Na'ab Asa siak tiakir la yɛla
15
1 Wina'am Siig la da kɛn Azaria onɛ an Oded biig la ni na. 2 Ka o yii tʋ'ʋs Na'ab Asa suorin ka yɛl o ye, “Fʋn na'ab Asa nɛ Juda nɛ Benjamin dima, kɛlisimi sʋ'ʋŋa! Ya ya'a bɛ Zugsɔb la san'an o mɛ na bɛɛ ya san'an. Ya ya'a iee o, ya na nyɛɛ o; amaa ya ya'a zan'as o, o mɛ na zan'asi ya. 3 Li da yuug ya ka Israel da bɛ ka Wina'am onɛ an sida Wina'am la ka' ba san'anɛ, ka maanmaan kae na pa'ali baa, ka wada la mɛ kae. 4 Amaa ba namisʋg la pʋʋgin ba da fɛndigi lɛb Zugsɔb la san'an, onɛ an Israel Wina'am la, iee o ka nyɛɛ o. 5 Saŋa kan la li da ka' na'ana ka fʋ gɔɔndi fʋ ya'aminɛ bɔzugɔ daamʋg nɛ tɔɔg da bɛ tɛɛnsin la wʋsa. 6 Teŋ yinne da ɛɛn duoe zabid nɛ teŋ yinne, ka tempʋʋg duoe zabid nɛ tempʋʋg, bɔzugɔ Wina'am da daamidi ba nɛ yɛla kɔn'ɔb-kɔn'ɔb. 7 Amaa ya'a kpɛlim nɛ fʋn, kpɛ'ɛŋimi fʋ mɛŋ, ka da kɛ ka fʋ giinla siɛn ka fʋ tʋʋma la duoe zaalim; fʋ na di'e li yɔɔd.”8 Na'ab Asa n da wʋm pian'abama Oded biig Azaria onɛ an nɔdi'es la san'an la, o sʋnf da kpɛ'ɛŋ nɛ. O da yis bada banɛ ka Zugsɔb kis la Juda teŋin la wʋsa nɛ Benjamin sʋ'ʋlim nɛ tembanɛ ka o zabi nyaŋ ka li bɛ Efiram linɛ an kʋkʋna teŋin la wʋsa. O da maligim maal Zugsɔb maan daka linɛ bɛ Zugsɔb Pʋ'ʋsim Dɔɔg za'ambɛŋ tuon la.
9 O yʋ'ʋn da la'as Juda nɛ Benjamin nidib wʋsa nɛ nimbanɛ yi Efiram nɛ Manase nɛ Simeon dɔɔd ni na la ka zin'in nɛ ba. Bɔzugɔ nidib pamm da naan Israel teŋin kɛɛn o san'an na, ban da nyɛ ka Zugsɔb onɛ an Wina'am la bɛ nɛ o la zug. 10 Ba da la'as nɛ Jerusalem teŋin, Asa na'am la yʋʋm pii nɛ anu, li nwadkanɛ paas atan' la ni. 11 Saŋa kan la ba da maal maannɛ tis Zugsɔb la nɛ niigi kɔbisyɔpɔi nɛ pɛ'ɛs nɛ bʋʋs tusa ayɔpɔi banɛ ka ba faaɛn zaba ni n kul na la. 12 Ba da naal nɔɔr ye ba dɔl Zugsɔb onɛ aan ba yaanam Wina'am la nɛ ba sʋnf wʋsa nɛ ba siig wʋsa. 13 Banɛ wʋsa da pʋ siak ye ba dɔl Zugsɔb onɛ an Israel Wina'am la da anɛ ye ba kʋʋ ba, ya'a anɛ tadim bɛɛ kpi'em, bɛɛ dau bɛɛ pu'a. 14 Ba da kaanb nɛ zi'el Zugsɔb la tuon, ka yɛli li nɛ kʋkɔtita'ar nɛ tansʋg nɛ na'atana nɛ wiis. 15 Israel wʋsa sʋnf da malis nɛ kaanbʋg la zug bɔzugɔ ba da pɔnɛ nɛ ba sʋnf wʋsa. Ba da ie Wina'am nɛ, nɛ ba sʋnf wʋsa, ka o kɛ ka ba nyɛɛ o. Alazug Zugsɔb la da tisi ba yɔlisim zin'ig wʋsa.
16 Na'ab Asa mɛ da pidig o yaapu'a Maaka onɛ da an pu'ana'ab la bɔzugɔ o da sɛ teŋgban Asera dazi'edir la pʋ'ʋsid. Asa da kɔ'ɔg daug la lɔbi bas Kidron bɔn'ɔgin la ka nyu'oe li nɛ bugum. 17 Hali on da pʋ yis teŋgbana banɛ bɛ kʋkʋna zut la, Asa da kpɛm pɛsig o sʋnf wʋsa tis Zugsɔb Wina'am hali nɛ o nyɔvʋr bɛn wʋsa. 18 O da mɔr anzurifa nɛ sanlima la'abanɛ ka on nɛ o saam da pɛsigi tis Wina'am kɛn Wina'am Pʋ'ʋsim Yin la na.
19 Asa na'am saŋa la li da nɔk wʋʋ yʋma pistan' nɛ anu ka zabir kae.