Na'ab Solomon gban'e ye o mɛ' Pʋ'ʋsim Yir nɛ na'ayir la
2
1 Na'ab Solomon da tis nɔɔr ye ba mɛ' Pʋ'ʋsim Yir linɛ na dʋ'ʋs Zugsɔb la yʋ'ʋr, ka mɛ' na'ayir linɛ aan o mɛŋ din. 2 O da gaŋ dap tusa pisyɔpɔi (70,000) banɛ na ziid, ka banɛ kpi'ed kuga an nidib tusa pisnii (80,000) ka ba bɛ kʋkʋna la ni, nɛ nidib tusa atan' nɛ kɔbisyuobʋ (3,600) banɛ na gɔt banɛ tʋm la.3 O da tɔlim labakaŋa tis Hiram onɛ an Taya na'ab la ye,
“Fʋ da sʋŋi m saam sʋ'ʋŋa ka tis o na'aziinr yu'ada ye o mɛ' na'ayiri kpɛn'. 4 Nannanna m mɔɔdnɛ ye m mɛ' yiri tisim Zugsɔb Wina'am la yʋ'ʋr ka pɛsigi tis o, ka ba nyu'od bʋnnyubisa ani, ka digin pɛsigir bodobodo la saŋa wʋsa, ka nyu'od nyu'or maan la bɛogʋn nɛ zaam wʋsa nɛ Vʋ'ʋsʋm Daar nɛ Nwadpaalig nɛ malima banɛ ka Zugsɔb onɛ aan ti Wina'am yɛli zi'el la. Nɛ'ɛŋa an bʋn linɛ ka Israel dim na maan saŋa wʋsa. 5 Yir kanɛ ka m ye m mɛ' la na an yitita'ar bɔzugɔ ti Wina'am la anɛ Wina'am tita'ari gaad wina wʋsa. 6 Amaa anɔ'ɔnɛ na nyaŋi mɛ' yiri tis o? Hali agɔla saŋgbana zin'ikanɛ zu'oe la kʋ sia'al nɛ on na bɛɛ ani. Ka man mɛ aan anɔ'ɔnɛ na nyaŋi mɛ' yiri tis o, ya'a ka' man kʋdim na mɛ' maan zin'igi tis o? 7 Alazugɔ gaŋim dau kanɛ mi' tʋʋma tisim na. Kɛl ka o anɛ onɛ mi' sanlima nɛ anzurifa nɛ kʋntzɛn'ug nɛ kʋnt, nɛ fuud gʋlib tʋʋma nɛ li buudi wʋsa, ka o kena la'as nɛ m nidib la Juda nɛ Jerusalem teŋin, nɔk la'abanɛ ka m saam David la'asi digil la tʋm. 8 Tisim na'aziinr daad nɛ dasʋma buudi wʋsa linɛ bɛ Lebanon teŋin na, bɔzugɔ m mi' ye fʋ nidib la mi' daad tʋʋma anina. Man nidib la nɛ fʋ nidib la na la'asi tʋm. 9 Linɛ na kɛ ka ba nwa ka li zu'oe bɔzugɔ yikanɛ ka m ye m mɛ' la na an yitita'ar ka vɛnl hali. 10 M na tisi fʋ yammis la nɛ banɛ kpi'ed daad la ki zɔm bɔtnam tusa pisi (20,000) nɛ mui linɛ zem ala, nɛ daam galam tusa kɔbiga (100,000) nɛ olif kpaam tusa kɔbiga mɛn (100,000).”
11 Hiram onɛ an Taya na'ab la da sɔb gbauŋʋ lɛbisi tis Solomon ye,
“Zugsɔb la nɔŋ o nidib la zug ka o kɛ ka fʋ di na'am!”
12 Ka Hiram lɛn yɛl ye,
“Bareka bɛ nɛ Zugsɔb onɛ an Israel Wina'am la, onɛ maal agɔl nɛ teŋ! Onɛ tis Na'ab David bikanɛ mɔr ya'am, ka tis o baŋir ka kɛ ka o mi' bɛog yɛla, onɛ ye o mɛ' yiri tis Zugsɔb la nɛ na'ayiri tis o mɛŋ. 13 Gɔsima! M tʋmnɛ Huram-Abi onɛ mi' tʋʋma la hali. 14 Onɛ maa yi Dan teŋin na ka o saam mɛ yi Taya teŋin la. O zamis nɛ mi' sanlima nɛ anzurifa nɛ kʋntzɛn'ug nɛ kʋnt buudi wʋsa maalʋg, nɛ kuga nɛ daad, nɛ galʋʋrʋ mɔ'ɔsʋg nɛ pien sʋma tʋʋma wʋsa. O na tʋm nɛ fʋ nidib la nɛ m zugdaan David onɛ aan fʋ saam la nidib. 15 Nannanna, m zugdaana, nɔkim ki nɛ mui nɛ olif kpaam linɛ ka fʋ yɛli li yɛla la tisim na. 16 Ka ti na nwa daad banɛ ka fʋ bɔɔd la Lebanon teŋin kɛ ka ba lɔɔ pugul atɛukʋn mɔri ken Joppa teŋin na, ka fʋ yʋ'ʋn nɔki keŋ Jerusalem.”
Pʋ'ʋsim Yir la mɛɛb pin'ilʋg
17 Solomon da kaal saam banɛ bɛ Israel sʋ'ʋlimin la wʋsa, o saamme da kaal la nya'aŋ ka ba kal an tusa kɔbiga nɛ pisnu nɛ atan' nɛ kɔbisyuobʋ (153,600). 18 O da gaŋ dap tusa pisyɔpɔi (70,000) banɛ ziid, ka banɛ kpi'ed kuga an nidib tusa pisnii (80,000) ka ba bɛ zuoya la ni, nɛ tusa atan' nɛ kɔbisyuobʋ (3,600) banɛ na gɔt banɛ tʋm la.