwa.
16 Nannanna m Zugsɔb onɛ an Israel Wina'am, kɛl ka fʋn kaanb si'em tisi fʋ sankpan'as m saam David la niŋ amɛŋa. Fʋ zi'el nɔɔri yɛl ye, fʋ kʋ kɛ ka o tuŋ kɔ'ɔŋ dau onɛ na bɛɛ fʋ tuon, ka na zin'in Israel na'am gbauŋ la zugɔ. Ye, o biis la on ya'a gu'usid ka dɔlisidi m zi'ela la wʋʋ on niŋ si'em la, li na niŋ ala. 17 Ka nannanna, Israel Wina'am, kɛl ka fʋn pian' si'em zi'eli m saam David la lieb amɛŋa.
18 Ka Wina'am sid na nyaŋi bɛ ninsaalib san'an dunia nii? Ayei! Hali agɔla saŋgbana zin'ikanɛ zu'oe la kʋ sia'al nɛ fʋ na bɛɛ ani, ka kɛl yir kanɛ ka mam mɛ' nwaa. 19 La'am nɛ wala, kɛlisimi m sɔsʋg ka zɔɔ m nimbaanlig, m Zugsɔb Wina'am; kɛlisimi m kaasig nɛ m winsɔsʋg kanɛ ka m sɔsidi fʋ tuon zina dabisir nwa, ka m anɛ fʋ sankpan'as. 20 Kɛl ka fʋ nindaa kpa' yikaŋa nwa yʋ'ʋŋ nɛ nintaŋ wʋsa, zin'ikaŋa ka fʋ yɛl ye fʋ yʋ'ʋr na bɛɛ anina la, ka wʋm sɔsʋg kanɛ ka m na ti kpa' yikaŋa nwa na sɔs la. 21 Kɛlisim man nɛ fʋ nidib Israel dim winsɔsʋg, ti ya'a ti kpa' zin'ikaŋa nwa na sɔsidif. Wʋmi li arezana ni fʋn bɛ zin'isi'a la, ka fʋ ya'a wʋm, fʋn kɛlli ti taali bas.
22 Sɔ' ya'a tʋm o kpi'a bɛ'ɛd ka li an ye o pɔɔ pa'al o bʋʋd, ka o kɛn yikaŋa ni na pɔ fʋ bimbim la tuon, 23 fʋn wʋmi li arezana ni ka kad saria fʋ yammis ayi' la sʋʋgin. Kɛl ka onɛ tʋm bɛ'ɛd la taal lɛb o mɛŋ zugin. Da kɛ ka onɛ pʋ tʋm bɛ'ɛd la di nyannɛ. Kɛl ka o di bʋʋd.
24 Fʋ nimbanɛ an Israel dim la dataas ya'a nyaŋi ba ka li anɛ ba tʋmnɛ bɛ'ɛdi pɔ'ɔgif zug, ba ya'a fɛndigi lɛbi fʋ san'an na ka buoli fʋ yʋ'ʋr, ka sie ba mɛŋi sɔs yikaŋa pʋʋgin, 25 fʋn naanim arezana ni ka wʋm ka kɛɛ fʋ nidib Israel dim tʋʋmbɛ'ɛdi bas, ka mɔri ba lɛb teŋ kanɛ ka fʋ tisi ba yaanam la ni na.
26 Arezana ya'a ti yɔ' ka saa pʋ niida, fʋ nidibi tʋm tʋʋmbɛ'ɛd pɔ'ɔgif la zug, ba ya'a ti kpa' zin'ikaŋa ka sɔsidif ka buoli fʋ yʋ'ʋr ka fɛndigi ba tʋʋmbɛ'ɛdin, fʋn namisi ba la zug, 27 fʋn naanim arezana ni ka wʋm, ka kɛ Israel dim la tʋʋmbɛ'ɛdi bas, bɔzugɔ ba anɛ fʋ yammis. Pa'alimi ba bɛllim kanɛ an sʋm ka ba na bɛ, ka kɛ ka saa ni teŋ kanɛ ka fʋ tisi fʋ yammis ye ba sʋ'oe la.
28 Kɔ'ɔm bɛɛ ban'as ya'a ti li teŋin la, bɛɛ ya ya'a bʋd zʋʋd ka wiim gban'e, bɛɛ na'azɔmnam bɛɛ sisɔma li teŋ la zug, bɛɛ ba dataasi giligi ba tempʋʋsin la bɛɛ tɔɔg bɛɛ ban'asi'a ya'a paae ba, 29 ka fʋ nimbanɛ an Israel dim la ya'a sɔsif bɛɛ nwɛ' nu'ug, sɔ' mɛkama mi' tɔɔg kanɛ bɛɛ o sʋnfʋn, ka o ya'a ʋk o nu'usi kpa' yikaŋa na, 30 fʋn naanim arezana dinɛ aan fʋ bɛllim zin'ig la ka wʋm, ka kɛɛ ba taali bas ka tis sɔ' wʋsa din nar ye o di'e si'el, bɔzugɔ fʋn ma'aa mi' ninsaal wʋsa sʋnf. 31 Ala ka ba na zɔtif saŋa wʋsa ka bɛ teŋ kanɛ ka fʋ tisi ba yaanam la ni.
32 Ya'a kpɛlim nɛ saan, onɛ pʋ pɛ'ɛsi fʋ nidib Israel diminɛ, ka yi teŋ lalli kɛɛn fʋ yʋ'ʋr zug na la, ka on wʋmi fʋ nu'ug kanɛ mɔr paŋ la yɛla, nɛ fʋ nu'ug kanɛ yalim hali la, ka o ya'a ti kena kpa' Yikaŋa ka sɔsif, 33 fʋn naanim arezana ni fʋ bɛllim zin'ig la ka wʋmi o sɔsʋg ka tis saan la on bɔɔd si'el wʋsa. Ka dunia dim na baŋi fʋ yʋ'ʋr ka zɔtif wʋʋ fʋ nidib Israel dimi zɔtif si'em la, ka baŋ ye Yikanɛ ka m mɛ' la bɛ nɛ fʋ yʋ'ʋr zug.
34 Fʋ nidib ya'a ti zabid nɛ ba dataas zin'ikanɛ wʋsa ka fʋ na kɛ ka ba keŋ, ba ya'a ti kpa' tempʋkanɛ ka fʋ gaŋ, nɛ Yir kanɛ ka m mɛɛ fʋ yʋ'ʋr zug la na ka sɔsid fʋn kanɛ aan ti Zugsɔb la, 35 fʋn wʋm arezana ni, fʋ bɛllim zin'ig la, ka kɛlisi ba nu'ug nwɛ'ɛb nɛ ba sɔsʋg ka sʋŋi ba.
36 Ba ya'a ti tʋm tʋʋmbɛ'ɛdɛ pɔ'ɔgif bɔzugɔ sɔ' kae pʋ tʋm bɛ'ɛdɛ; ka fʋ sʋnf ya'a ti duoe nɛ ba ka fʋ nɔki ba tisi ba dataas ka ba mɔri ba keŋ teŋ lalli bɛɛ yammin, 37 ka ba tiaki ba sʋnf zin'ikanɛ ka ba mɔri ba keŋ ka ba an yammis la, ba ya'a tiak ka nwɛ'ɛf nu'ug teŋ kanɛ ka ba mɔri ba keŋ la ni, ka yɛl ye, ‘Ti tʋm tʋʋmbɛ'ɛd, ti maal dinɛ ka' sʋm, ti tʋm linɛ an bɛ'ɛd.’ 38 Ba ya'a ti fɛndigi lɛbi fʋ san'an na nɛ ba sʋnya nɛ ba siig wʋsa ban an yammis teŋ si'a la ni, ka kpa' teŋ kanɛ ka fʋ tisi ba yaanam la na, nɛ tempʋkanɛ ka fʋ gaŋnɛ Yir kanɛ ka m mɛɛ fʋ yʋ'ʋr zug la sɔsidif, 39 fʋn wʋmmi ba sɔsʋg nɛ ba fabʋlʋg fʋn bɛ zin'isi'a arezana ni la ka ka sʋŋi ba. Ka kɛɛ fʋ nidib la tʋʋmbɛ'ɛd taali bas.
40 Nannanna, m Wina'am, kɛlli fʋ nimbanɛ tʋm tʋʋmbɛ'ɛdi pɔ'ɔgif la taali bas. Kɛl linɛ ka ba pɔ'ɔgif la wʋsa bas, ka kɛ ka banɛ nyaŋi ba ka mɔri ba keŋ la zɔɔ ba nimbaanlig.
41 Nannanna duom, O Zugsɔb Wina'am,
kɛɛn fʋ vʋ'ʋsʋm zin'igin la na,
fʋn nɛ fʋ Nɔnaar Daka linɛ aan fʋ paŋ zanbin la.
Kɛl ka fʋ maanmaannib la yɛ faangir wʋʋ fuud nɛ,
kɛl ka fʋ nidib la maal sumalisim fʋ tʋʋm sʋma la zug.
42 O Zugsɔb Wina'am, da zan'as man kanɛ ka fʋ bu'oe malʋŋ kpaam niŋim zug la.
Tiɛnm nɔŋilim kaanbʋg
linɛ ka fʋ daa kaanbi tisi fʋ tʋmtʋm David la.”