5
1 Na'ab Solomon n da tʋm Zugsɔb Pʋ'ʋsim Yir tʋʋma la naae la, o da mɔr la'abanɛ ka o saam David da pɛsig ka li an anzurifa nɛ sanlima nɛ la'ad la wʋsa kpɛn'ɛs Zugsɔb Pʋ'ʋsim Yir la'ad la dɔɔdin.Ban kpɛn'ɛs Wina'am nɔnaar daka o pʋ'ʋsim dɔɔgin la yɛla
2 Na'ab Solomon da buol Israel tuongatib wʋsa o san'an Jerusalem teŋin. Ba da anɛ dɔɔd kpɛɛmnam nɛ yir kpɛɛmnam wʋsa, ka yɛli ba ye ba mɔr Zugsɔb Nɔnaar Daka yi Zion dinɛ an David tempʋʋg la na. 3 Israel nidib la wʋsa da kɛn Na'ab Solomon san'an na malʋŋ la saŋa, nwadis ayɔpɔi la ni. 4 Israel kpɛɛmnam la da paae na la, ka Levi dim la nɔk Nɔnaar Daka la mɔri keŋ. 5 Ka ba nɔk Nɔnaar Daka la, nɛ Fuug Sʋgʋr dinɛ an La'asʋg Zin'ig la, nɛ la'abanɛ an Zugsɔb la din, ka an kasi la mɔri kena. Maanmaannib banɛ an Levi dim la da zii ba kena. 6 Ka Na'ab Solomon nɛ Israel dim banɛ bɛɛ o san'an la bɛ Daka la tuonnɛ kʋʋd pɛ'ɛs nɛ niigi bɛdegʋ maan malima, ka sɔ' kʋ nyaŋi sɔb ban an si'em bɛɛ kaalɛ.
7 Ka maanmaannib la mɔr Zugsɔb Nɔnaar Daka la kpɛn'ɛsi li bɛllim zin'ig, Kasi Wʋsa Kasi Zin'igin, dɔkanɛ bɛ pʋʋgin la, Zugsɔb Pʋ'ʋsim Dɔɔg zin'ikanɛ an kasi ka an nyain la ni. Ba da zi'eli li Kerubnam la kpʋkpama lɛuŋʋn, 8 ka Kerubnam la yadigi ba kpʋkpama daka la bɛ zin'isi'a nɛ daad banɛ bɛ Daka la ni ka ba ɛɛnti gban'adi ziid la. 9 Dabama da wa'am nɛ hali, ka fʋ na nyaŋi zi'e Zin'isʋŋin la ka nyɛɛ li, amaa fʋ ya'a bɛ Zugsɔb Pʋ'ʋsim Dɔɔg la yiŋ, fʋ kʋ nyɛɛ lii. Ba nan kpɛm bɛɛ ani hali nɛ zina. 10 Si'el-si'el da ka' Daka la nii asɛɛ kuglamma ayi' banɛ ka Moses da niŋi li pʋʋgin Horeb zuorin, zin'ikanɛ ka Zugsɔb la da maal nɔnaar nɛ Israel dim ban da yi Egipt na nya'aŋ la.
11 Maanmaannib la yʋ'ʋn da naan Kasi Zin'igin la yina. Saŋkan la ka maanmaannib la wʋsa pʋn maali ba mɛŋ kasi ka li ba'a kae nɛ ban bɛ kɔn'ɔb-kɔn'ɔb si'em. 12 Levi nimbanɛ da an yʋʋmyʋ'ʋmnib la wʋsa; da anɛ: Asaf nɛ Heman nɛ Jedutun nɛ ba biis nɛ ba du'adib la wʋsa da zi'en malʋŋ Daka la baba lɛbisid ya-nya'aŋ ka yɛ fupiela ka nwɛ'ɛd siyada nɛ googinam nɛ kɔna. Ka maanmaannib kɔbiga nɛ pisi da paasi ba piebid na'atana. 13 Kasiŋkanpiebidib la nɛ yʋʋmyʋ'ʋmnib la da la'as nɛ taaba maal nɔɔr yinne ye ba nɔk girima nɛ zun'ori tis Zugsɔb la. Ka banɛ piebid na'atana nɛ siyada nɛ la'abanɛ wʋsa sʋŋid nɛ yʋʋma mɛ da dɔl. Ba da dʋ'ʋsi ba kʋkɔya agɔla pʋ'ʋsid Zugsɔb la bareka ka yʋʋm, ye,
“On an sʋm la zug;
o nɔŋilim la bɛ nɛ saŋa linɛ ka' bɛnnɛ.”