Zugsɔb la ye Jeroboam bimbim la ka' sida la yɛla
13
1 Zugsɔb la labaar da kɛn Wina'am nid san'an na, ka o yi Juda kɛn Betel na, saŋkan la ka Jeroboam zi'e bimbimin la bɔɔd ye o maal maan. 2 O da di'e Zugsɔb la pian'ad ka kaas agɔla zɛrig maan bimbim la ye, “Fʋn bimbim nwa, bimbim nwa! Zugsɔb la yɛl si'eli nwa: ba na du'a biribiŋ David yin, ka o yʋ'ʋr na buon Josia. Fʋn bimbim kaŋa zug ka o na kɔdʋg maanmaannib banɛ maan maana kʋkʋna zug teŋgbana nwa ni. Ba na nyu'oe ninsaal kɔnba fʋ zug!” 3 Daakan la yim ka Wina'am nid la da tis zanbin ka yɛl ye, “Zugsɔb la zi'el zanbin si'a nwa: bimbim la na buak ka li tampɛligim na widig teŋin la!”Jeroboam nu'ugʋ kpi la yɛla
4 Na'ab Jeroboam n da wʋm Wina'am nid la kaasi yɛl bimbim kanɛ bɛ Betel la yɛla si'em la, o ties o nu'ugʋ pa'al dau la ka yɛl ye, “Gban'ami nɛ o!” Amaa nu'ug kanɛ ka o ties ye ba gban'am o la kpɛn kpinɛ ani, ka o mak ye o ʋk nu'ug la lɛbisi gʋ'ʋŋ. 5 Ka bimbim la mɛ buak ka li tampɛligim la widig, nwɛnɛ Wina'am nid la yɛl Zugsɔb la pian'ad si'em la. 6 Ani ka Na'ab la yɛl Wina'am nid la ye, “Sɔsimi fʋ Zugsɔb Wina'am la tisim, ka m nu'ug la lɛbi li zin'igin!” Wina'am nid la da sɔs Zugsɔb la o yɛla, ka Na'ab la nu'ug lɛbi li zin'igin an wʋʋ din ɛɛnti an si'em la.
7 Na'ab la da yɛl Wina'am nid la ye, “Kemi m yin na paam si'eli di, ka m na tisif piini.”
8 Amaa Wina'am nid la da lɛbis o ye, “Hali fʋ ya'a tisim fʋn mɔr si'el wʋsa pʋsʋk m kʋ dɔllif bɛɛ m di diib ka nu ku'om kpɛla. 9 Li anɛ Zugsɔb la tisim nɔɔr ye m da di diib bɛɛ nu ku'om bɛɛ dɔl suokanɛ ka m kena la lɛbɛ.” 10 Ka o tɔɔm suor ka pʋ dɔl suokanɛ ka o dɔlli keŋ Betel la lɛbɛ.
Betel nɔdi'es kʋdiri niŋ si'em
11 Wina'am nɔdi'es kʋdig da bɛ Betel tempʋʋgin, ka o biis kena yɛl o Wina'am nid la kena tʋm si'em daakan la. Ba la'am yɛli ba saam on pian' si'em tis Na'ab la. 12 Ka ba saam la bu'osi ba ye, “O dɔl suokanɛ keŋɛ?” Ka biis la pa'al Wina'am nid onɛ yi Juda na la dɔl suosi'a. 13 Ka o yɛl o biis la ye, “Li'emi bʋŋ la tisim!” Ban li'a bʋŋ la tis o la ka o ban'a 14 bʋŋ la kat Wina'am nid la bugir, ka nyɛɛ o ka o zin' titita'ar gbinnin. Ka o bu'os o ye, “Fʋnɛ an Wina'am nid onɛ yi Juda na laa?”
Ka o lɛbis ye, “Manɛ la.”
15 Ka nɔdi'es kʋdig la yɛl o ye, “Dɔllim ka ti kul ka fʋ di!”
16 Ka Wina'am nid la yɛl ye, “M kʋ nyaŋi dɔlli fʋ lɛbɛ, ka mɛ kʋ la'as nɛ fʋ di diib bɛɛ nu ku'om zin'ikaŋa. 17 Zugsɔb la yɛlim ye, ‘Da di diib bɛɛ nu ku'om anina, bɛɛ fʋ lɛn dɔl suokanɛ ka fʋ dɔlli kena la.’ ”
18 Ka Wina'am nɔdi'es kʋdig la yɛl ye, “Mam anɛ nɔdi'es wʋʋ fʋn an si'em la. Zugsɔb la pian'ad yi maliak san'an yɛlim ye, ‘Dɔl o lɛbi fʋ yin na ka o di diib ka nu ku'om.’ ” (Amaa o da ma'ad o nɛ.) 19 Ka Wina'am nid la dɔl o lɛbi di ka nuu o yin la.
Wina'am nid kum yɛla
20 Ban nam bɛɛ ani dit la, ka Zugsɔb la pian'ad kɛn nɔdi'es kʋdig onɛ dɔl o lɛb na la san'an na, 21 ka o kaasi yɛl Wina'am nid onɛ yi Juda la na ye, “Zugsɔb la yɛl si'eli nwa: ye, fʋ san'am Zugsɔb la pian'ad, ka pʋ dɔlli fʋ Zugsɔb Wina'am nɔzi'elʋg dinɛ ka o tisif la! 22 Fʋ lɛb na di diib ka nu ku'om zin'ikanɛ ka o yɛlif ye fʋ da di bɛɛ nuu. Alazugɔ, fʋ niŋgbiŋ kʋ mumi fʋ saamnam yaadin la.” 23 Wina'am nid la di ka nuu naae la, nɔdi'es kanɛ buol o lɛb na la da li'a o buŋi tis o. 24 On da di'e o suori ken la, ka gbigim sia'al o suorin la kʋʋ o lɔb o niŋgbiŋ la bas suorin la, ka bʋŋ la nɛ gbigim la la'am zi'e kpi'e nɛ o. 25 Ninsieba da dɔl anina gat ka nyɛɛ o niŋgbiŋ la dig teŋin, ka gbigim la mɛ zi'e kpi'e anina, ka ba lɛb tempʋʋgin nɔdi'es kʋdig la bɛ zin'isi'a la yɛl o.
26 Nɔdi'es kanɛ mɔr o suorinɛ lɛb na la wʋmi li la o yɛl ye, “Li anɛ Wina'am nid onɛ ki'is Zugsɔb pian'ad la, la. Zugsɔb la zaŋ o tis gbigim la, ka o gban'e o kʋʋ o, nwɛnɛ Zugsɔb pian'ad la dɛŋi sa'al o si'em la.”
27 Nɔdi'es la da yɛl o biis la ye, “Li'emi bʋŋ la tisim.” Ka ba niŋi ala. 28 Ka o yii keŋ nyɛ niŋgbiŋ la ka li dig suorin ka bʋŋ la nɛ gbigim la la'am zi'e kpi'e. Gbigim la da pʋ ɔnb niŋgbiŋ la bɛɛ pu'alim bʋŋ la. 29 Nɔdi'es la da nɔk Wina'am nid la ban'ali o bʋŋ zugʋ mɔr o lɛb o mɛŋ teŋinɛ kaasi o kʋʋr ka mum o. 30 O da mum o nɛ o mɛŋ yaʋgʋn ka kaas o kʋʋri yɛt ye, “Oi! M ba'abiiga!” 31 On mum o naae la ka yɛl o biis la ye, “M ya'a ti kpi, yanam mɛ mumim Wina'am nid la ka ti mum yasi'a la ni. Digilimi m kɔnba kpi'el nɛ o kɔnba. 32 Wina'am labaar kanɛ ka o di'e pian' Betel bimbim la yɛla nɛ teŋgbana nɛ kʋkʋna zug teŋgbana banɛ bɛ Samaria tempʋʋdin la niŋ amɛŋa.”
Teŋgbana maalʋg la yɛla