Yiiga Na'anam
1
1 Na'ab David da kʋdig nɛ hali ka ba mɔr futɛbisa pin o ka waad la'an zan'as ka kʋʋd o. 2 Ka o yammis la yɛl o ye, “Na'aba, kɛl ka ti ie pu'asadir onɛ nan zi' dau ka o kena bɛ nɛf ka gɔsidif. O na ɛɛnti diginɛ kpi'enif ka li kɛ ka waad kʋ lɛn nyaŋ fʋn onɛ aan ti zugdaan la.”3 Ba da ie pu'asadvɛnliŋ Israel teŋin wʋsa ka nyɛ nɛ Abisag onɛ an Seunim nid la mɔr o na tis Na'ab la. 4 Pu'asadir la da vɛnl nɛ hali. O da gɔsid Na'ab la ka gur o, amaa Na'ab la da pʋ digin nɛ o.
Adonija gban'e ye o faaɛn David Na'am
5 Adonija onɛ ka o ma yʋ'ʋr da an Haggif la da zaŋ o mɛŋi zi'el tuon ka ye, “Manɛ na an Na'ab.” Ka ti'ebi bɔ zaba tɛrekonam nɛ widi, ka bɔ dap pisnu ka ba gaad o tuonnɛ zun'od o. 6 O saam daa nan zi' bu'os o ye, “Bɔ ka fʋ tʋm tʋʋm kaŋa buudi?” Bɔzugɔ o daa pʋ bɔɔd ye o san'am o sʋnfɔ. O mɛ da vɛnl nɛ hali ka an Absalɔm nyɛ'ɛr. 7 Adonija da nwɛ' kpɛɛmnam ayi' sɔɔra, banɛ an Joab onɛ an Zeruyia biig la nɛ Abiata onɛ an maanmaan la, ka ba siak ka ye ba na sʋŋ o. 8 Amaa Zadok onɛ da an maanmaan la nɛ Benaya onɛ an Jehoyada biig la nɛ Natan onɛ an Wina'am nɔdi'es la nɛ Simie nɛ Rei nɛ banɛ gur Na'ab David la wʋsa da pʋ siaki zi'enɛ Adonija nya'aŋa.
9 Adonija da zaŋ pɛ'ɛs nɛ niigi nɛ na'arazɔla maal maan Zohelef Kugir zug dinɛ kpi'e Een-Rogel buligin la. O da buol o ba'abiis, nɛ Juda dim banɛ da an na'ayikpɛm la wʋsa; 10 amaa o da pʋ buol Natan onɛ an Wina'am nɔdi'es la, bɛɛ Benaya bɛɛ banɛ gur Na'ab David laa, ka mɛ pʋ buol o pitʋ Solomon nɛ.
Natan nɛ Batsieba gban'e si'em la yɛla
11 Natan da bu'os Batsieba onɛ an Solomon ma la ye, “Fʋ pʋ wʋm ye Adonija onɛ an Haggif biig la di na'am ka ti zugdaan David zi' li ti'irɛɛ? 12 Tɔ, kɛl ka m sa'alif fʋn na niŋ si'em faaɛn fʋ mɛŋ nɛ fʋ biig Solomon nyɔvʋr. 13 Kem Na'ab David san'an yɛl o ye, ‘Naa, Na'aba, fʋ da pʋ yɛl nɔɔri zi'elim ye, “Bi'esʋg kae, m ya'a ti kae, fʋ biig Solomon na ti dii m na'am la ka zin'ini m na'am gbauŋ la zugɔ?” Ka li niŋ wala ka Adonija di na'am la?’ 14 Ka fʋ ya'a nam bɛɛ anina pian'adi tisid Na'ab la, mam mɛ na kpɛn' na ka siak ye fʋn yɛl si'el la anɛ sida.”
15 Ani ka Batsieba keŋ kpɛn' Na'ab la san'an (onɛ an bʋnkʋdʋg ka bɛɛ o dɔɔgin la, zin'ikanɛ ka Abisag onɛ an Seunim nid la da gur o la). 16 Batsieba da igin Na'ab la tuon.
Ka Na'ab la bu'os o ye, “Fʋ bɔɔd bɔ?”
17 Ka o ye, “Naa, m zugdaana, fʋ da pɔ nɔɔri tisimi fʋ Zugsɔb Wina'am la tuon ye, fʋ ya'a ti kae m biig Solomon na dii fʋ na'am la, ka na zin' fʋ na'am gbauŋ la zug. 18 Amaa nannanna Adonija di na'am la ka fʋ zi' li ti'irɛ. 19 O maal niigi maana bɛdegʋ, na'arazɔla nɛ pɛ'ɛs, ka buol na'abiis la wʋsa, nɛ Abiata onɛ an maanmaan la, nɛ Joab onɛ an zabzabidib tuongat la, amaa o pʋ buoli fʋ tʋmtʋm Solomon nɛ. 20 M zugdaana, Israel dim wʋsa nini gɔsidi fʋ, ye fʋ yɛl ka ba baŋ fʋn na ti kae ka onɛ na zin'inɛ fʋ na'am gbauŋ la zug. 21 Ya'a ka' alaa, fʋ ya'a ti maal ka'alim, ba na maal man nɛ m biig Solomon wʋʋ ti anɛ tʋʋmbɛ'ɛd dim nɛ.”
22 On da nam bɛɛ ani pian'ad nɛ Na'ab la ka Natan mɛ paae na. 23 Ka ba yɛl Na'ab la ye, “Wina'am nɔdi'es Natan bɛ kpɛla.” Ka o keŋ igin Na'ab la tuon ka o nindaa kpa' teŋin na'as o.
24 Ka Natan yɛl ye, “M zugdaan Na'aba, fʋnɛ tis nɔɔr ye Adonija na di na'am laa? Fʋnɛ siak ye fʋ ya'a ti kae, o na zin'ini fʋ na'am gbauŋ la zugɔɔ? 25 Zina nwa o keŋ maal niigi nɛ na'arazɔla nɛ pɛ'ɛs maana bɛdegʋ. O kaanb na'abiis la wʋsa nɛ zabzabidib tuongatib nɛ Abiata onɛ an maanmaan la. Nannanna ba bɛɛ anina dit ka nuud ka yɛt ye, ‘Na'ab Adonija, Wina'am na tisif nyɔvʋwɔk!’ 26 Amaa o pʋ kaanb man nɛ Zadok onɛ an maanmaan la nɛ Benaya onɛ an Jehoyada biig la nɛ fʋ tʋmtʋm Solomon nɛ. 27 Naa, Na'aba, fʋn maal si'eli nwa ka tinam banɛ aan fʋ yammis la pʋ baŋ fʋn na ti kae ka onɛ na zin'inɛ fʋ na'am gbauŋ la zugɔ?”
Solomon na'am diib
28 Ka Na'ab David yɛl ye, “Buolimi Batsieba na!” Ka o kpɛn' na zi'en na'ab la tuon.
29 Ka Na'ab la yɛl ye, “M pɔya nɛ Zugsɔb onɛ yisim yɛla wʋsa pʋʋgin la yʋ'ʋr, 30 ye m sid na tʋm man da pɔ nɔɔri zi'el si'em Zugsɔb onɛ an Israel Wina'am la tuon la. Fʋ biig Solomon na ti dii m na'am la man nya'aŋ. Zina o na zin'inɛ m na'am gbauŋ la zug.”
31 Batsieba da igin Na'ab la tuon ka nɔk o nindaa kpa' teŋin na'as o ka ye, “Naa, Na'aba! Wina'am na tisif nyɔvʋwɔk!” 32 Na'ab David da yɛl ye, “Buolimi maanmaan Zadok na, nɛ Natan Wina'am nɔdi'es la nɛ Benaya onɛ an Jehoyada biig la!” Ban da kɛn Na'ab la tuon na la, 33 o da yɛli ba ye, “Nɔkimi m yammis la, ka ban'al Solomon mam mɛŋ wief la zugʋ, mɔr o keŋ Gihon buligin la. 34 Anina Zadok onɛ an maanmaan la nɛ Natan onɛ an nɔdi'es la na bu'oe malʋŋ kpaam niŋ o zugin ka diis o Israel na'am ka pieb na'atan la ka tans agɔla ye, ‘Na'ab Solomon, Wina'am na tisif nyɔvʋwɔk!’ 35 Ya na dɔl o dʋ na, ka o na kena zin'ini m na'am gbauŋ la zugʋ di'e man zin'ig. Manɛ gaŋ o ye o sʋ'oe Israel nɛ Juda.”
36 Jehoyada biig Benaya da lɛbisi yɛl Na'ab la ye, “Ami! Zugsɔb onɛ aan m zugdaan Wina'am la, na kɛ ka li niŋ ala. 37 Naa, m zugdaan Na'ab David! Zugsɔb la daa bɛ nɛf si'em la, o mɛ na bɛ nɛ Solomon ka na dʋ'ʋs o na'am la gaad ala.”
Ba bu'oe malʋŋ kpaam niŋ Solomon zugin ye ba diis o Na'am
38 Zadok onɛ an maanmaan la nɛ Natan Wina'am nɔdi'es la nɛ Benaya Jehoyada biig la nɛ Keret dim nɛ Pelet dim da keŋ ban'al Solomon Na'ab David wief la zugʋ mɔr o keŋ Gihon buligin la. 39 Zadok da kpɛn' Wina'am sʋgʋrin la nɔk iil ka kpaam bɛ li ni keŋ bu'oe niŋ Solomon zugin diis o na'am. Ka ba pieb na'atan ka nidib la wʋsa siaki agɔla ye, “Wina'am na tis Solomon nyɔvʋwɔk!” 40 Ka nidib la wʋsa dɔl o piebid na'atana ka maan sumalisim bɛdegʋ. Ka ba tʋkpiidʋg la kɛ ka teŋ dam.
41 Saŋkan ka Adonija nɛ saam banɛ bɛɛ o san'an la wʋsa di ka di'em bɔɔd naar la, ba da wʋm na'atan piebʋg ka Joab bu'os ye, “Tʋkpiidʋg kanɛ duod tempʋʋgin la gbin an bɔ?”
42 Hali on nam pian'ad la ka Jonatan onɛ an Abiata onɛ an maanmaan la biig paae na, ka Adonija ye, “Kpɛn'ɛm na, fʋ anɛ ninvʋsʋŋ, fʋ na mɔr labasʋŋʋ kena!”
43 Ka o ye, “Ayei, m pʋ mɔr labasʋŋ baa bi'elaa! Ti zugdaan Na'ab David diis Solomon na'am. 44 Na'ab la tʋm Zadok nɛ Natan nɛ Benaya nɛ Keret dim nɛ Pelet dim ka ba zaŋ o ban'al Na'ab wief la zug, 45 ka Zadok nɛ Natan nɔk kpaam bu'oe niŋ o zugini n diis o na'am Gihon buligin la. Ka ba yi anina maan sumalisim dʋ'ʋsid o ka tempʋʋg la wʋsa di'e nɛ ba vuud. Li tʋkpiidʋgʋ la ka fʋ wʋm la. 46 Hali Solomon zin'in Na'am gbauŋ la zug. 47 Dinɛ lɛm paas, na'ayikpɛm la kena pʋ'ʋsi ti zugdaan, Na'ab David, ye o mɔya ka kaanb ye, ‘Fʋ Wina'am la na kɛ ka Solomon na'am la gaadi fʋ na'am la, ka kɛ ka o yʋ'ʋr dʋʋ gaadi fʋ yʋ'ʋr.’ Ka Na'ab la igin o gadʋg zugʋ pʋ'ʋs Wina'am, 48 ka yɛl ye, ‘Zun'or anɛ Zugsɔb la din, onɛ an Israel Wina'am la, on kɛ ka m nini nyɛ onɛ di'e m na'am gbauŋ zina la!’ ”
49 Ani ka Adonija saam la wʋsa wʋm dinɛ maal la ka dabiem kpɛn' ba ka ba duoe widig. 50 Adonija n da zɔt Solomon dabiem la zug, o da gban'e iil banɛ bɛ Wina'am maan bimbim zug la. 51 Ka ba yɛl Solomon ye, “Naa, Adonija zɔtif dabiem ka yɛl ye, ‘Kɛl ka Na'ab Solomon pɔɔ zi'el zina ye o kʋ kʋʋ ma!’ ”