Pʋ'ʋsim yir la'ad la yɛla
4
1 O da maal kʋntzɛn'ug malʋŋ daka ka li wa'alim nɛ yalʋŋ an nɔba makir pistan', ka linɛ dʋ zugin la an nɔba makir pii nɛ anu.2 O da nɔk kʋntzɛn'ugʋ maal ku'om latita'ar ka li yʋ'ʋr buon ye, Atɛuk, ka li an gbiliga, ka li yalʋŋ an nɔbir makir pii nɛ anu lin yi nɔɔr yinne paae nɔɔr yinne ni, ka lin dʋ si'em an nɔbir makir ayɔpɔi nɛ pʋsʋk, ka nwiig kanɛ na maki li nɔɔri gilig la wa'alim an nɔbir makir pisnaasi nɛ anu. 3 Li nɔɔr la teŋir ba da gʋl nɛ na'araadi tabili gilig, makir yinne wʋsa ka ba gʋli ba piiga tabil. Ba da maal niigi la nɛ tɔ'ɔŋ si'eli tabil nɛ Atɛuk la. 4 Atɛuk la da sʋn'e nɛ na'araad pii nɛ ayi' zug banɛ ka ba nɔk kʋntzɛn'ugʋ maali li la. Atan' nindaas da kpa' nɛ datiuŋ ka atan' nindaas kpa' tuon ka atan' nindaas kpa' dagɔbʋg ka atan' nindaas kpa' ya-nya'aŋ. Atɛuk la da sʋn'e nɛ ba zugin, ka ba nya'aŋ nɔba la bɛ teŋsʋk. 5 Li mugulim da zem wʋʋ nu'ug nɛ, ka li nɔɔr la lidigi nwɛnɛ taslaa nɔɔr nɛ ka nwɛnɛ kɔlgʋʋma puum nɛ. Ku'okanɛ na pɛ'ɛli li la da anɛ galamnam tusa piiga.
6 O da maal layalima piiga banɛ ka ba piesid la'adi digin la anu datiuŋ anu mɛn dagɔbʋg. Ba pʋʋgin ka ba piesid la'ad linɛ an nyu'or maan la ka li yit nyain, amaa Atɛuk la mɛ da anɛ maanmaannib la piesʋg zin'ig.
7 O da maal sanlima fitazi'esa nwɛnɛ ban pa'ali ba ye ba niŋ si'em la ka nɔki zi'el Pʋ'ʋsim Dɔɔgin la, anu datiuŋ anu mɛn dagɔbʋg.
8 O da maal teebulnam piiga zi'el Pʋ'ʋsim Yin la, anu datiuŋ anu mɛn dagɔbʋg. O mɛ da lɛm maal sanlima ku'om zu'asʋg laas la ban kɔbiga.
9 O da maal maanmaannib la za'ambɛŋ, ka maal za'ambɛŋ tita'ar nɛ li kʋlis, ka bʋligi li nɛ kʋntzɛn'ug. 10 O da digil Atɛuk la lɔdig linɛ bɛ dagɔbʋg la tuon.
11 Ka o lɛm maal kʋnt dʋgid nɛ tampɛligim soobulnam nɛ ku'om zu'asʋg laas la wʋsa.
Huram yʋ'ʋn da naae tʋʋm kanɛ ka o tʋmmi tisid Na'ab Solomon, Wina'am Pʋ'ʋsim Yin la.
12 Li da anɛ buos ayi' nɛ li zugin laas nɛ dinɛ ʋgi maali gilig laas la 13 nɛ pomanganɛt la kɔbisnaasi tʋʋnl taaba zin'is ayi' gilig buos la zugin laas ayi' la 14 nɛ zi'esa nɛ ba ku'opiedim laas; 15 Atɛuk nɛ na'araad pii nɛ ayi' banɛ bɛɛ li teŋir la; 16 kʋnt dʋgid nɛ tampɛligim soobulnam nɛ ku'om zu'asʋg laas, nɛ la'abanɛ nar ye li bɛ wʋsa.
La'abama wʋsa ka Huram-Abi da maali tis Na'ab Solomon ye o niŋ Zugsɔb Pʋ'ʋsim Yin la. Li da anɛ kʋntzɛn'ug dinɛ saalim ka vɛnl. 17 Na'ab la da kɛ ka ba ya'abi ba nɛ Joodan kɔldaug paalʋ la ni, linɛ bɛ Sukot nɛ Zaretan tɛɛns teŋsʋk la. 18 Solomon da bas nɛ'ɛnam wʋsa ka pʋ maki li tɛbisim, bɔzugɔ li da zu'onɛ galis. Ba mɛ da pʋ mak kʋntzɛn'ug la tɛbisim.
19 Solomon mɛ da maal la'abanɛ bɛ Wina'am Pʋ'ʋsim Yin la wʋsa. Banɛ an: sanlima daka la nɛ teebulnam banɛ ka Zugsɔb bodobodo la da pa'a li zug la; 20 fitazi'esa dinɛ an sanlim sʋŋ, ka bɛ Kasi Wʋsa Kasi zin'ig la tuon wʋʋ ban pa'al si'em la; 21 sanlima dinɛ ka ba maal ka li nwɛnɛ tiig puum nɛ fita nɛ ma'adiŋ linɛ ka ba mɔri gban'ad bugumsaana la (li wʋsa da anɛ sanlimmɛŋir); 22 sanlim sʋŋ laas nɛ linɛ kpiisid bugum la nɛ ku'om zu'asʋg laas nɛ labibis nɛ tudaar nyu'or dʋgid la wʋsa nɛ sanlim tabidis dinɛ kpɛn'ɛs Kasi Wʋsa Kasi Zin'ig la kʋlis nɛ Kasi Zin'ig la kʋlis wʋsa.