Na'am la pʋdig Rehoboam nɛ Jeroboam saŋa la yɛla
12
1 Rehoboam da keŋ Sekɛm teŋin bɔzugɔ, Israel dim wʋsa da la'as nɛ anina ye ba diis o na'am. 2 Jeroboam onɛ an Nebat biig la da wʋmi li yɛla la (ka nam bɛ Egipt teŋin, on da zɔ Solomon yɛla la) o da yi Egipt n lɛb na. 3 Ka ba tʋm buol Jeroboam ka on nɛ Israel dim wʋsa keŋ Rehoboam san'an yɛl o ye, 4 “Fʋ saam daa nɔk yɔksin datɛbisiri ziili ti, amaa nannanna siem tʋʋm kpi'ema la nɛ yɔksin datɛbiskanɛ ka o daa ziili ti la, ka ti na tʋmmi tisidif.”5 Rehoboam da lɛbisi ba ye, “Lɛmmi ka daba atan' daar ka ya lɛb na!” Ka nidib la widigi kul.
6 Na'ab Rehoboam da bu'os kpɛɛm kʋda banɛ da bɛɛ o saam na'am saŋa la ye, “Ya tɛn'ɛs ye m na lɛbis nidib nwa ye bɔ?”
7 Ka ba lɛbis ye, “Fʋ ya'a siak zina nwa lieb nidib nwa tʋmtʋm ka tʋm tisi ba, ka ban sɔs si'el wʋsa ka fʋ lɛbisi ba sʋ'ʋŋa, nidib nwa na aan fʋ yammis saŋa wʋsa.”
8 Amaa Rehoboam da zan'as kpɛɛmnam la sa'alʋg ka keŋi o dasam taaba banɛ ka on nɛ ban la'am duoe na ka ba tʋmmi tisid o la san'an. 9 O da bu'osi ba ye, “Yanam sa'alʋg an bɔ? Ti na lɛbis nimbanɛ yɛlim ye m siem yɔksin datɛbiskanɛ ka m saam da ziili ba la nwa ye bɔ?”
10 Ka na'akim banɛ ka on nɛ ban la'am duoe na la lɛbis ye, “Yɛlim nimbanɛ yɛlif ye fʋ saam daa tisi ti yɔksin datɛbisir amaa siemi li tisi ti la ye, ‘Man nu'ubil mugumi gati m saam siaa! 11 M saam daa nɔk nɛ yɔksin datɛbisiri ziili ya, man na kɛ ka li maligim tɛbisi gaadi ala; m saam daa mɔri sisanbisi fiebidi ya, amaa man na fiebi ya nɛ namis ya!’ ”
12 Daba atan' nya'aŋ, Jeroboam nɛ nidib la wʋsa da lɛb Rehoboam san'an nwɛnɛ Na'ab la daa yɛli ba ye, “Lɛmmi daba atan' daar na la.” 13 Na'ab la da lɛbis nidib la nɛ yɔɔgʋ sa, ka zan'as kpɛɛmnam la sa'al o si'em la. 14 O da dɔlnɛ na'akim la sa'alʋg ka yɛl ye, “M saam daa nɔk nɛ yɔksin datɛbisiri ziili ya, man na kɛ ka li maligim tɛbisi gaad ala; m saam da mɔri sisanbisi fiebidi ya, amaa man na nɔk namisi fiebi ya!” 15 Na'ab la da pʋ kɛlis nidib la. Yɛlbanɛ maal nwa anɛ dinɛ yi Zugsɔb la san'an na, ye on da pian' si'eli tis Jeroboam onɛ an Nebat biig, ka dɔlisi yi Ahija onɛ an Siilo nid la san'an na la niŋ amɛŋa.
Na'am la pʋdig ka Jeroboam an Israel Na'ab la yɛla
16 Israel dim wʋsa nyɛ ka Na'ab la zan'as ka pʋ kɛlisi ba pian'ad la, ba lɛbis Na'ab la ye, “Ti pʋʋr an bɔ David yinnɛ?
Ka ti din an bɔ Jese biig la ni?
Israel dima, lɛm kulini ya yaan!
David, gɔsimi fʋ mɛŋ yir ma'aa!”
Ka Israel dim la lɛbi kul. 17 Amaa ya'a kpɛlim nɛ Israel dim banɛ da bɛ tempʋʋd banɛ bɛ Juda sʋ'ʋlimin la, Rehoboam da nan kpɛn sʋ'oe ba.
18 Na'ab Rehoboam da tʋm Adoniram onɛ da sʋ'oe tʋʋma yɛla la nidibin la, amaa Israel dim wʋsa da lɔb o nɛ kuga kʋ. Na'ab Rehoboam da nyaŋi zɔɔ kpɛn' o zaba tɛreko ni zɔɔ keŋ Jerusalem teŋin. 19 Ala ka Israel dim la da zan'as David yidim la ka aaɛn yi, hali paae zina.
20 Israel dim wʋsa da wʋm ye Jeroboam lɛb na la, ba da tʋm buol o nidib la la'as si'el la diis o na'am ka o sʋ'oe Israel wʋsa. Juda dɔɔg dim ma'aa da kpɛn dɔl David yidim la. 21 Rehoboam n da paae Jerusalem la, o da la'as Juda yidim la wʋsa nɛ banɛ an Benjamin dɔɔg la dap banɛ mi' zaba la, nidib tusa kɔbiga nɛ pisnii (180,000), ye ba keŋ zab nɛ Israel nidibi di'e na'am la lɛbisi tis Rehoboam onɛ an Solomon biig la.
22 Amaa Wina'am labakaŋa da kɛn Semaya onɛ an Wina'am nid la san'an na yɛl o ye, 23 “Yɛlim Solomon biig Rehoboam onɛ an Juda Na'ab la nɛ Juda dim nɛ banɛ an Benjamin nidib la nɛ nimbanɛ kpɛlim la wʋsa ye, 24 ‘Zugsɔb la yɛl si'eli nwa: Da keŋ zab nɛ ya ba'abiis Israel dim la. Ya wʋsa lɛm kuli ka nɛ'ɛŋa anɛ manɛ tʋmi li.’ ” Ka ba siak ka lɛbi kul wʋʋ Zugsɔb la yɛli ba si'em la.
Jeroboam maal bada
25 Jeroboam da mɛ' Sekɛm teŋ dinɛ bɛ Efiram sʋ'ʋlim linɛ an kʋkʋna teŋ la, zin'inɛ anina. Ka yii ani keŋ mɛ' Penuel teŋ.
26 Jeroboam da tɛn'ɛs o pʋtɛn'ɛrin ye, “Lin an si'em la, na'am la na ti ba'asi lɛb David yin. 27 Nidib la ya'a nan kpɛn ken Jerusalem maan maana Zugsɔb la Yin, ba na ti lɛn zaŋidi ba na'asi kennɛ ba zugdaan Rehoboam onɛ an Juda dim Na'ab la ni. Ba na ti kʋʋm ka lɛb Na'ab Rehoboam san'an.”
28 On da bu'os ka ba sa'al o naae la, Na'ab la da maal sanlima na'abibis ayi'. O da yɛl nidib la ye, “Li lalli galis nɛ yanamɛ na ken Jerusalem; ya teŋgban banɛ da mɔri ya yi Egipt na la nwa!” 29 O da nɔk yinne zi'el Betel teŋin, ka mɛ zi'el yinne Dan teŋin. 30 Ka nɛ' lieb tʋʋmbɛ'ɛd hali, nidib la da keŋ hali paae Dan teŋin maan ba'ar kanɛ bɛɛ anina la.
31 Jeroboam da mɛ' teŋgbana dɔɔd kʋkʋna wʋsa zug. Ka bɔ nidibi diis maanmaannib dɔɔg wʋsa ni, la'am nɛ ban da ka' Levi dim la. 32 O da zi'el malʋŋ ka ba maannɛ li nwadig dabpii nɛ anu nwadkanɛ paas anii la ni, nwɛnɛ ban maan Juda si'em, ka kʋʋd bʋnkɔnbid bimbimin la. On da maal si'eli nwa Betel teŋin, kʋʋd bʋnkɔnbidi tisid na'abil kanɛ ka o maal la. Betel teŋin o da kɛ ka kʋkʋna zug teŋgbana maanmaan banɛ ka o mɛŋ diis la sʋ'oe malʋŋ tʋʋma la. 33 Nwadkanɛ paas anii la, li dabpii nɛ anu daar, nwadkanɛ ka o mɛŋ gaŋ la, o da maal maana bimbim kanɛ ka o mɛ Betel teŋin la. O da zi'el malʋŋʋ tis Israel dim la, ka dʋ bimbim la zugʋ maal maana.