Solomon na'ayir
7
1 Yʋʋm pii nɛ atan' ka Solomon da nɔki mɛ' o na'ayir la naae. 2 O da mɛ' dɔsi'a ka li da buon ye, Lebanon Tiis Dɔɔg. Li wa'alim da anɛ nɔba makir kɔbiga nɛ pisnu ka li yalʋŋ an pisyɔpɔi nɛ anu ka li zugin dʋʋb an pisnaasi nɛ anu. Ka zan'antɔlis tuunl taaba pʋdigi li zin'is anaasi ka gban'e na'aziinr yu'adbɛda banɛ puug la. 3 Ba da pili li nɛ na'aziinr dalamma ka li dʋʋ gaad yu'adbɛda banɛ ka zan'antɔlis la gban'e mɔr la. Yu'adbɛda la da anɛ pisnaasi nɛ anu, ka zin'ig wʋsa mɔr daad pii nɛ anu nu. 4 Ba da kpɛn'ɛs takoronam la nɛ ka zin'ig wʋsa mɔr takoronama atan', tan' ka ba kpa' taaba. 5 Kʋlis la wʋsa da anɛ bʋmma'ad ka ba kpɛn'ɛsi ba dɔɔg la tuon. Kʋlis la da anɛ atan' tan' ka kpa' taaba.6 O mɛ da mɛ' zan'antɔlis dɔɔgin la, ka li wa'alim an nɔba makir pisyɔpɔi nɛ anu ka li yalʋŋ an pisnaasi nɛ anu. Ba da mɛ' za'ambɛŋi li tuon ka pili li zugin la.
7 O da lɛn kɛ ka ba mɛ' na'am zɔŋ tita'ar ka ba mɛ buonnɛ li ye, Antu'a Dɔɔg. Ani ka o da zin' kat saria. O da nɔknɛ na'aziinr daadi maali tabil dɔkpin la wʋsa din yi teŋin keŋ paae zugin. 8 Na'ayir kanɛ ka o mɛŋ na bɛ la da bɛ nɛ nya'aŋ sa. Ka ba mɛɛ li ka li nwɛnɛ dɔbama la. Solomon da lɛm mɛ' yikan la buudi tis Faaro pu'ayua onɛ aan o pu'a la.
9 Mɛbama nwa, din naan yiŋi kpɛn' zak tita'arin la nɛ din naan ɛɛnbirin la paae kuor la bɛn la, ba da kpi'enɛ kuga maal ka ba zem taaba tuon nɛ nya'aŋ wʋsa. 10 Ba da nɔk nɛ kugbɛda banɛ an sʋm ka mɔr paŋi mɛ' ɛɛnbir la. Kugsieba da anɛ nɔba makir pii nɛ anu ka sieba an makir pii nɛ ayi'. 11 Zugin la da anɛ kuga banɛ an bʋnsʋma hali, ka ba kpi'e ba zemis nɛ na'aziinr daad. 12 Ba da nɔk nɛ kuga banɛ ka ba kpi'e maal ka li an sʋ'ʋŋa la mɛ' zak tita'ar la sʋn'ʋlʋga atan' ka mɛ nɔk na'aziinr daadi maal sʋn'ʋlʋg yinne ka li nwɛnɛ Zugsɔb Pʋ'ʋsim Yir zak mɛɛb la nɛ Zugsɔb Pʋ'ʋsim Dɔɔg za'anɔɔr tuon za'ambɛŋ la nɛ.
Huram da maal kʋntzɛn'ug la'ad
13 Na'ab Solomon da tʋm Taya teŋinɛ buol Huram na. 14 O ma da anɛ pʋkɔɔnre yi Naftali teŋin na, ka o saam an Taya nid ka tʋm kʋntzɛn'ug tʋʋma. Huram da anɛ onɛ zamis ka mi' kʋntzɛn'ug tʋʋma sʋ'ʋŋa. O da kɛn Na'ab Solomon san'an na tʋm dinɛ ka ba tis o ye o tʋm la.
15 O da maal kʋntzɛn'ug buos ka li dʋʋb zugin an nɔbir makir pisi nɛ ayɔpɔi ka li bɛdim an nɔbir makir pii nɛ anii. 16 Ka o lɛn nɔk kʋntzɛn'ugʋ maal si'el ka li nwɛnɛ laas nɛ bʋnam ayi' sʋn'ʋl buos la zug. Yinne wʋsa dʋʋb anɛ nɔbir makir ayɔpɔi nɛ pʋsʋk. 17 Ka ʋg kʋnt ka li nwɛnɛ nwiis nɛ lɔɔ li zugin la, ka lɔ zan'antɔlis la wʋsa kʋnt nwiis ayɔpɔi-pɔi. 18 O da gʋl pomanganɛt footonam zin'is ayi' gilig buos la zugin ka li vɛnl. Ka maal buos la wʋsa zugin ala. 19 Ba da maal nɛ si'elnam ka ba nwɛnɛ na'apu'a-kʋ-si'is-ku'om niŋ buos banɛ zi'e pʋʋgin la zug. Ka li zugin la dʋʋb an nɔbir makir ayuobʋ. 20 Ka buos ayi' la zug, zin'ikanɛ ka ba maal ka li nwɛnɛ laas la, nɛ dinɛ ka ba ʋgi li la, ba da maali li zugin pomanganɛta ban kɔbisyi' tuunli baa gilig. 21 O da zi'el buos la nɛ Pʋ'ʋsim Yir la za'anɔɔr za'ambɛŋ la tuon. Bua kanɛ bɛ dagɔbʋg la, o da pʋdi li yʋ'ʋri ye, Jakinb ka pʋd onɛ bɛ datiuŋ la ye, Boaz.c 22 Buos la zugin ba da maal si'el ka li nwɛnɛ na'apu'a-kʋ-si'is-ku'om nɛ. Ani ka buos la tʋʋma da naae.
23 O da nɔk kʋntzɛn'ugʋ maal ku'om latita'ar ka li yʋ'ʋr buon Atɛuk, ka li an gbiliga, ka li yalʋŋ an nɔbir makir pii nɛ anu lin yi nɔɔr yinne paae nɔɔr yinne ni, ka lin dʋ si'em an nɔbir makir ayɔpɔi nɛ pʋsʋk, ka nwiig kanɛ na maki li nɔɔri gilig la wa'alim an nɔbir makir pisnaasi nɛ anu. 24 Ba da maal si'elnam ka li nwɛnɛ gan'a giligi li nɔɔr la teŋir. Ka nɔbir makir yinne nɛ pʋsʋk an gan'a piiga. Gan'a la da maal nɛ gilig zin'is ayi'. Ka li naali an yinne nɛ Atɛuk la.
25 Atɛuk la da sʋn'e nɛ na'araad pii nɛ ayi' zug banɛ ka ba nɔk kʋntzɛn'ugʋ maal. Atan' nindaas da kpa' nɛ ya-datiuŋ ka atan' nindaas kpa' ya-tuona ka atan' nindaas kpa' ya-dagɔbʋg ka atan' nindaas kpa' ya-nya'aŋ. Atɛuk la da sʋn'e nɛ ba zugin, ka ba nya'aŋ nɔba la bɛ teŋsʋk. 26 Ka li mugulim zem wʋʋ nu'ug yalʋŋ ka li nɔɔr la lidigi nwɛnɛ taslaa nɔɔr nɛ ka nwɛnɛ kɔlgʋʋma puum nɛ. Ku'om kanɛ na pɛ'ɛli li la anɛ galamnam tusa piiga.
27 O mɛ da nɔk kʋntzɛn'ugʋ maal tɛrekonam piiga ka yinne wʋsa wa'alim nɛ li yalʋŋ an nɔbir makir ayuobʋ nɛ pʋsʋk, ka li dʋʋb zugin an nɔbir makir anaasi nɛ pʋsʋk. 28 Tɛrekonam la zi'esa ka ba da maal si'em nwa: li da mɔr bʋnlamma ta'al nɛ kʋnt linɛ gban'e tɛreko la lʋga anaasi la. 29 O da gʋlisnɛ gbigima nɛ na'araad nɛ Kerubnam footo niŋ kʋnt lamma la zug. Gbigima la nɛ na'araad la zugin nɛ li teŋin la, ba da zan'anɛ maal baŋgbilis. 30 Tɛreko wʋsa da mɔr kʋntzɛn'ug nɔba dinɛ kʋrisid, ka kʋntzɛn'ug tʋʋ li vɔnya la ni; ka yinne wʋsa mɔr taslaa nɛ bʋnama anaasi dinɛ gban'e li ka li sʋn'e ba zug, ka bʋngbilis bɛ lʋga anaasi wʋsa ni. 31 Tɛrekonam la zug da mɔr bʋngbilis ka li gilig laas la nɔɔr. Ka li yalʋŋ an nɔbir makir yinne nɛ pʋsʋk, ka li sie kpɛn' pʋʋgin wʋʋ nɔbir makir pʋsʋk, ka ba maal bʋnvɛnla giligi li wʋsa. Tɛrekonam bʋnlamma la da anɛ bʋmma'ad, ka ka' bʋngbilisɛ. 32 Bʋnlamma la da bɛ nɛ nɔba anaasi banɛ kʋrisid la zug. Ka kʋnt banɛ tʋ nɔba la vɔnya ni la tɔ'ɔŋ nɛ tɛrekonam la. Dinɛ kʋrisid la yalʋŋ da anɛ nɔbir makir ayi' nɛ pʋsʋk. 33 Nɔba linɛ kʋrisid la da nwɛnɛ zaba tɛreko nɔba nɛ. Li nɔtinnam nɛ li fiilnam nɛ li sapugusnam nɛ kʋnt linɛ tʋ vɔnya ni la wʋsa da anɛ kʋntzɛn'ug.
34 Tɛreko wʋsa da mɔr gban'asa anaasi ka lin nɛ tɛreko la mɛŋ maali an yinne. 35 Tɛreko wʋsa zug ba da maalnɛ ka li an gbiliga ka li zulʋŋ an nɔbir makir pʋsʋk. Lin nɛ linɛ gban'e li nɛ bʋnlamma la la'am la da naali nɛ tɛreko la mɛŋ. 36 O da maal Kerubnam nɛ gbigima nɛ kpʋkparis nɛ bʋngbilisi niŋ dinɛ gban'e li mɔr la zugin nɛ bʋnlamma la zin'ikanɛ wʋsa ka paalʋ bɛ. 37 Huram da maal tɛrekonam piiga linɛ mɔr ku'om zi'esa li zug ka ba wa'alim nɛ ba dʋʋb zugin nɛ ba yalʋŋ da zem nɛ taaba kiapi.
38 O da maal kʋntzɛn'ug laas piiga sʋn'ʋl tɛreko wʋsa zug, ka yinne wʋsa suud ku'om galamnam kɔbisyi' nɛ pistan', ka li yalʋŋ an nɔbir makir ayuobʋ nɛ pʋsʋk, lin yi nɔɔr yinne keŋ paae nɔɔr yinne ni. 39 O da zi'el tɛrekonam la anu Pʋ'ʋsim Yir la dagɔbʋg ka anu bɛ datiuŋ, ka zi'el ku'om latita'ar dinɛ ka ba buon Atɛuk la Wina'am Pʋ'ʋsim Yir la dagɔbʋg lɔdig la baba. 40 Ka lɛm maal laas nɛ tampɛligim soobulnam nɛ ku'om zu'asʋg laas wʋsa. Huram da tʋm tʋʋm kanɛ ka Na'ab Solomon tis o ye o tʋm Wina'am Pʋ'ʋsim Yin la wʋsa naae.
41 On da tʋm si'eli nwa: Buos ayi' la nɛ li zugin laas la nɛ dinɛ ʋgi maali gilig laas la nɛ 42 pomanganɛt kɔbisnaasi tʋʋnl taaba zin'is ayi' bɛ linɛ ka ba ʋgi gilig laas ayi' banɛ bɛ buos la zugin la 43 zi'esa piiga nɛ ba ku'opiedim laas piiga 44 nɛ d latita'ar nɛ na'araad pii nɛ ayi' banɛ bɛɛ li teŋir la 45 nɛ ku'om laas nɛ tampɛligim soobulnam nɛ ku'om zu'asʋg laas.
La'abama wʋsa ka Huram da maali tis Na'ab Solomon ye o niŋ Zugsɔb Pʋ'ʋsim Yin la. Li da anɛ kʋntzɛn'ug dinɛ saalim ka vɛnl. 46 Na'ab la da kɛ ka ba ya'abi ba nɛ Joodan kɔldaug paalʋ la ni, linɛ bɛ Sukot nɛ Zaretan tɛɛns teŋsʋk la. 47 Solomon da bas nɛ'ɛnam wʋsa ka pʋ maki li tɛbisim bɔzugɔ li da zu'onɛ galis. Ba mɛ da pʋ mak kʋntzɛn'ug la tɛbisim.
48 La'abanɛ ka Solomon mɛ da maali niŋ Zugsɔb Pʋ'ʋsim Yin la anɛ: Sanlima daka nɛ sanlima teebul kanɛ ka ba pa'an Zugsɔb bodobodo li zug la; 49 nɛ sanlima fitazi'esa ka li bɛ Kasi Wʋsa Kasi zin'ig la tuon; anu datiuŋ nɛ anu dagɔbʋg nɛ sanlima dinɛ ka ba maal ka li nwɛnɛ tiig puum nɛ fita nɛ ma'adiŋ dinɛ ka ba mɔri gban'ad bugumsaana la 50 nɛ sanlim sʋŋ laas nɛ linɛ kpiisid bugum la nɛ ku'om zu'asʋg laas nɛ labibis nɛ tudaar nyu'or dʋgid la wʋsa nɛ sanlima tabidis dinɛ kpɛn'ɛs Kasi Wʋsa Kasi Zin'ig kʋlis la nɛ Pʋ'ʋsim Yir dɔtita'ar la wʋsa.
51 Na'ab la da tʋm Zugsɔb Pʋ'ʋsim Yir la tʋʋma naae la, o da mɔr la'abanɛ ka o saam David da pɛsigi tis Zugsɔb la kpɛn'ɛs Zugsɔb Pʋ'ʋsim Yir la'ad dɔɔgin la. La'ad la da anɛ anzurifa nɛ sanlima nɛ la'abanɛ bɛ la wʋsa ka o da mɔr na kpɛn'ɛs Zugsɔb Yir la'ad dɔɔdin.