Solomon ti'eb ye o mɛ' Wina'am yir
5
1 Taya na'ab Hiram da wʋm ye ba bu'oe malʋŋ kpaam niŋ Solomon zugʋ diis o ba' David na'am la, o da tʋm tʋmtʋmnib ye ba keŋ pʋ'ʋs o nɛ o zusʋŋ bɔzugɔ, on nɛ David da anɛ zuod. 2 Labaar kanɛ ka Solomon da lɛbisi tis Hiram nwa: 3 “Fʋ mi' ye zabaa da bɛ zin'ig wʋsa giligi m saam David la, o da pʋ nyaŋi mɛ' yir o Zugsɔb Wina'am la yʋ'ʋr zugɔ, hali ti paae saŋkanɛ ka Zugsɔb la kɛ ka o nyaŋ o dataas la wʋsa. 4 Amaa nannanna, m Zugsɔb Wina'am la tisim vʋ'ʋsʋm zin'ig wʋsa ka dataas nɛ tɔɔg lɛn kae. 5 M gban'e ye m mɛ' yir Zugsɔb onɛ an m Wina'am la yʋ'ʋr zug, nwɛnɛ Zugsɔb la da yɛli m saam David si'em la. O da yɛl ye, ‘Fʋ biig kanɛ ka m na ti diis o na'am zin'ili fʋ na'am gbauŋ zug la na mɛ' yir la mam yʋ'ʋr zug.’ 6 Alazug tisim nɔɔr ka ba nwa na'aziinr daad banɛ bɛ Lebanon teŋin la tisim. Man nidib la nɛ fʋ nidib la na la'asi tʋm. M na yɔɔ fʋ nidib la wʋʋ fʋn bɔɔd ye m yɔ si'em wʋsa. Fʋ mi' ye tinam pʋ mɔr nimbanɛ mi' daad nwaab nwɛnɛ Sidon dima.” 7 Hiram da wʋm Solomon n tɔlim labasi'a la, o sʋnf da ma'ae nɛ ka o yɛl ye, “Zina nwa Zugsɔb la yʋ'ʋr nyɛ na'asi bɔzugɔ, o tis David biribiŋ kanɛ mɔr ya'am ye o gur teŋgbauŋ kaŋa.”8 Hiram da tʋm yɛl Solomon ye, “M wʋm labaar kanɛ ka fʋ tis na la. M na maal fʋn bɔɔd si'el la wʋsa. M na tisif na'aziinr nɛ daad banɛ wa'am ka an sʋ'ʋŋa la. 9 M nidib la na keŋ Lebanon nwaae lii sigis atɛukʋn la, m na kɛ ka ba lɔɔ li pugul atɛukʋn mɔri keŋ zin'ikanɛ ka fʋ bɔɔd la. Anina ka m na lɔdigi li ka baki ba ka fʋ zii kul. Ka mam bɔɔd si'el anɛ fʋ tisim diib linɛ na siaki m na'ayir la bɛn wʋsa.”
10 Din da an si'em la ka Hiram kpɛn tisid Solomon na'aziinr daad nɛ dawa'ama banɛ an sʋ'ʋŋa ka o bɔɔd la. 11 Solomon da tis Hiram ki bɔto tusa pisnu (50,000) ye o di'e ka li an o na'ayin la diib, ka paas olif kpaam galamnam tusa kɔbiga (100,000). Solomon da kpɛn tisid Hiram anwana yʋʋm wʋsa. 12 Zugsɔb la da tis Solomon ya'am wʋʋ on da zi'el o si'em la. Sumalisim da bɛ Hiram nɛ Solomon teŋsʋk. Ka babayi' la la'asi maal nɔɔr yinne.
Tʋmtʋmnib yʋda sɔb
13 Na'ab Solomon da sɔb tʋmtʋmnib tusa pistan' yʋda Israel teŋin 14 ka tʋmmi ba Lebanon teŋin, nidib tusa piig-piig ka ba kennɛ tia'asid, ka ɛɛnti bɛ Lebanon nwadig yinne ka lɛb yin nwadis ayi'. Adoniram da an tʋmtʋmnib la kpɛɛm. 15 Solomon da mɔr banɛ ziid ka ba an nidib tusa pisyɔpɔi (70,000) ka banɛ kpi'ed kuga an nidib tusa pisnii (80,000) bɛ kʋkʋna la ni. 16 La'am nɛ nidib tusa atan' nɛ kɔbistan' (3,300) ka ba an tʋʋma la kpɛɛmnam ka pa'an nidib la ban na tʋm si'em. 17 Ka Na'ab la tis nɔɔr ka ba kpi'a kugbɛda banɛ an bʋnsʋma zii ba kena ɛɛnb yir la. 18 Na'ab Solomon nɛ Hiram tʋmtʋmnib banɛ mi' tʋʋma hali la, nɛ banɛ yi Gebal teŋin la na, da nwa daadi maali ti'eb ka kpi'a kuga maal dinɛ ka ba na nɔki mɛ' Zugsɔb yir la.