Abija n di'e Rehoboam zin'ig la yɛla
13
1 Nebat biig Jeroboam na'am diib yʋma pii nɛ anii saŋa la, Abija da di Juda na'am, 2 ka sʋ'oe Jerusalem yʋma atan'. O ma yʋ'ʋri da buon Maaka, onɛ an Uriel onɛ yi Gibea la pu'ayua.Na'ab Abija nɛ Na'ab Jeroboam da tʋ'ʋs taaba nɛ zaba. 3 Abija da yi zabir la nɛ soogianam banɛ mi' zaba ban tusa kɔbisnaasi (400,000), ka Jeroboam mɛ yi zabir la nɛ soogianam banɛ mi' zaba ban tusa kɔbisnii (800,000) tʋ'ʋs o.
4 Abija da duoe zi'e zuokanɛ yʋ'ʋri buon Zemaram ka bɛ Efiram linɛ an kʋkʋna teŋ la zug, ka yɛl ye, “Jeroboam fʋn nɛ Israel dim wʋsa, kɛlisimi! 5 Ya zi' ye Zugsɔb onɛ an Israel Wina'am la digil nɛ nɔnaar kpi'euŋ ka nɔk Israel na'am la niŋ David yaas nu'usin saŋa linɛ ka' bɛnnɛ? 6 La'am nɛ wala, Jeroboam onɛ an Nebat biig ka an Solomon onɛ an David biig la tʋmtʋmnib yinne la duoe ki'isid o zugdaan nɔɔr. 7 Ninyaalis sieba mɛ da keŋ la'asi gilig o ka zan'as Na'ab Rehoboam onɛ an Na'ab Solomon biig la saŋa kanɛ ka o da nan an dasaŋ ka kʋ nyaŋi ki'isi ba pian'ad la.
8 “Ka nannanna ka ya gban'e ye ya zan'as Zugsɔb la sʋ'ʋlim linɛ bɛ David yaas nu'usin la. Ya sid anɛ zabzabidib banɛ zu'oe, ka mɔr sanlima na'abibis banɛ ka Jeroboam da maal ye li aan ya Wina'am la. 9 Ya daa pʋ kad Zugsɔb maanmaannib banɛ an Aaron biis nɛ Levi dim la yis ka bɔɔ ya mɛŋ maanmaannib wʋʋ teŋ zʋna la maan si'em la? Ka onɛ wʋsa kena nɔk na'arapɔl bɛɛ pɛraad ayɔpɔi maal o mɛŋ kasi na lɛbig maanmaanni tis bʋn banɛ ka' Wina'am.
10 “Amaa Zugsɔb la sadigim aan ti Wina'am ka tinam pʋ ki'is o la, maanmaannib banɛ tʋmmi tisid Zugsɔb la anɛ Aaron biis ka Levi dim la sʋŋidi ba. 11 Bɛkɛung nɛ zaam wʋsa ba maan nyu'or maan nɛ bʋnnyubisa tisid Zugsɔb la. Ba pa'an maan bodobodo la teebul kanɛ an kasi la zug, ka nyu'od fita banɛ bɛ sanlima fitazi'esa zug la zaam wʋsa. Tinam dɔlisid Zugsɔb la bɔɔdim wʋsa. Amaa yanam bas o nɛ. 12 Wina'am bɛnɛ nɛ tinam. Onɛ aan ti tuongat. O maanmaannib banɛ mɔr na'atana la na pieb zaba piebʋgʋ tʋ'ʋsi ya. Israel dima, da zabi nɛ Zugsɔb onɛ aan ya yaanam Wina'am laa, bɔzugɔ ya kʋ nyaŋɛ.”
13 Saŋa kan la Jeroboam da kɛ ka o zabzabidib gaadi keŋ dɔl sian'anr la giligi kaae Juda dim la nya'aŋ, ka on gaadi tʋ'ʋs Juda dim la ka banɛ gu' la bɛɛ ba nya'aŋ. 14 Juda dim da fɛndigi nyɛ ka ba naan tuon nɛ nya'aŋ la zabid nɛ ba. Ka ba kaasi buol Zugsɔb la. Ka maanmaannib la piebi ba na'atana la. 15 Ka Juda dim la wɔɔl tanp wɔɔlʋg, ka ban wɔɔli naae la ka Zugsɔb la kɛ ka Na'ab Abija nɛ Juda dim nyaŋ Jeroboam nɛ Israel dim la wʋsa. 16 Israel dim la daa zɔnɛ ka Wina'am kɛ ka Juda dim la nyaŋi ba. 17 Abija nɛ o nidib la da kʋʋ ba bɛdegʋ, Israel dapkpi'ema tusa kɔbisnu (500,000) ka ba da kʋ. 18 Ba da nyaŋ Israel dim la zabkan la ni. Juda dim la da nyaŋ ya bɔzugɔ ba da ti'enɛ Zugsɔb onɛ aan ba yaanam Wina'am la.
19 Na'ab Abija da kad Jeroboam hali ka faaɛn Betel nɛ Jesiana nɛ Efiron nɛ teŋkpɛmis banɛ kpi'e ba la wʋsa. 20 Abija na'am saŋa la Jeroboam da pʋ maligim nyɛ nyaŋirɛ, hali nɛ Zugsɔb la ti nwɛ' o ka o kpi.
21 Amaa Na'ab Abija da kpɛn kennɛ tuon nɛ kpi'euŋ. O da dinɛ pu'ab pii nɛ anaasi ka du'a biribis pisi nɛ ayi' nɛ bipumis pii nɛ ayuobʋ.
22 Bʋmbanɛ wʋsa da maal Abija na'am saŋa la, nɛ on da maal si'el nɛ on da yɛl si'el wʋsa la, sɔbi bɛ nɔdi'es Iddo yɛlkʋda gbana la ni.