Ayi' Yɛlkʋda
Na'ab Solomon n sɔs ya'am la yɛla
1
1 Na'ab Solomon onɛ da an Na'ab David biig la yʋ'ʋn da sʋ'ʋg teŋ la nɛ paŋ, bɔzugɔ Zugsɔb la da bɛ nɛ o ka kɛ ka o lieb nintita'ar.2 Solomon da pian' tis Israel dim wʋsa. O da pian' tis soogia kpɛɛmnam banɛ lut zabzabidib tusa-tusa nɛ kɔbig-kɔbig tuon la, nɛ sariakatib nɛ Israel tuongatib wʋsa nɛ yir kpɛɛmnam la. 3 Israel dim wʋsa da la'as taaba ka Na'ab Solomon da dɔlli ba keŋ Gibeon teŋin malʋŋ zin'igin la, bɔzugɔ La'asʋg Fuug Sʋgʋr linɛ ka Zugsɔb tʋmtʋm Moses da maal sian'arin la da zi'enɛ ani. 4 Saŋa kan la Na'ab David da pʋn mɔr Wina'am Nɔnaar Daka la yi Kiriaf Jiarim teŋin la na niŋ zin'ikanɛ ka o maali li yɛla la, bɔzugɔ o da maal sʋgʋri zi'el Jerusalem li yɛla. 5 Amaa kʋntzɛn'ug malʋŋ daka la da kpɛn zi'enɛ Gibeon tempʋʋgin Zugsɔb la Pʋ'ʋsim Fuug Sʋgʋr la tuon; bimbim linɛ ka Bezalel onɛ an Uri biig ka an Hur yaaŋ da maal la. Na'ab Solomon nɛ nidib la da kpɛn'ɛd ani bu'osid Zugsɔb la ye ba baŋ linɛ bɛ. 6 Solomon da kpɛn' Zugsɔb La'asʋg Fuug Sʋgʋr la zakin la maal nyu'or maana tusir, kʋntzɛn'ug bimbim la zug.
7 Wina'am da nie o mɛŋi pa'al Solomon yʋ'ʋŋ kan la ka yɛl o ye, “Sɔsim fʋn bɔɔd ye m tisif si'el wʋsa.” 8 Ka Na'ab Solomon lɛbis Wina'am ye, “Fʋ pa'ali fʋ nɔŋilim nɛ fʋ tʋmtʋm David onɛ aan m saam la ka kɛ ka mam lɛdig o zin'igi dii o na'am. 9 Nannanna, Zugsɔb Wina'am, fʋ tʋm sida tisim saam Na'ab David ka kɛ ka m di na'am sʋ'oe fʋ nimbanɛ zu'oe wʋʋ teŋin titan nɛ. 10 Alazug, tisim ya'am ka m na guri fʋ nidib la ka mi' sʋ'ʋm nɛ bɛ'ɛdi bakid. Anɔ'ɔnɛ na nyaŋi gɔs nimbabig bama wʋsa?” 11 Wina'am da yɛl Na'ab Solomon ye, “Tɔ! Fʋ sʋnfʋ gban'e si'em la an sʋm. Fʋ pʋ sɔs kpan'am nɛ la'ad nɛ na'asi fʋ mɛŋ yɛllɛ, bɛɛ sɔs ye fʋ bi'emnam kpii, fʋ mɛ pʋ sɔs ye fʋ kpɛn vʋe yuug halii, amaa ka sɔs nɛ ya'am nɛ baŋir ye fʋ guri m nidib la nɛ sida. Fʋn sadigim gban'e ala la, 12 fʋ sid na paam ya'am nɛ baŋir, ka mɛ na paam kpan'am nɛ la'ad nɛ na'asi gaad na'anam banɛ da dɛŋi fʋ tuon la, nɛ banɛ na dɔlli fʋ nya'aŋ la wʋsa.”
13 Na'ab Solomon yʋ'ʋn da naan Fuug Sʋgʋrin la Gibeon teŋin yii lɛb Jerusalem tempʋʋginɛ zin'in na'am gbauŋ la zug.
Na'ab Solomon kpan'am la yɛla
14 Solomon da la'as tɛrekonam nɛ widi: o da mɔr zaba tɛrekonam tusir nɛ kɔbisnaasi (1,400) nɛ widi tusa pii nɛ ayi' (12,000), ka kɛ ka ba bɛɛ o widi tempʋʋdin la, ka sieba mɛ bɛɛ o san'an Jerusalem tempʋʋgin. 15 Na'ab la da kɛ ka anzurifa nɛ sanlima an na'ana Jerusalem tempʋʋgin nwɛnɛ kuga nɛ, ka na'aziinr dasʋma zu'oe nwɛnɛ kekama daadi zu'oe mɔɔgin si'em la. 16 Na'ab Solomon da da'ad widi yit Egipt nɛ Kuoe sʋ'ʋlimin na, o kpikpinkpinidibi da sʋ'oe Kuoe sʋ'ʋlim widi da'ab yɛla. 17 Ba da da' tɛreko yinne anzurifa ligidi kɔbisyuobʋ yi Egipt na, ka mɛ da' wief yinne anzurifa ligidi kɔbiga nɛ pisnu. Ba da da'adi ba lɛn tɔlisidi kuosidi tisid Hitti dim nɛ Aram dim na'anam la wʋsa.