Egipt na'ab Sisiak n zab nɛ Jerusalem
12
1 Na'ab Rehoboam na'am la da zi'en ka o paam paŋ la, on nɛ Israel dim la wʋsa da tam Zugsɔb zi'ela la yɛla. 2 Ban da pʋ dɔl Zugsɔb la nɛ sida la zug, Egipt na'ab Sisiak da kena ye o zab nɛ Jerusalem, Rehoboam da di na'am la, li yʋma anu saŋa. 3 Na'ab Sisiak da dɔl zaba tɛrekonam tusir nɛ kɔbisyi' (1,200) paas banɛ zabid nɛ widi tusa pisyuobʋ (60,000) nɛ Libiya zabzabidib banɛ ka' bɛnnɛ kena. Suk dim nɛ Kus dim mɛ da dɔl o yi Egipt teŋin na. 4 O da nyaŋi faaɛn teŋ kpi'ema banɛ bɛ Juda la, hali mɔr ala paae Jerusalem na.5 Na'ab Rehoboam nɛ Juda kpɛɛmnam la da la'as taaba Jerusalem tempʋʋgin ban zɔ Sisiak dabiem la zug. Semaya onɛ da an nɔdi'es la da kɛɛn ba san'an na, ka yɛli ba ye, “Zugsɔb la yɛl si'em nwa: ‘Ya kɛɛsimi bas ka m mɛ kɛɛsi ya basi tis Sisiak.’ ” 6 Israel kpɛɛmnam la nɛ Na'ab la yʋ'ʋn da sie ba mɛŋ ka yɛl ye, “Zugsɔb la anɛ pʋpiel.” 7 Zugsɔb la da nyɛ ka ba sie ba mɛŋ la, o da kɛ ka labakaŋa kɛn Semaya san'an na, ye, “Ban sadigim sie ba mɛŋ la, m kʋ san'ami baa, amaa m lɛɛ na tisi ba yɔlisim ka li kʋ yuugɛ. M kʋ kɛ ka m sʋnpɛɛn la dɔlis Sisiak san'anɛ lu Jerusalem dim zugɔ. 8 Amaa ba na tʋmmi tisid o ka linɛ na kɛ ka ba baŋ ban na tʋmmi tisid Zugsɔb la nɛ ban na tʋmmi tisid teŋ zʋŋ na'abi bɛ kɔn'ɔb-kɔn'ɔb si'em.”
9 Sisiak onɛ da an Egipt na'ab la da zab nɛ Jerusalem la, o da vaae Zugsɔb Yir la kpan'am wʋsa nɛ na'ayir kpan'am la wʋsa. O da vaae si'el wʋsa la'am nɛ sanlima zaba la'abanɛ ti'ed nyɔ'ɔg ka Solomon da maal la. 10 Alazug Na'ab Rehoboam da maal kʋntzɛn'ug zaba la'abanɛ ti'ed nyɔ'ɔg la lɛbis, ka nɔki ba gu'ul banɛ gur na'ayir la kpɛɛmnam. 11 Na'ab la ya'a ɛɛnti kpɛn' Zugsɔb Yin la, banɛ gur la na mɔr la'ad nwa dɔl o keŋ, ka li nya'aŋ la ba na lɛbisi li na'ayir dɔkanɛ ka ba gur la ni.
12 Na'ab Rehoboam n da sie o mɛŋ la zug, Zugsɔb la sʋnpɛɛn da pʋ san'am o nyainnɛ. Ya'a an sida, bʋnsʋŋ da kpɛm bɛ Juda teŋin bi'ela.
13 Na'ab Rehoboam da zin' kiŋ-kiŋ Jerusalem tempʋʋgin ka o na'am yʋma ken tuon. O da anɛ yʋma pisnaasi nɛ yinne ka di na'am la. O da sʋ'oe teŋ la yʋma pii nɛ ayɔpɔi Jerusalem tempʋʋgin, tempʋkanɛ ka Zugsɔb la gaŋ Israel dɔɔd wʋsa sʋʋgin ye o niŋ o yʋ'ʋr la. O ma yʋ'ʋri da buon Naama; ka o an Ammon nid. 14 Na'ab Rehoboam da tʋm bɛ'ɛd bɔzugɔ o da pʋ gban'e o sʋʋnrin ye o dɔl Zugsɔb la.
15 Ya'a kpɛlim yɛla banɛ da maal Rehoboam na'am saŋa nɛ on da tʋm si'el la, ba da sɔbi niŋ Semaya onɛ da an nɔdi'es la gbana ni, nɛ Iddo onɛ nyɛt nier yɛla la gbauŋ kanɛ pa'an tuŋ-tuŋ yɛla la ni. Rehoboam nɛ Jeroboam da kpɛn zabid nɛ taaba ala saŋa wʋsa. 16 Ka Rehoboam maal ka'alim ka ba mum o David tempʋʋgin. Ka o biig Abija di'e o zin'igi di na'am.