Solomon maal nɔɔr yinne nɛ Faaro
3
1 Solomon da maal nɔɔr yinne nɛ Faaro onɛ an Egipt na'ab la ka dii o pu'ayua. O da mɔr o kul David tempʋʋgin hali ti paae saŋkanɛ ka o mɛɛ o na'ayir nɛ Zugsɔb yir nɛ zaŋguom kanɛ ka ba da mɛɛ gilig Jerusalem naae la. 2 Nidib la da nan kpɛm maan maana nɛ zuoya ni bɔzugɔ, saŋkan la ba da nam pʋ mɛ Zugsɔb la yirɛ.Solomon maal maan ka sɔs ya'am
3 Solomon da pa'annɛ o nɔŋilim nɛ Zugsɔb la ka dɔlisid o saam David wada, ya'a ka' on da maan maana ka nyu'od tudaar zuoya ni la ma'aanɛɛ.
4 Na'ab la da keŋ Gibeon teŋin ye o maal maan bɔzugɔ, malʋŋ zin'ikan da anɛ nimmua zin'igi gat zin'is la wʋsa. Ka Na'ab Solomon da maal maana dinɛ nyu'od bugum la nɔɔr tusir bimbim la ni. 5 Zugsɔb la da nie o mɛŋ Solomon san'an zaansʋŋin Gibeon teŋin ka yɛl o ye, “Sɔsim fʋn bɔɔd ye m tisif si'el wʋsa.”
6 Ka Na'ab Solomon lɛbis ye, “Fʋ pa'ali fʋ nɔŋilim nɛ fʋ tʋmtʋm David onɛ an m saam la, bɔzugɔ, o da tisif sida nɛ pʋpielim ka zi'e sʋ'ʋŋa nɛ o sʋʋnr wʋsa. Fʋ nan kpɛn ken tuon nɛ nɔŋilim tita'ar o san'an ka tis o biribiŋ ye o zin'ini o na'am gbauŋ la zug zina.
7 “Nannanna, m Zugsɔb Wina'am, fʋ kɛya ka m di'e m saam David zin'igi di na'am, amaa m anɛ biig ka zi' man na tʋmmi m na'am tʋʋma wʋsa si'em. 8 M bɛ nɛ nimbanɛ ka fʋ gaŋ la sʋʋgin ye m tʋmmi tisidif. Ba anɛ nimbɛda ka zu'oe ka sɔ' kʋ nyaŋi kaal bɛɛ gɛligi baa. 9 Alazug, tisim ya'am ka m na guri fʋ nidib la ka mi' sʋ'ʋm nɛ bɛ'ɛdi bakid. Anɔ'ɔnɛ na nyaŋi gɔsi fʋ nimbama wʋsa?”
Solomon winsɔsʋg gandigir
10 Zugsɔb la sʋnf da ma'ae nɛ Solomon n sɔs si'el la. 11 Wina'am da yɛl o ye, “Fʋn sadigim sɔs nɛ', ka pʋ sɔs nyɔvʋwɔk bɛɛ kpan'am fʋ mɛŋ yɛlɛ, bɛɛ sɔs ye fʋ dataas kpii, amaa ka sɔs ya'am ye fʋ gur nidib la nɛ sida la, 12 m na maal fʋn sɔs si'el la, ka na tisif ya'am nɛ baŋir linɛ ka sɔ' nam zi' mɔra, ka sɔ' mɛ kʋ lɛm maligim mɔri li buudii. 13 Dinɛ lɛm pɛ'ɛs, m na tisif dinɛ ka fʋ pʋ sɔsɛ. M na tisif kpan'am nɛ girima wʋsa; ka fʋ nyɔvʋr bɛllim saŋa, na'ab kʋ bɛɛ zem nɛ fɔ. 14 Ka fʋ ya'a dɔlli m suoya la nɛ m nɔzi'elʋg nɛ m wada la wʋʋ fʋ saam David n da dɔl si'em la, m na tisif nyɔvʋwɔk.” 15 Ka Na'ab Solomon nie ka yʋ'ʋn baŋ ye li anɛ zaansʋŋ.
O da lɛb Jerusalem zi'en Zugsɔb Nɔnaar Daka la tuonnɛ maal maan dinɛ an nyu'or maan nɛ taaba la'asʋg maan. Ka maal diib nɛ bʋnnuuda tis o nidib la wʋsa.
Na'ab Solomon kad saria nɛ ya'am
16 Lin nya'aŋ ka pu'agɔɔnda ayi' mɔri ba antu'a kɛn Na'ab Solomon san'an na. 17 Ka yinne yɛl o ye, “M zugdaana, man nɛ pu'a kaŋa la'am bɛ nɛ yir yinne. Man daa du'a biig la ka o bɛ. 18 Man du'a la daba atan' daar ka pu'a nwa mɛ du'a. Tinam ma'aa bɛ yin la, sɔ'ɔsɔ pʋ bɛ yin la paas tinamɛ ti babayi' la zugɔ.
19 “Ka pu'a kaŋa sa gbisi biligi diinli o biig la ka o kpi, 20 ka o duoe yʋ'ʋŋ tisʋʋsi keŋ nɔk man biig la saŋkanɛ ka m sa gbisid la. Ka zaŋ man biribiŋ la digili o tuon ka zaŋ o bikpiilʋŋ la digil man tuon. 21 Bɛogʋ bɔɔd nier la ka man duoe ye m mu'asi m biig la nyɛ ka o kpi! Amaa bɛogʋ nie naae nyain ka mam gɔs o kii la, li ka' bikanɛ ka man du'a la laa.”
22 Ka pu'a kaŋa la mɛ yɛl ye, “Ayei, biribiŋ kanɛ vʋe la anɛ mam biig, bikpiilʋŋ la aan fʋ din!”
Amaa pu'a kanɛ dɛŋ tuon la zan'as ka ye, “Ayei, bikpiilʋŋ la aan fʋ din, ka onɛ vʋe la an man biig!” Ka ba nwa'as taaba Na'ab la tuon.
23 Na'ab la yɛl ye, “Oŋa yɛl ye, ‘Mam biigi vʋe la ka fʋn biig kpi.’ Ka oŋa la mɛ ye, ‘Ayei, fʋ biigi la kpi ka mam biig vʋe.’ ” 24 Ka Na'ab la yɛl ye ba tisim o sʋ'ʋraug, ka ba mɔr sʋ'ʋraug na tis o. 25 Ka o tis nɔɔr ye, “Buakimi bivʋr la pʋsʋk; tisimi oŋa pʋsʋk ka mɛ tis oŋa la pʋsʋk!”
26 Amaa pu'a kanɛ biigi vʋe la da zɔɔ o biig la nimbaanlig ka yɛl Na'ab la ye, “Naa, m zugdaana, tisim o bivʋr la ka da kʋʋ o!”
Amaa oŋa la yɛl ye, “Man nɛ fʋ wʋsa kʋ nyɛ biig la, buakim o zin'is ayi'!”
27 Ani ka Na'ab la kʋ pian'ad la ye, “Nɔkimi biig la tis pu'a kanɛ kɛn yiiga na la, da kʋʋ o; ka li anɛ o maa la.”
28 Israel dim wʋsa wʋm Na'ab la vɛɛns si'em ka naan kʋ antu'a la li lidigi ba nɛ, bɔzugɔ ba baŋ ye o nyɛ ya'am la nɛ Wina'am san'an ka tu'ad linɛ an sida.