David sa'al Solomon
2
1 David kum saŋaa da paae la, o da sa'al o biig Solomon ye, 2 “Man nyɛ ka m kulig saŋa paae ka m na maal ka'alim keŋi m yaanamin. Zi'enim kiŋ-kiŋ ka pa'al ye fʋ anɛ dau, 3 ka dɔlisidi fʋ Zugsɔb Wina'am la bɔɔd si'el. Dɔlisim o suoya la, ka dɔl on gban'e si'el, nɛ o nɔzi'elʋg nɛ o wada bɔɔd si'em, nwɛnɛ lin sɔb Moses wada gbauŋʋn si'em la. Ala ka fʋ ya'a tʋm si'el wʋsa li na an sʋ'ʋŋa tisif nɛ zin'ikanɛ ka fʋ keŋ wʋsa. 4 Ala ka Zugsɔb la na kpɛn dɔl on kaanb si'em la ye, ‘Fʋ biis nɛ fʋ yaas ya'a gɔsi ba bɛllim sʋ'ʋŋa, ka dɔllim nɛ sida nɛ ba sʋnf nɛ ba pʋtɛn'ɛr wʋsa, Israel na'am la kʋ maligim yii fʋ tuŋʋnɛɛ.’5 “Tɔ, fʋ mɛŋ mi' Joab onɛ an Zeruyia biig la maalim si'em nɛ on da maal Israel zabzabidib tuongatib ayi' la si'em, Abner onɛ an Nier biig la nɛ Amasa onɛ an Jeta biig la. O da kʋʋ ba nɛ ka ba ziim kpa'ae nwɛnɛ ba bɛ nɛ zaba ni nɛ, amaa ka li da ka' zaba saŋaa. Linzug tuk dɔl o. 6 Maalim o fʋ ya'am gban'e si'em amaa da kɛ ka o kpi o daar paae ya kum.
7 “Amaa pa'alim Barizila onɛ yi Gilead teŋin la na biis la nɔŋilim, ka kɛ ka ba diti fʋ yin. Banɛ da zi'e m nya'aŋ fʋ bier Absalɔm da katim ka m zɔt la.
8 “Ka mɛ tɛnr Simie onɛ an Gera biig la yɛla, o anɛ Benjamin dɔɔg nid ka yi Bahurim teŋin na. Da tam on da pɔ nɔpɔbɛ'ɛdi ziil man si'em daakanɛ ka m da keŋ Mahanam teŋin la; amaa li nya'aŋ la o da kena tʋ'ʋsim Joodan kɔlʋgin la, ka m pɔ nɛ Zugsɔb la yʋ'ʋri tis o ye m kʋ kʋʋ o. 9 Amaa nannanna, da kɛɛ o taali basɛ. Fʋ anɛ dau kanɛ mɔr ya'am. Fʋ mi' fʋn na niŋ o si'em. Da kɛ ka o kpii o daar paae ya kumm.”
David kpiya
10 David da maal ka'alim ka ba mum o David tempʋʋgin. 11 O da di na'am nɛ yʋma ayɔpɔi Hebron teŋin, ka mɛ di yʋma pistan' nɛ atan' Jerusalem teŋin, ka li wʋsa la'as yʋma pisnaasi Israel teŋin. 12 Ka Solomon da zin'inɛ o ba' na'am gbauŋ zug ka o na'am la zi'en sʋ'ʋŋa.
Ba kʋʋ Adonija
13 Na'ab Solomon na'am la zi'en sʋ'ʋŋa la, ka daar yinne ka Adonija onɛ an Haggif biig la da keŋ Batsieba onɛ an Solomon ma la san'an na ka Batsieba bu'os o ye, “Laafi ka fʋ kenaa?”
Ka o ye, “Yɛlim!”
15 Ka o keŋ tuonnɛ yɛl o ye, “Fʋ mi' ye na'am la da anɛ man din. Israel dim wʋsa daa gɔsid nɛ man ka m aan ba na'ab. Amaa li tiakya ka na'am la keŋi m pitʋ san'an, ka li yinɛ Zugsɔb la san'an na. 16 Nannanna, m mɔri bʋn yinne bɔɔd ye m sɔsif; fa' da zan'asɛ!”.
Ka o lɛbis ye, “Yɛlim!”
17 Ka o keŋ tuon ye, “M bɛlimnɛ, yɛlim Na'ab Solomon, ka m mi' ye o kʋ ki'isi fɔ, ka o nɔk Abisag Seunim nid la tisim ka m dii o.”
18 Ka Batsieba lɛbis ye, “Li an sʋ'ʋŋa, m na yɛl na'ab la tisif.”
19 Ka Batsieba kpɛn' Na'ab Solomon san'an ye o pian' Adonija yɛla la, ka Na'ab la duoe tʋ'ʋs o, vanbini o tuonnɛ na'as o, ka lɛbi zin'in o na'am gbauŋ zug. Ka o kɛ ka ba mɔr kʋk na tis Na'ab ma la ka o zin'in o datiuŋ.
20 Ka o yɛl o ye, “Naa m bɔɔd ye m sɔs nɛ si'el bi'ela fʋ ni, amaa da mɔŋi ma!” Ka Na'ab la ye, “M maa, yɛlim ka m kʋ mɔŋi fɔ!”
21 Ka o ye, “Kɛl ka Abisag onɛ an Seunim nid la kuli fʋ bier Adonija ka lieb o pu'a.”
22 Ka Na'ab Solomon lɛbis o ma ye, “Bɔ ka fʋ sɔsid Abisag onɛ an Seunim nid la ye fʋ tisi Adonija? Fʋ na ba'asi sɔs na'am la tis o! M mi' ye o anɛ m bier. Ɛɛn, fʋ sɔsid na'am la nɛ ye fʋ tis on nɛ Abiata onɛ an maanmaan la nɛ Joab Zeruyia biig la.”
23 Ka Na'ab Solomon pɔ nɛ Zugsɔb la ye, “Wina'am kɛl ka tɔɔg kɛɛn m san'an na li ya'a bɔɔd din an si'em Adonija ya'a pʋ zaŋ o nyɔvʋri yɔ on sɔsid si'el la yɛlɛ! 24 M pɔya nɛ Zugsɔb onɛ diisim m saam David na'am ka dabiem kae, ka zi'el na'am la tinam zakin kpɛla nwɛnɛ on da pɔ nɔɔri zi'el si'em la, asɛɛ Adonija kpi zina!” 25 Na'ab Solomon da tis Benaya onɛ an Jehoyada biig la nɔɔr ka o keŋ nwɛ' Adonija bas teŋin ka o kpi.
Ba yis Abiata maanmaan tʋʋma ni
26 Na'ab la da yɛl Abiata onɛ an maanmaan la ye, “Lɛm Anatof linɛ aan fʋ mɛŋ teŋin la zin'in! Fʋ nar nɛ fʋn na kpi, amaa m kʋ kʋʋf nannannaa, bɔzugɔ fʋ da zi Zugsɔb Paŋtita'ar Sɔb la Nɔnaar Daka la dɔlli m saam David, ka mɛ di namiskan ka m saam da namis la.” 27 Dinzug, Solomon da yisi Abiata Zugsɔb maanmaan tʋʋma la ni, ka kɛ ka Zugsɔb pian'ad la liebi amɛŋa, on da yɛl si'el Eli yir yɛla Siilo teŋin la.
Joab kum yɛla
28 Labaari da paae Joab onɛ naal nɔɔr nɛ Adonija la, la'am nɛ on da pʋ dɔl Absalɔm la, o da zɔɔ keŋ kpɛn' Zugsɔb Sʋgʋrin la, ka gban'e maan daka la iila zi'e. 29 Ban da yɛl Na'ab Solomon ye, Joab zɔɔ kpɛn' Zugsɔb sʋgʋrin zi'e maan daka la ni la, Solomon da tis Benaya onɛ an Jehoyada biig la nɔɔr ye, “Kem nwɛ' o kʋ!”
30 Benaya da kpɛn' Zugsɔb sʋgʋrin la yɛl Joab ye, “Na'ab ye fʋ yina!” Amaa ka o lɛbis o ye, “Ayei, man na kpi kpɛla!” Ka Benaya lɛbi yɛl Na'ab la Joab n lɛbis o si'em la.
31 Na'ab la da tis Benaya nɔɔr ye, “Tɔ! Tʋm wʋʋ on yɛl si'em la! Nwɛ'ɛm o kʋ ka mum o, ka kɛ ka man nɛ m saam yir la yi taal pʋʋgin Joab n kʋ sieba zaalim la yɛla. 32 Zugsɔb la na yɔɔ o sam ziim kanɛ ka o yis la yɛla, bɔzugɔ, o kʋ dapa ayi' ka m saam zi' ti'irɛ; ba da anɛ Abner onɛ an Nier biig ka an Israel zabzabidib tuongat la, nɛ Amasa onɛ an Jeta biig ka an Juda zabzabidib tuongat la. Nidiba ayi' nwa da anɛ ninsʋma ka an sida dimi gat o. 33 Ba ziim la na kpɛlim nɛ Joab zugin nɛ o tuŋ la wʋsa. Amaa David nɛ o yir nɛ o tuŋ la, nɛ o na'am la, sumalisim na bɛ saŋa wʋsa ka li yi Zugsɔb la san'an na.”
34 Ka Benaya keŋ nwɛ' Joab n kʋʋ o: ka ba mum o, o mɛŋ yin mɔɔgin sa. 35 Na'ab la da kɛ ka Benaya an soogianam kpɛɛm n di'e Joab zin'ig, ka Zadok mɛ di'e Abiata zin'igi an maanmaan.
Simie kum yɛla
36 Na'ab la da tʋm buol Simie ka yɛl o ye, “Mɛɛmi fʋ yir Jerusalem tempʋʋgini bɛɛ ani, amaa da keŋ zin'isi'a. 37 Daar kanɛ ka fʋ ti yii lɔ'ɔŋ Kidron bɔn'ɔg la, baŋim ye fʋ na kpi, ka fʋ ziim na kpɛlimi fʋ mɛŋ zugin.”
38 Simie da lɛbis Na'ab la ye, “Naa, m zugdaana, fʋn yɛl si'em la an sʋ'ʋŋa, m na niŋ ala!” Simie da zin'in Jerusalem ka li yuug.
39 Amaa yʋma atan' nya'aŋ ka o sankpan'asnam ayi' zɔɔ keŋ Akis onɛ an Maaka biig ka an Gaf na'ab la san'an. Ka ba yɛl Simie ye, “Fʋ sankpan'asnam la bɛ Gaf teŋin.” 40 Ani ka o lɔɔ o buŋi keŋ Akis san'an Gaf teŋin ye o iee o sankpan'asnam la ka mɔri ba lɛb na.
41 Solomon n da wʋm ye, Simie yi Jerusalem keŋ Gaf ka lɛb na la, 42 o da buol Simie yɛl o ye, “M da kɛ ka fʋ pɔ Zugsɔb la tuon ka sa'alif ye, daar kanɛ ka fʋ ti yi Jerusalem keŋ zin'isi'a, baŋim ye daakan la fʋ na kpi, bɛɛ ka' ala? Saŋkan la fʋ da yɛlim ye, li an sʋ'ʋŋa, ye fʋ na siaki li! 43 Bɔ ka fʋ pʋ dɔlli fʋ nɔzi'elʋg kanɛ ka fʋ zi'el Zugsɔb la tuon, ka dɔlis man tisif nɔsi'a la?”
44 Na'ab la da lɛn yɛl Simie ye, “Fʋ mi' fʋ sʋnfʋn tʋʋmbɛ'ɛd kanɛ ka fʋ tʋm tisim saam David la. Baŋim ye Zugsɔb la na yɔɔ fʋ li sam. 45 Amaa man Solomon na mɔr albareka, ka David na'am la na kpɛm bɛ Zugsɔb la tuon saŋa wʋsa.”
46 Na'ab la da tis Benaya onɛ an Jehoyada biig la nɔɔr, ka o yii keŋ nwɛ' Simie kʋ.
Solomon na'am la yʋ'ʋn da zi'e kiŋ-kiŋ.