Zugsɔb la yir mɛɛb pin'ilʋg
6
1 Israel dimi da yi Egipt teŋin na la, li yʋma kɔbisnaasi nɛ pisnii la nya'aŋ, Solomon na'am diib la yʋma anaasi saŋa, nwadig kanɛ yʋ'ʋri buon Zif ka an nwadig kanɛ paas ayi' la, ka o da pin'il Zugsɔb yir la mɛɛb.Yir la la'ad nɛ mɛɛb yɛla
2 Zugsɔb dɔkanɛ ka Na'ab Solomon da mɛ' la wa'alim da anɛ nɔba makir piswai ka li yalʋŋ an pistan' ka li dʋʋb an makir pisnaasi nɛ anu. 3 Za'ambɛŋ linɛ bɛ dɔɔg la za'anɔɔr tuon la, ba da tɔlisi li yalʋŋ la nɛ ka li an nɔba pistan' ka vɛ'ɛgi yi tuon nɔba makir pii nɛ anu. 4 Ka maal takorbibisi gilig dɔɔg la. 5 O da mɛ' dɔbibisi tabil dɔtita'ar la lʋga ayi' la nɛ li nya'aŋ wʋsa. 6 Dɔkanɛ bɛ teŋin la yalʋŋ da anɛ nɔba makir ayɔpɔi nɛ pʋsʋk, ka dɔkanɛ tɔ'ɔŋ zugin la yalʋŋ an nɔba makir awai, ka dɔkanɛ tɔ'ɔŋ zugini paas atan' la yalʋŋ mɛ an nɔba makir piiga nɛ pʋsʋk. O da mɛnɛ Wina'am pʋ'ʋsim dɔtita'ar la dɔkpin ka li zugin pʋ labisi paae teŋir la ka dɔbibis la mɛɛ sʋn'ʋl zin'ikanɛ sie la zug, ka si'el kʋ nyaŋi vʋdigi kpɛn' Wina'am pʋ'ʋsim dɔtita'ar dɔkpinnin laa.
7 Ban da mɛɛd Pʋ'ʋsim Yir la, kugbanɛ ka ba kpi'e ba maal tampiinsin la ma'aa ka ba da mɔri mɛɛd. Ban da mɛɛd la ba da pʋ mɔr zan'ar bɛɛ lieŋ kanɛ kpi'ed kuga, hali kʋnt si'a da pʋ dammid ban da mɛɛd zin'isi'a la.
8 Dɔbil kanɛ bɛ teŋ la za'anɔɔrin la da bɛ nɛ Pʋ'ʋsim Yir la dagɔbʋg, ban dɔl zin'isi'a dʋt dɔkanɛ bɛ teŋsʋk la dɔlisidi gati dʋt dɔkanɛ paas atan' ka bɛ zugin la. 9 O da mɛ' Wina'am Pʋ'ʋsim Yir la naae ka pili li nɛ yu'adbɛda nɛ na'aziinr dalamma. 10 Ka mɛ' dɔbibis la tabil dɔtita'ar la giligi li wʋsa. Ka dɔbil wʋsa dʋʋb an nɔbir makir ayɔpɔi nɛ pʋsʋk. Na'aziinr dabanɛ ka ba da nɔki pil dɔbibis la da tʋn nɛ Pʋ'ʋsim Yir la.
11 Zugsɔb la da pian' tis Solomon ye, 12 “Ya'a kpɛlim nɛ Pʋ'ʋsim Yir kaŋa ka fʋ mɛɛd la; fʋ ya'a dɔllim nɔzi'elʋg ka tʋm man yɛl si'el wʋsa ka siaki dɔlisi ba, m na dɔlisi yi fʋ san'an kɛ ka man da kaanb si'em tisi fʋ saam David la lieb amɛŋa. 13 Ka m na bɛ Israel dim sʋʋgin ka kʋ basi baa.”
14 Solomon da mɛ' Pʋ'ʋsim Yir la naae. 15 Yir la pʋʋgin o da nɔknɛ na'aziinr dalamma maali tabil dɔkpina la, din pin'il teŋin ken dʋ zugin. Ka nɔk dalamma nɛ dawa'ama tɛ'ɛg teŋ la maal ka li an sʋ'ʋŋa. 16 O da bɛŋ nɛ pʋʋgin la ka li dʋʋb an nɔba makir pistan' ka ba maali kpa' daad teŋin dʋ zugini maal ka li an pʋʋgin dɔkanɛ an Kasi Wʋsa Kasi Zin'ig la. 17 Dɔtita'ar kanɛ da bɛ dɔkaŋa tuon la da anɛ nɔba makir pisyuobʋ. 18 Ba da kpi'enɛ na'aziinr daad linɛ bɛ dɔɔg la pʋʋgin la maal ka li nwɛnɛ gan'a nɛ tiis puum nɛ. Ba da nɔknɛ daadi lus dɔkpin la wʋsa ka kugir baa yinne pʋ nyɛta.
19 O da maal Kasi Wʋsa Kasi zin'ig la, Pʋ'ʋsim Yir la pʋʋgin ye o kpɛn'ɛs Zugsɔb Nɔnaar Daka la ani. 20 Pʋʋgin dɔɔg la wa'alim da anɛ nɔba makir pistan' ka li yalʋŋ an pistan' ka li dʋʋb zugin an pistan'. O da nɔknɛ sanlima bʋlig pʋʋgin la ka nɔk na'aziinr daadi maal bimbim la. 21 Solomon da bʋlig dɔɔg la pʋʋgin wʋsa nɛ sanlima ka maal sanlim zɔnt muguri ya'ali puug Kasi Wʋsa Kasi zin'ig la tuon. 22 Ka bʋlig pʋʋgin la wʋsa nɛ sanlima. Ka mɛ bʋlig bimbim kanɛ bɛ pʋʋgin dɔɔgin la nɛ sanlima.
23 Kasi Wʋsa Kasi zin'igin la, o da nɔk olif davɛnla maal Kerubnam ayi' ka ba wa'alim an nɔba makir pii nɛ anu, 24 ka ba kpʋkpauŋ yinne wʋsa wa'alim an nɔba makir ayɔpɔi nɛ pʋsʋk ka kpʋkpama la naar zin'ig la lal taaba wʋʋ nɔba makir pii nɛ anu. 25 Kerubnam ayi' la wa'alim nɛ ba bɛdim da zem nɛ taaba, 26 babayi' la wʋsa wa'alim da anɛ nɔba makir pii nɛ anu. 27 Ka o zi'el Kerubnam la Kasi Wʋsa Kasi zin'igin Zugsɔb Yir dɔkanɛ bɛ pʋʋgin la, ka ba kpʋkpama la yadig ka ayinne kpʋkpauŋ si'isid dɔkpin yinne ka oŋa la kpʋkpauŋ mɛ si'isid dɔkpin yinne, ka ba kpʋkpama la si'isid taaba dɔɔg la teŋsʋk. 28 Ka o nɔk sanlima bʋlig Kerubnam la.
29 O da kpi'a Kerubnam nɛ kpʋkparis nɛ tiis puum tabil dɔbanɛ bɛ pʋʋgin la nɛ banɛ bɛ yiŋ la wʋsa dɔkpina la. 30 O mɛ da bʋlig pʋʋgin nɛ yiŋ dɔɔg la wʋsa teŋin la nɛ sanlima.
31 Dɔkanɛ bɛ pʋʋgin la za'anɔɔr la, o da nɔk nɛ olif davɛnla maal ka li dazi'eda la mɔr duta anu. 32 Ka nɔk olif dasʋma maal kʋlis ayi' ka kpi'a Kerubnam nɛ kpʋkparis nɛ tiis puum niŋi li ni, ka bʋligi li wʋsa nɛ sanlima dinɛ ka ba zan' li. 33 Ka o lɛn nɔk olif davɛnla maal kʋlis dazi'eda ka li mɔr duta anaasi kpɛn'ɛs dɔtita'ar la za'anɔɔr. 34 O da lɛm maal kʋlis ayi' ka li yɔ'ɔgid zin'is ayi', ka ba maali ba tʋ ka li nyaŋidi yɔ'ɔgidi pɔnbin taaba. 35 Ka o kpi'a Kerubnam, nɛ kpʋkparis nɛ tiis puum niŋi anina ka bʋligi li nɛ sanlima ka li naal taaba vɛnl.
36 Ka o zaŋ kugbanɛ ka ba kpi'e ba maal ka ba vɛnl la mɛ' pʋʋgin zak la sʋn'ʋlʋga atan', ka nɔk na'aziinr daad banɛ ka ba maal sʋ'ʋŋa la sʋn'ʋl mɛɛb yinne.
Yʋʋma ayɔpɔi ka ba mɛ' Zugsɔb yir la