Solomon na'ayikpɛm piiga nɛ yinne la yɛla
4
1 Na'ab Solomon n da di na'am sʋ'oe Israel wʋsa la, 2 banɛ da aan o na'ayikpɛm la nwana: Azaria da anɛ Zadok onɛ an maanmaan la biig; 3 ka Elihoref nɛ Ahija da an Sisia biis. Ba da anɛ na'ayir gbauŋ sɔbidib; ka Ahilud biig Jehosafat da sʋ'oe gbana yɛla; 4 ka Benaya da an Jehoyada biig ka an soogianam kpɛɛm;Zadok nɛ Abiata da anɛ maanmaannib
5 Azaria onɛ an Natan biig la da gɔsid diisinam, banɛ an sʋ'ʋlim kpɛɛmnam la;
Zabud da anɛ Natan biig ka an maanmaan ka lɛn an Na'ab sa'alsa'an;
6 Ahisia da gɔsid na'ayir la;
Adoniram onɛ an Abida biig la da mugusid nidib ka ba tʋm Na'ab tʋʋma.
Sʋ'ʋlim piiga nɛ ayi' kpɛɛmnam la yɛla
7 Solomon mɛ da mɔr kpɛɛmnam pii nɛ ayi', banɛ an sʋ'ʋlim kpɛɛmnam ka bɛ Israel tɛɛnsin la, banɛ da la'asid diibi tisid Na'ab nɛ o yidim la wʋsa. Sɔ' wʋsa da tisid nɛ nwadig yinne yʋʋm wʋsa pʋʋgin. 8 Ba yʋda nwa: Ben-Hur da sʋ'oe Efiram dinɛ an kʋkʋna teŋ la; 9 ka Ben-Dekɛr sʋ'oe Makas nɛ Saalibim nɛ Bet-Semes nɛ Elon nɛ Bet-Hanan tɛɛns la; 10 ka Ben-Hesed mɛ sʋ'oe Arubof tempʋʋgin, ka lɛn sʋ'oe Soko teŋ nɛ Hefe teŋgbauŋ la wʋsa; 11 ka Ben-Abinadab sʋ'oe Nafof-Dor (o da dinɛ Solomon pu'ayua Tafaf); 12 ka Baana onɛ an Ahilud biig la sʋ'oe Taanak nɛ Megido tɛɛns, ka lɛn sʋ'oe Betsean teŋgbauŋ wʋsa dinɛ kpi'e nɛ Zaretan, ka bɛ Jezireel teŋir la, nɛ din yi Betsean paae Abɛl Mehola hali ti keŋ lɔ'ɔŋ Jokimem.
13 Ben-Gebɛr da sʋ'oe Ramot linɛ bɛ Gilead teŋin la, ka lɛn sʋ'oe teŋkpɛmis linɛ ka Manase biig Jair da zin' Gilead sʋ'ʋlimin la, nɛ Agob sʋ'ʋlim dinɛ bɛ Basan la, o tempʋʋs da anɛ pisyuobʋ banɛ ka ba mɛ' zaŋguomi gilig ka zaŋ kʋntzɛn'ug daadi kpari li za'anɔɔr la;
14 Ahinadab onɛ an Iddo biig la da sʋ'oe Mahanam teŋ la;
15 Ahimaaz da sʋ'oe Naftali dɔɔg sʋ'ʋlim (o da dinɛ Solomon pu'ayua Basemaf);
16 Baana onɛ an Husai biig la, da sʋ'oe Aser dɔɔg sʋ'ʋlim, nɛ Alof teŋ;
17 Jehosafat onɛ an Parua biig la da sʋ'oe Isaka dɔɔg sʋ'ʋlim;
18 Simie onɛ an Ela biig la da sʋ'oe Benjamin dɔɔg sʋ'ʋlim;
19 Geber onɛ an Uri biig la da sʋ'oe Gilead teŋgbauŋ, Amor dim na'ab Sihon nɛ Basan teŋ na'ab Og n da bɛ si'el la. Diisi yinne da bɛ sʋ'oe tɛɛns la wʋsa.
Na'ab Solomon Na'am la sumalisim yɛla
20 Juda nɛ Israel nidib la yʋ'ʋn da zu'oe nɛ nwɛnɛ atɛuk nɔɔrin titanbin'isi nɛ. Ba da dit nɛ ka nuud ka mɔr sumalisim. 21 Solomon da sʋ'ʋg tɛɛns la wʋsa, din yi Efiritis kɔldaug la keŋ paae Filistia teŋin keŋ paae Egipt teŋ titɔndig. Tembama dim da tʋmnɛ ka yɔɔd lampɔ tisid Solomon o nyɔvʋr bɛllim saŋa la wʋsa.
22 Solomon n da di'ed si'el dabisir yinne pʋʋgin da anɛ zɔm baanlig taslaas kɔbiga nɛ pisnu ka o diib mɛ an taslaas kɔbistan', 23 na'arazɔla piiga banɛ ka ba gʋ'ʋnnɛ ba gariki ni, nɛ niigi pisi banɛ ka ba kemmi ba yaama zin'ig, nɛ pɛ'ɛs nɛ bʋʋs kɔbiga la'am nɛ walis nɛ bʋnkɔnbsieba banɛ nwɛnɛ walis, nɛ bʋn-ian'ada nɛ nɔbɛda. 24 O da sʋ'oe tɛɛns banɛ bɛ kɔldaug la tuon la nɛ li na'anam, din yi Tifsa m paae Gaza la, ka mɔr sumbʋgʋsʋm zin'is wʋsa ka zaba kae. 25 Solomon nyɔvʋr bɛllim saŋa la, Juda nɛ Israel dim wʋsa da bɛnɛ nɛ sumalisim ka dabiem kae, din yi Dan hali keŋ paae Beerseba teŋin. Sɔ' wʋsa da mɔr o pɔɔg nɛ o lɔmbɔn'ɔg.
26 Solomon da mɛ' widi dɔɔd tusa pisnaasi kpɛn'ɛs o widi banɛ tɛɛd zaba tɛrekonam la, ka mɔr widi tusa pii nɛ ayi' banɛ ka ba da ban'adi ba.
27 Diisinam la da mɔr sɔ' wʋsa nɛ o nwadig ka o ziid diibi kenna tisid Na'ab Solomon nɛ banɛ wʋsa ken na'ayin na ye ba di la; si'el-si'el da pʋ pansigidi baa. 28 Ba mɛ da ziid mui nɛ widi la diibi mɔri ken zin'ikanɛ nar la na tisid widi banɛ tɛɛd zaba tɛrekonam, nɛ widi banɛ kpɛlim la.
Solomon ya'am nɛ o baŋir yɛla
29 Wina'am da tis Solomon ya'am nɛ baŋir nɛ pʋtɛn'ɛsʋŋ ka li galis wʋʋ atɛuk titanbin'isi an si'em la. 30 Solomon ya'am la da zu'oe gaad nimbanɛ da bɛ ya-nya'aŋ ka an ya'am dim la wʋsa, ka mɛ zu'oe gaad Egipt dim wʋsa ya'am. 31 O da mɔr ya'am gat sɔ' wʋsa, la'am nɛ Etan onɛ da an Ezrak teŋ nid la, o da mɔr ya'am gat Heman nɛ Kalkol nɛ Daada banɛ da an Mahol biis la. Ka o yʋ'ʋr tiig tembanɛ gilig la wʋsa. 32 O da siilim siilima tusa atan', ka yʋ'ʋm yʋʋma tusir nɛ anu. 33 O da pa'al tiig vʋm an si'em, din yi na'azinbɛda banɛ bɛ Lebanon la ti paae nyulinnyu'usi banɛ yit dɔkpin sian'asim la. O mɛ da tɛn'ɛsid bʋnkɔnbid buudi wʋsa, nɛ niis, nɛ zimi la yɛla. 34 Dunia wʋsa na'anam banɛ da wʋmmi o ya'am yɛla la da tʋmmi ba nidib Solomon san'an ka ba kennɛ kɛlisidi o ya'am pian'ad la.