14
1 Na'ab Abija da maal ka'alim ka ba mum o David tempʋʋgin, ka o biig Asa di'e o zin'igi di na'am. On na'am la saŋa, teŋ la da digin nɛ sumbʋgʋsʋm hali ti paae yʋma piiga.Asa onɛ an Juda na'ab la yɛla
2 Na'ab Asa da tʋm linɛ an sʋm ka dɔl suor Zugsɔb onɛ aan o Wina'am la nini ni. 3 O da yis teŋ zʋna maana bimbima la nɛ kʋkʋna zug maana zin'is la, ka nwa' kugbanɛ ka ba zi'eli maal la, ka nwa'ae teŋgban Asera daad la bas. 4 Ka tis Juda dim nɔɔr ye ba dɔl Zugsɔb onɛ aan ba yaanam Wina'am la, ka dɔlli o wada nɛ o nɔzi'ela la. 5 O da yis maana zin'is nɛ ban nyu'od bʋnnyubisa bimbim sieba zug la, tempʋʋs linɛ bɛ Juda wʋsa ni, ka teŋ la wʋsa da digin nɛ sumbʋgʋsʋm o na'am la saŋa. 6 Juda teŋ la da dig nɛ sumbʋgʋsʋm la zug, o da maligim mɛ' Juda sʋ'ʋlim teŋ kpi'ema la. Yʋʋm ban la sɔ' da pʋ zabid nɛ o, bɔzugɔ Zugsɔb la da tis o vʋ'ʋsʋm.
7 O da yɛl Juda dim ye, “Kɛlli ka ti mɛ' tɛɛns la, ka mɛ' zaŋguoma giligi li, nɛ dɔwa'ama, nɛ za'anɔya nɛ dapirida. Bɔzugɔ teŋ la nan anɛ ti din, tinamɛ dɔl Zugsɔb onɛ aan ti Wina'am bɔɔdim la. Ti dɔl o nɛ ka o tisi ti vʋ'ʋsʋm zin'ig wʋsa.” Alazug ba da mɛ' ya', ka paam kpan'am hali.
8 Asa da mɔri soogianam tusa kɔbistan' (300,000) banɛ yi Juda teŋin na, banɛ mɔr gbanti'ebɛda la nɛ kpana, ka tusa kɔbisyi' nɛ pisnii (280,000) yi Benjamin dɔɔg la ni banɛ mɔr gbanti'edbibis nɛ tiraad. Bama wʋsa da anɛ zabzabidib banɛ sʋnfʋ kpi'em hali.
9 Zera onɛ an Kus buudi la da nɔk zabzabidib bɛdegʋ nɛ zaba tɛrekonam kɔbistan' (300) kena hali ti paae Maresa teŋin. 10 Na'ab Asa da yii keŋ ye o tʋ'ʋs o, ka ba kpa' taaba Zefata Bɔn'ɔgin linɛ kpi'e Maresa teŋ la. 11 Ka Na'ab Asa buol Zugsɔb onɛ aan o Wina'am la yʋ'ʋr ka yɛl ye, “Zugsɔba, sɔ' kae nwɛnɛ fʋn ka na nyaŋi sʋŋ tadimnam ba ya'a ti ye ba tʋ'ʋs kpi'emnama. O ti Zugsɔb Wina'am, sʋŋimi ti ka ti ti'enɛ fʋn. Fʋ yʋ'ʋr la ka ti nɔkidi tʋ'ʋsid soogia banɛ zu'oe nwa. O Zugsɔba, fʋnɛ aan ti Wina'am; da kɛ ka ninsaal nyaŋi fɔ.”
12 Zugsɔb la da kʋ Kus dim la Asa nɛ Juda dim tuon. Kus dim la da zɔya, 13 ka Asa nɛ o zabzabidib la dɔlli ba, hali ti paae Gera teŋin. Kus nimbanɛ da kpi la da zu'oe si'em la da kɛ ka ba pʋ lɛn zi'enɛ. Ba da nyaŋi ba Zugsɔb la nɛ o nidib la tuon. Juda nidib la da paam la'ad bɛdegʋ vaae. 14 Ba da san'am teŋkpɛmis banɛ gilig Gera teŋ la wʋsa bɔzugɔ dabiem da gban'e ba Zugsɔb la tʋʋma zug. Juda dim da faaɛn tembama wʋsa bɔzugɔ la'ad bɛdegʋ da bɛɛ anina ka ba na vaae. 15 Ba mɛ da keŋi ba kɔnbkemnib la da bɛ zin'isieba la zabi faaɛn pɛ'ɛs nɛ bʋʋs nɛ yʋgʋma bɛdegʋ ka yʋ'ʋn lɛb Jerusalem.