Solomon n mɛ' Pʋ'ʋsim Yir la yɛla
3
1 Na'ab Solomon da pin'ili mɛɛd yir linɛ an Zugsɔb la din Jerusalem teŋin, Moria Zuor la zug, zin'ikanɛ ka Zugsɔb la da nie o mɛŋi pa'al o saam David la. Li da anɛ Arauna onɛ an Jebus nid la zieŋin, linɛ ka David da maali digil la. 2 O da pin'il mɛɛb la nɛ on di na'am la li yʋma anaasi la ni, li nwadkanɛ tia'al ayi' la, li daba ayi' daar. 3 Ɛɛnb kanɛ ka Solomon da ɛɛnb la wa'alim da anɛ wʋʋ nɔba yakir piswai, ka li yalʋŋ an nɔba yakir pistan' wʋʋ kʋdimin la ka ba da makid si'em la. 4 Dɔɔg la za'anɔɔr tuon zin'ikanɛ ka ba dɔlli kpɛn'ɛd la, ba da tɔlisi li yalʋŋ la nɛ ka li an nɔba makir pistan', ka vɛ'ɛgi yi tuon nɔba makir pii nɛ anu. Li pʋʋgin la, o da bʋligi li wʋsa nɛ sanlim ma'aa. 5 O da tabil dɔkpina la nɛ dasʋma ka bʋligi li nɛ sanlima, ka gʋli li kpʋkparis tiis ka maali li ye li tɔ'ɔŋ taaba nwɛnɛ zɔnt nɛ. 6 O da zaŋ nɛ sanlima nɛ kugvɛnla tabili tabil dɔkpina la ka li vɛnl hali, ka sanlima la mɛ an sanlim sʋŋ buudi. 7 O da buligi li yu'ada nɛ sanlima, ka dɔɔg la kɔlis dazi'eda nɛ dɔkpin nɛ kɔlis la wʋsa mɛ da bulig nɛ sanlima, ka o maal kɛrubnamɛ tabil dɔkpin la. 8 O da mɛ' Kasi Wʋsa Kasi Zin'ig la, ka li wa'alim zem nɛ dɔɔg la yalʋŋ. Li wa'alim da anɛ nɔba makir pistan' ka li yalʋŋ an nɔba makir pistan'. O da bʋligi li pʋʋgin la wʋsa nɛ sanlima ka li zu'oe hali. 9 Sanlima kpa'as la tɛbisim da zu'oya. Solomon mɛ da bʋlig dɔbanɛ bɛɛ agɔla la nɛ sanlima. 10 O da kpia Kerubnam ayi' ka bʋligi ba nɛ sanlima niŋ Kasi Wʋsa Kasi Zin'igin la. 11 Ba kpʋkpama yalʋŋ da tɔ'ɔŋ nɛ taaba paae nɔba makir pistan'. Yiiga Kerub la kpʋkpauŋ wa'alim da anɛ nɔba ayɔpɔi nɛ pʋsʋk ka li wa'am hali keŋ si'is dɔkpin la, ka kpʋkpauŋ yinne la mɛ makir zemis ala ka lin mɛ wa'am si'isid Kerub kaŋa la kpʋkpauŋ. 12 Ala mɛn nɔɔ ka Kerub kanɛ paas ayi' la kpʋkpauŋ wa'alim mɛ da anɛ nɔba makir ayɔpɔi nɛ pʋsʋk ka li wa'am hali keŋ si'is dɔkpin kaŋa la, ka kpʋkpauŋ kaŋa la wa'alim mɛ makir zemis ala ka lin mɛ wa'am si'isid Kerub kaŋa la kpʋkpauŋ. 13 Kerubnam la kpʋkpama yalʋŋ da tɔ'ɔŋ nɛ taaba paae nɔba makir pistan'. Ba da zi'enɛ ba nɔba zugʋ kpa' dɔɔg la mɛŋ. 14 O da maal fubanɛ bɛŋ la nɛ fuud linɛ mu'oe zim-zim, nɛ bʋnzɛn'is; nɛ pien piela, ka gʋl Kerubnamɛ tabil.15 O da zi'el buos ayi' dɔɔg la tuon banɛ wa'alim an nɔba makir pisnu nɛ ayi', ka linɛ sʋn'ʋli li zugin la wa'alim mɛ an nɔba makir ayɔpɔi. 16 Ka ʋg kʋnt ka li nwɛnɛ nwiisi lɔɔ li zugin la pa'al buos la zug. O mɛ da gʋl pomanganɛt wala tuunl zin'is ayi' gilig buos la zugin ka li vɛnl. 17 O da nɔki buos la zi'el Pʋ'ʋsim Dɔɔg la tuon, ka yinne lɛb ya-dagɔbʋg ka yinne lɛb ya-datiuŋ. Linɛ lɛb dagɔbʋg la ka o pʋdi li yʋ'ʋr ye Jakin ka pʋd linɛ lɛb datiuŋ la yʋ'ʋr ye Boaz.